“Ijtimoiy karta” nima va u kimlarga beriladi?

Ijtimoiy karta 2024 yilning dekabr oyidan boshlab yangi tayinlangan 9 turdagi ijtimoiy to'lovlar oluvchi shaxslarga taqdim etilmoqda.

Unga muvofiq ijtimoiy kartani muomalaga chiqarish va foydalanish uchun taqdim etish moliyaviy agent vazifasini bajaruvchi O'zbekiston Respublikasining rezident tijorat banklari tomonidan amalga oshiriladi.

Barcha fuqarolar uchun dastlab elektron ijtimoiy karta muomalaga chiqariladi va foydalanish uchun taqdim etiladi. Bank kartasi shaklidagi ijtimoiy karta fuqarolarning xohishiga ko'ra muomalaga chiqariladi va foydalanish uchun taqdim etiladi.

Ijtimoiy kartani muomalaga chiqarish O'zbekiston Respublikasi Yagona interaktiv davlat xizmatlari portali, “Ijtimoiy karta” mobil ilovasi va “Inson” ijtimoiy xizmatlar markazlari hamda alohida hollarda ijtimoiy xodimlar — moliyaviy  agent orqali amalga oshiriladi.

Ijtimoiy karta barcha fuqarolarga mobil ilova orqali real vaqt rejimida bepul asosda muomalaga chiqariladi va foydalanish uchun taqdim etiladi.

2025 yil 1 yanvardan boshlab “Ijtimoiy karta” AT va mobil ilovani texnik qo'llab-quvvatlash ijtimoiy karta bo'yicha to'lov xizmatlarini ko'rsatuvchi to'lov tashkilotining tunu kun faoliyat ko'rsatadigan texnik xizmati yo'lga qo'yilgan bo'lsa, 1 fevraldan boshlab ijtimoiy kartani muomalaga chiqarish va foydalanish uchun taqdim etish masalalari bo'yicha Agentlikning axborot-ma'lumotnoma xizmatlarini ko'rsatuvchi “1070” qisqa raqamli va tunu kun faoliyat ko'rsatadigan xizmati faoliyati test rejimida yo'lga qo'yildi.

Joriy yilning 1 oktyabridan boshlab “Raqamli hukumat” tizimi idoralararo integratsiyalashuv platformasi orqali foydalanuvchilarni identifikatsiya qilish tizimi doirasida “Ijtimoiy karta” ATning identifikatsiya qilish tizimi joriy etiladi.

Aytish kerak, qarorga muvofiq, fuqarolar o'z xohishiga ko'ra kerakli hujjatni qog'oz shaklida yoki mobil ilova orqali raqamli shaklda taqdim etish huquqiga ega. Yil boshidan yangi tayinlangan ijtimoiy to'lovlar ijtimoiy karta orqali to'langanda, oluvchining ilgari tayinlangan boshqa ijtimoiy to'lovlari ham ijtimoiy karta orqali to'lab beriladi.

Yana shuni alohida ta'kidlash joizki, 1 apreldan boshlab ijtimoiy karta transport kartasi, shu jumladan, jamoat transporti uchun qonunchilik hujjatlarida belgilangan shahar yo'nalishlari bo'yicha tarif rejalaridan foydalangan holda imtiyozli transport kartasi vazifasini bajaradi.

2027 yil 1 yanvardan boshlab esa ijtimoiy to'lovlar fuqarolarning ijtimoiy kartalariga o'tkaziladi.

Alibek O'SAROV,

Qo'shrabot tuman adliya bo'limi

yuridik xizmat ko'rsatish markazi boshlig'i.