Муаллим

Абдулла ОРИПОВ,

Ўзбекистон Қаҳрамони, Ўзбекистон халқ шоири.

Муаллим ҳақида сўзим ушбудир:

Муаллим камолот ичра кўзгудир.

Ўқидим Геродот, тарихни кўп бор,

Форобий, Дантени такрор ва такрор.

Барини ўқидим, лол қолди ақлим,

Барига устозсан ўзинг, муаллим.

Алишер қалбига солган сеҳр-файз

Сенсан, эй муаллим, устоз Абул-Лайс.

Қутлуғ хонадонда қутлуғ калом бу,

Ҳамид Олимжон бу, Ғафур Ғулом бу.

Буюк Темур сендан топгандир таълим,

Сен шундоқ азиз зот, азиз муаллим.

Рост айтсам, ўзингсан энг аввал даҳо,

Сен ҳаёт ганжида дурри бебаҳо.

Улуғ айёмингда шеърий калом бу,

Шогирдлар номидан қутлуғ салом бу.