Болаларга қоидаларни ўргатайлик!
Ёнғиннинг келиб чиқиш сабаблари турлича. Айниқса, болаларнинг ўйинқароқлиги оқибатида содир бўлган ёнғин жуда хавфли. Шундай ота-оналар ҳам борки, улар эътиборсизлик ва масъулиятсизликлари туфайли фарзандлари ёш бўлишига қарамай, уларни уйда ёлғиз қолдириб кетишади, ҳатто гугуртларни уларнинг қўли етмайдиган жойларга қўйишни ҳам “унутишади”.
Бундай ҳолда эса болалар гугурт, электр-маиший асбоблар ва газ жиҳозларидан бемалол фойдаланишлари мумкин. Агар уйда ёнғин чиққудек бўлса, даҳшатга тушган болалар бурчакларга ёки шкаф, каравотлар остига беркиниб олишлари табиий. Натижада эса олов борган сари кучайиб, ўта аянчли тус олиши ҳеч гап эмас…
Шу боис ҳам биз, катталар ҳамиша фарзандларимизга ёнғиндан эҳтиёткорона фойдаланиш кераклигини уқтиришимиз, гугурт, электр-маиший асбоблар ва газ жиҳозларининг ўйинчоқ эмаслигини тушунтириб боришимиз шарт.
Айтиш жоизки, ёнғинлар сони йилдан-йилга ортиб бормоқда. Улар катта миқдорда моддий зарар келтиришдан ташқари, энг аянчлиси — ўлимга сабаб бўлаяпти. Шунинг учун болаларни уйда қаровсиз қолдирмаслик, гугуртларни болаларнинг қўли етмайдиган жойда сақлаш, уйдан чиқиш чоғида электр иситкич ва газ асбобларини ўчириш, болаларга олов билан ўйнаш, электр иситиш асбоблари, маиший техника воситаларидан фойдаланишга рухсат бермаслик, болаларга олов билан эҳтиёткорона муносабатда бўлишни ўргатиш, ёнғин келиб чиққудай бўлса, қандай ҳаракатлар қилиш кераклигини уқтириш зарур.
Ёдингизда бўлсин! Фақат ёнғин хавфсизлигига қатъий риоя этибгина энг катта бахтсизлик — ёнғин балосининг олдини олиш мумкин.
М. РИСБЕКОВ,
Ўзбекистон Республикаси Президенти Администрацияси Маъмурий биноларидан фойдаланиш бошқармаси биносида ЁХТТЭ 2-бўлинмаси кичик инспектори,
кичик сержант.