O'zbek shoirining kitobi Turkiyada taqdim etildi
Turkiyaning nufuzli nashriyotlaridan biri “Baygenç Yayıncılığı”da O'zbekiston Jurnalistlar uyushmasi Boshqaruvi a'zosi, O'zbekiston Yozuvchilar uyushmasi a'zosi Olimjon O'sarovning “Aşktan Bir Dünya Kuracağim” (“Muhabbatdan Vatan quraman”) nomli she'riy to'plamini turk tilida nashr qilgan edi.
Kuni kecha Turkiyaning Alanya shahridagi Yozuvchilar jamiyatida turkiyalik kitobsevarlar tomonidan mazkur kitobning taqdimot marosimi o'tkazildi. Unda Alaniya Faol Jurnalistlar Jamiyati Prezidenti Ferit Kesen, ushbu jamiyat vitse-prezidenti va kotibi Zelixa Bashar Oner, Alaniya shahar hokimi o'rinbosari, yozuvchi Abdulla Akbash, Turkiya tabiat turizmi uyushmasi prezidenti Shafak Kuru, DIM TV media televideniesi jamoasi hamda Ayshegul Bilir O'ruju, Axmet Olgun, Garip Gorgulu, Oguz Korum, Ugur Sarigul, Turgay Duman singari turkiyalik mashhur shoir va yozuvchilar ishtirok etib, Olimjon O'sarovning kitobi haqida o'z fikr va ma'ruzalari bilan qatnashdilar.
Arslan Bayir muharrirlik qilgan ushbu kitob 10 ming nusxada chop etilgan bo'lib, unda shoirning Vatan, istiqlol, muhabbat mavzusidagi turkum she'rlari o'rin olgan.
O'z ijodi bilan turkiyalik she'r ixlosmandlariga ham manzur bo'lgan yurtdoshimiz, taniqli shoir O.O'sarovni bunday e'tirof bilan qutlaymiz.
M.TO'RAYEV