AQShda Rishton kulolchilik maktabi tashkil etiladi
Vashington shahrida “Rishton kulolchiligi: Markaziy Osiyo kulolchilik san'atining gavhari” nomli ko'rgazma bo'lib o'tmoqda
Ko'rgazma doirasida Vashington shahridagi “DC Clay Center” kulolchilik markazida rishtonlik kulollar sulolasi avlodlari ishtirokida keramika bo'yicha mahorat darsi va seminar o'tkazildi.
Tadbirda AQSh kulolchilik san'ati ixlosmandlari, yetakchi san'atshunos olimlar va Amerika kulollari ishtirok etishdi. Shuningdek, USAID rahbari o'rinbosari Anjali Kaur tinglovchi-shogird sifatida qatnashdi.
Mahorat darslari Rishton kulolchilik ishi va uning tarixi bo'yicha media-taqdimot, charxda Rishton idishlari shaklini yaratish texnikasi sirlari va idishlarni bo'yash hamda naqshlar bilan bezash texnikasi, shuningdek, giyohlardan pigmentatsiya bo'yoqlarini yaratish usullari mavzularida bo'lib o'tdi.
Tadbir yakunida AQShning “ASU Trading LLC” savdo kompaniyasi va Rishton tumanidagi “Exclusive Ceramic of Rishtan” mas'uliyati cheklangan jamiyati o'rtasida AQSh shtatlarida sopol mahsulotlarni sotish bo'yicha umumiy qiymati 3 million dollarlik distribyutorlik shartnomasi tuzildi.
Shuningdek, Rishton tumani hokimligi, USAID va “DC Clay Center” studiyasi bilan birgalikda AQShda “Rishton kulolchiligi maktabi”ni tashkil etish, “DC Clay Center” va “Alexandria Clay Co-op” studiyalari bilan birgalikda yetti kunlik “kulolchilik turizmi” paketini ishlab chiqish, Rishton tumani hokimligi, USAID va “Rishton kulolchilik markazi” bilan birgalikda “keramika-terapiyasi” ijtimoiy dasturini joriy etish to'g'risida kelishuvlarga erishildi.
Amerikaning Virjiniya shtatidagi “Alexandria Clay Co-op” kulolchilik studiyasida ham Rishton kulollari ishtirokida seminarlar bo'lib o'tishi rejalashtirilgan.
“Dunyo” AA,
Vashington sh.