Qo'shnim – jigarim

Xorazmliklar Shumanay tumaniga madadga kelishdi

“Qo'shning tinch — sen tinch” maqoli zamirida katta ma'no borligini anglash qiyin emas. Qo'shnimizning uyidagi farovonlik, to'kinlik, hamjihatlik bizga ham halovat bag'ishlaydi. Mabodo qo'shnining xonadonida kelishmovchilik boshlansa, biz ham tinchimizni yo'qotamiz. Shuning uchun qo'shnilarimiz bilan ahil, inoq bo'lib bordi-keldi qilish, shirinroq taom pishirsak, qo'shniga ham ilinish azaliy udumlarimizdan sanaladi.

Xorazmliklar Qoraqalpog'istonning cheksiz hududlarida istiqomat qilayotgan aholi bilan yaqin qarindoshdek, og'a-ini-yu, opa-singildek bir-birlariga izzat-hurmat ko'rsatishadi. Bu bejiz emas. Chunki yaqin qo'shnichilik ulug' ne'mat.

Yaqinda xorazmlik bir guruh quruvchilar va turli kasb egalari bunyodkorlik jabhalarida qatnashish uchun Shumanay tumaniga yo'l olishdi. Maqsad — qo'shnilarning yashash sharoitidan xabar olish, muhtoj oilalarga yordam ko'rsatish, yangidan imoratlarni tiklashdan iborat edi.

— Prezidentimiz Shavkat Mirziyoyevning 2022 yil 1 noyabrdagi “Orolbo'yi mintaqasini barqaror rivojlantirish bo'yicha ishlarning samaradorligini oshirish chora-tadbirlari to'g'risida”gi Farmonida Qoraqalpog'iston Respublikasida istiqomat qilayotgan, yashash sharoiti og'ir bo'lgan oilalarni qo'llab-quvvatlash ko'zda tutilgan edi. Shu asosda qabul qilingan Vazirlar Mahkamasining qarorida Qoraqalpog'iston Respublikasida aholi uchun munosib turmush sharoitlarini yaratish va mahallalar infratuzilmasini yanada yaxshilash chora-tadbirlari to'g'risida vazifalar belgilab berildi. Ana shunga asosan respublikamizdagi viloyatlar hamda Toshkent shahri hokimliklari Qoraqalpog'is­ton Respublikasining bir qator tumanlariga biriktirildi.

— Xorazmliklar Shumanay tumanidagi ovullarni taraqqiy ettirish, aholining turmush darajasini yanada yuksaltirish, yangidan uy-joylar qurish va boshqa muammolarni bartaraf etish maqsadida bunyodkorlik ishlarini boshlab yuborishdi, — dedi Qoraqalpog'iston Respublikasi Jo'qorg'i Kengesi deputati, O'zbekiston Respub­likasida xizmat ko'rsatgan jurnalist Nazira Matyoqubova.

Eng quvonarlisi, tumanning “Birlashik” ovuli fuqarolar yig'iniga qarashli hududda 50 o'rinli zamonaviy maktabgacha ta'lim tashkiloti bunyod etildi. Xorazm viloyati mahalliy byudjeti hisobidan qad rostlagan mazkur binoda endilikda ovulning maktabgacha yoshdagi bolalari tarbiyalanmoqda.

Bundan tashqari, uy-joyi eskirgan aholiga yangidan turar joylar qurib berilib, foydalanishga topshirildi. Ba'zi uylar tomi shifer qilib berildi. Bundan tashqari, Xorazm viloyati hokimligi tomonidan Shumanay tumanida 349 ta oilaning turar joyida ta'mirlash ishlari olib borilganligi bois, uylar yangicha qiyofa kasb etib, ko'zlarni quvontirdi. 20 nafar fuqaroning eskirgan uylari o'rnida yangidan zamonaviy imoratlar bunyod etildi. Mazkur yangilanishlar uchun viloyat byudjetidan 5,5 mlrd so'mlik mablag' ajratilgan.

3 mlrd so'mlik loyiha asosida yangidan yana bir maktabgacha ta'lim tashkiloti qurilayotganligi ota-onalarga cheksiz quvonch bag'ishlamoqda. Tumandagi bir qancha ovullardagi o'nqir-cho'nqir yo'llar asfalt qilinib, piyodalar yo'lakchalari tashkil etildi.

Shumanaylik aholi xorazmliklarning beg'araz ko'maklaridan behad mamnun bo'lishmoqda. Endilikda Shumanay tumani ham ijtimoiy-iqtisodiy tomondan rivojlanib, ovullarning infratuzilmasi yanada yaxshilanmoqda.

Qo'shnilarning qalbida yaralgan do'stlik ko'priklari hech qachon zavol topmagay!

Feruza TANGRIBERGANOVA