Yutuqlar kurashlarda namoyon bo'ladi
Urganch davlat universiteti talabalariga omad kulib boqmoqda. “Bu birinchisi emas, nasib bo'lsa, oxirgisi ham bo'lmaydi!” Universitet iqtidorli yoshlarining qalb shiori bu!
Oliy ta'lim dargohi talabalari orasidagi muvaffaqiyat balki yuzinchi marta g'oliblikdan darak berayotgandir… Qaerdaki sport sohasida musobaqa boshlansa, iqtidorli yoshlarning yutuqlaridan butun boshli universitet ahli hayajonga tushadi. Axir iqtidorli o'g'il-qizlar hazilakam emas – naq 2 ta oltin, 2 ta kumush, 4 ta bronza medaliga ega bo'lishdi.
Joriy yilning 11-13 fevral kunlari Qarshi shahrida oliy ta'lim muassasalari talabalari o'rtasida “Universiada-2024” sport musobaqasining kurash turi bo'yicha respublika final bosqichi bo'lib o'tdi.
Mazkur musobaqada Abu Rayhon Beruniy nomidagi Urganch davlat universiteti jamoasi 7 ta vazn toifasida faol ishtirok etib, bir qator medallarga sazovor bo'lishdi.
— Respublikamiz miqyosida qo'lga kiritilgan g'alabalar ko'p ming sonli universitetimiz jamoasining qalbini katta quvonchga, g'urur va iftixorga to'ldirdi, — dedi filologiya fanlari doktori Dilshod G'oyibov. — Talabalarimiz erishgan natijalardan shu narsa ayon bo'ladiki, yutuqlarimiz nafaqat ta'lim sohasida, balki sport yo'nalishida ham respublika va jahon miqyosida namoyon bo'layotgani faxrli natijalardir.
Oliy ta'lim maskanining sport faoliyati pedagogika va psixologiya fakulteti 241-dzyudo guruhi talabasi Asadbek Bekturdiyev 1-o'rinni olib, oltin medalga munosib topilganligidan hayajonlanib, universitetda sport bilan shug'ullanish uchun barcha yetarli sharoitlar yaratilganligidan mamnunligini e'tirof qildi.
— Men ham Asadbek bilan bitta fakultetda, ammo kurash guruhida ta'lim olayapman, — dedi xursandlikdan chehrasi tabassumga to'lgan Mavluda Abdullayeva. — Biz mamlakatimizning eng baxtiyor yoshlaridanmiz. Prezidentimiz tomonidan yaratib berilayotgan imkoniyatlardan mamnun bo'lganim holda shuni ta'kidlamoqchimanki, o'qish va o'rganish insonning bir umrlik hamrohi bo'lmog'i darkor. Yutuqlarimda, avvalo, ustozlarimning mehnati borligidan baxtliman. Menga berilgan oltin medal — avvalo, ustozlarimniki, qolaversa, universitet jamoasinikidir!
Yana universitet yoshlaridan Asadbek Shixnazarov, Mohinur Allaberganova 2-o'rin sohiblari — kumush, Dinara Egamberganova, Laylo Yo'ldoshevalar 3-o'rinni egallab, bronza medalini qo'lga kiritishga muyassar bo'lishdi.
Feruza TANGRIBERGANOVA