RAMAZON

A'zam O'KTAM

Yilning boshga qo'ngan humoyi,

Mo''jizaga, fusunga boyi.

Xush kelibsiz, marhabo, dermiz,

Tasbeh oyi, taroveh oyi.

O'rganamiz tiymoqqa nafsni,

Itqitamiz oradan nahsni.

Kechirgaymiz, uzrlar so'rab

Bas qilamiz behuda bahsni.

Qo'limdadir ilohiy Kitob,

Unda shundoq etilmish xitob:

“Ushbu oyda neki qilsangiz,

Alloh O'zi aylagay hisob”.

O'ldirsa ham, lazzat berar o'q,

Talpinadi ko'kka – ko'ngil to'q.

Rabbim behad mehribon, ammo

Qadr tuni o'zga oyda yo'q.

Farishtalar samodan tushar,

Biz behishtni ko'ramiz tushlar.

“Alvido, deb qolurmiz nahot?!”

Hozirdanoq qalbim uvishar.

O'n bir oyga odil xoqonim,

Nozil bo'lmish sizda Qur'onim.

Inson bo'lib yashaylik, bizni

Yo'lga boshlang, yo'lga, sultonim.