Биз аслида нимадан ғурурланишимиз керак?
Шерзодхон ҚУДРАТХЎЖА,
Ўзбекистон Журналистика ва оммавий коммуникациялар
университети ректори, профессор:
Ўзбек журналистларида бир одат бор: хорижий меҳмонларга, одатда, бир турдаги саволларни берадилар: Ўзбекистон сизга ёқдими? Нима ёқди? Ўзбекистоннинг қайси жиҳатларини кашф қилдингиз? Булар одатий саволларга айланган.
Ўзбеклар хорижликлардан жавоб олганда бизнинг паловимизни, бошқа овқатларимизни мақташини, меваларимиз, умуман, меҳмондўстлигимизни мақташини кутамиз. Ҳаммаси ўз йўлига: дастурхон ҳам, қўй сўйиб меҳмонни кутишимиз ҳам. Бу билан XXI асрда дунёни ўзгартириб бўлмайди. АҚШ ё Италияга бориб келгач, уларнинг пиццасини эсламаймиз-ку. У ердаги жамият ривожи, қонунларнинг устуворлигини эътироф қиламиз. Ўзлари ҳам шу билан мақтанадилар. Кореяда бўлганимда, кичик бир шаҳарчадан 8 нафар Нобель совриндори чиққанидан хабар топдим. Бу эса мақтанишга арзигулик. Ёшлар қадриятларимиз, тарихимиз билан ғурурланишсин ва дунёга илм-фанда янги марраларни тақдим этишсинки, биз бундан ғурурланиб юрайлик.
* * *
Жадидлар бугунги жамиятимизни кўрганда, улар ҳайратланишарди. Улар бизнинг тўйларимизни кўриб, бизнинг қилаётган харажатларимизни кўриб, биз улар юз йил аввал айтиб кетган хатоларни такрорлаётганимизни кўриб, улар айтарди: “Бизнинг ўзбек миллати шаклланиш жараёнида давом этяпти, ҳали якунлангани йўқ. Улар айтарди: тезроқ биз миллат бўлайлик, тезроқ биз ўзлигимизни англайлик!..”
* * *
Ўзбекларнинг денгизи йўқ. Туркияни қучоқлаб турувчи тўртта денгиз бор. Босфор ва Дарданелл бўғозининг бўлиши ёки Ламанши борлиги, ёки Мисрдаги энг муҳим Сувайш канали ушбу мамлакатлар халқини боқиб туради ўша ердан ўтадиган трафик. Афсуски, Ўзбекистонда бу йўқ. Бизнинг ақлимиз — бизнинг денгизимиз бўлиши керак!
Муаллифнинг
телеграм каналидан олинди.