Buyuk Britaniyada O'zbekistonlik talabalar uyushmasi faoliyat ko'rsatadi

Mamlakatimizning Londondagi elchixonacida O'zbekistonlik talabalar uyushmasining rasmiy ochilishiga bag'ishlangan tadbir bo'lib o'tdi.

Unda Buyuk Britaniyaning Oksford, Kembrij, Edinburg, London Iqtisodiyot maktabi, London Imperial kolleji kabi yetakchi universitetlarida tahsil olayotgan va “El-yurt umidi” jamg'armasi grantlari asosida tahsil olayotgan o'zbekistonlik talabalar ishtirok etdi.

O'zbekistonning Buyuk Brita­niyadagi elchisi Ravshan Usmonov  anjumanning  ochilish  marosimidagi  nutqida ishtirokchilarni Yangi O'zbekistonning asosiy qatlami hisoblangan yoshlar uchun davlatimiz tomonidan yaratilgan imkoniyatlar va istiqboldagi rejalar xususida so'z yuritdi.

Tadbir davomida O'zbekistonlik talabalar uyushmasi yetakchilari tashkilot oldida  turgan vazifalar va  istiqboldagi  rejalarga  bag'ishlangan  taqdimot o'tkazdilar. Taqdimot  davomida Davlatimiz rahbari boshchiligida yurtimizda olib borilayotgan yoshlarga doir davlat siyosatini  izchil  davom ettirish va  targ'ib  etish uyushma oldidagi asosiy vazifa sanalishi ta'kidlandi.  Uyushma kelgusida O'zbekistonning boy madaniy-ma'rifiy tarixini Buyuk Britaniyada turli tadbirlar, yig'ilishlar va davra suhbatlari orqali ommalashtirishni ham maqsad qilgan.

O'zbekistonlik talabalar uyushmasining  tantanali ochilish  marosimidan  so'ng Buyuk Britaniya  oliy ta'lim muassasalarida tahsil olayotgan vatandosh talabalar o'rtasida “Zakovat” intellektual o'yi­­ni bo'lib o'tdi. Turnirda 6 ta jamoa besh raundda o'z  bilimlarini sinovdan o'tkazdi.  Bilimlar  bellashuvi yakunida uning g'oliblari dip­lomatik  missiya nomidan esdalik sovg'alari bilan taqdirlandi.

Ta'kidlash joizki, O'zbekistonning Londondagi elchixonasi ko'magida bir guruh vatandosh talabalar tomonidan amalga oshirilayotgan ushbu tashabbus Buyuk Britaniyadagi universitetlarda tahsil olayotgan mamlakatimiz yoshlarini birlashtirish, ularning bilim olishlari uchun qulay va faoliyatning turli sohalarida faol ishtirok etishlari uchun universal platforma yaratishga qaratilgan.

“Dunyo” AA,

London shahri.