AQSh Prezidentining bayonoti

AQSh prezidenti Donald Tramp kuni kecha Rossiya prezidenti Vladimir Putin bilan telefon orqali suhbatidan so'ng bayonotlarini e'lon qildi:

• O'ylashimcha, tez orada nimadir sodir bo'ladi. Bu urushga katta ego egalari aralashgan. Agar hech narsa yuz bermasa, biz ortga chekinamiz.
• Ukraina masalasida jiddiy siljish kuzatilmasa, AQSh muvofiqlashtiruvchi rolini Yevropaga topshiradi.
• Ukrainadagi urush Yevropaning muammosi edi, AQSh bekor aralashdi.
• Menimcha, Putinning joniga tegdi. Putin to'xtashni istaydi, deb o'ylayman.
• Miyamda Rossiya-Ukrainaga bosim qilishdan to'xtashimni ko'rsatuvchi qizil chiziq bor. Ammo u qanaqa qizil chiziqligini aytmayman.
• Ukrainani qurol bilan ta'minlash rejamiz yo'q emas, biroq urush to'xtashiga ishonamiz.
• Tinchlikka erishish uchun imkoniyat bor, shu sababli Rossiyaga qarshi sanksiyalarni kuchaytirmayapmiz.
• Amerika askari Ukrainaga bormaydi.
• Zelenskiy bilan “muloqot qilish uncha oson emas”.
• AQSh Ukrainaga “xorijiy davlat uchun rekord miqdordagi mablag'”ni berdi.
• Ukrainaning nizoni bas qilish va tinchlikka erishish uchun xatti-harakatlari yetarlichami, 2-4 haftadan so'ng bir nima deyish mumkin.

Uchuvchisiz samolyot parvozi

Xitoy kelasi oyning boshida 100 tagacha kichik dron-kamikadzelarni tashishga qodir bo'lgan “Jiutian SS-UAV” uchuvchisiz samolyotining ilk parvozini amalga oshirishi mumkin.

Shuningdek, qurilma 8 ta tashqi osma blok bilan jihozlangan bo'lib, ular yordamida 1000 kilogrammgacha bo'lgan boshqariladigan aviabombalar, shuningdek, “havo-havo” va “havo-er” raketalari, kemaga qarshi raketalar va kamikadze-dronlarni o'rnatish mumkin.

Xitoy markaziy televideniesi bergan ma'lumotga ko'ra, uchuvchisiz samolyotning yuqoriga ko'tarilishi 15 ming km balandlikkacha erisha oladi. Qanotlari kengligi 25 metr, parvoz masofasi 7 ming km va maksimal uchish og'irligi 16 tonnani tashkil qiladi. Havoda 12 soat qolish imkoniyatiga ega.

“Jiutian” uchuvchisiz uchish apparati bortini yig'ish yakunlandi. Hozirda qurilmaga tizimni o'rnatish va test rejimida ishlatib ko'rish ishlari olib borilmoqda. Birinchi parvoz joriy yilning iyun oyi oxiriga rejalashtirilgan”, – deyiladi xabarda.

Yangi papa ishga kirishdi

Rim katolik cherkovi yangi rahbari Papa Leo XIV hokimiyat ramzlari – “baliqchi uzugi” va palliy – kashta tikilgan xochli jun tasmani qabul qilib oldi. Ushbu qadimiy marosim pontifikat 267-Papa faoliyati rasman boshlanganini bildiradi.

Papa va'zi, “Osmon malikasi”ni  duo qilish bilan yakunlanadigan ochilish marosimi Leo XIV raisligida kechadi. Maydonda ko'plab dindorlar, shuningdek, xorijiy mamlakatlardan kelgan 150 dan ziyod delegatsiya a'zolari, qirollik xonadonlari va diniy konfessiya vakillari, nasroniylardan tashqari musulmonlar, yahudiylar, hindular va butchilar ham bor. Muqaddas taxt matbuot xizmati ma'lumotiga ko'ra, tadbirda 150 mingga yaqin odam to'plangan.

Leo XIV o'z va'zida dindoshlarini cherkovda birlashishga chaqirib, bu tinch-totuv yashash uchun asos ekanini ta'kidlagan.

G'azoga hujum kuchaydi

So'nggi 24 soat ichida G'azoning turli hududlariga uyushtirilgan hujum natijasida 30 nafar falastinlik halok bo'ldi, deya xabar bergan “Anadolu” agentligi.

Isroil havo kuchlari sektor janubidagi Xon Yunusga, begunoh aholi joylashgan uy va chodirlarga 14 marta havodan zarba bergan. Jabaliya qochqinlar qo'nalg'asi g'arbiy qismida, Al-Faluja bozori yaqinidagi aholi manzilida ham odamlar qurbon bo'lgan. Al-Yormuq hududiga ham hujum qilingan. Anklav markaziy qismidagi Dayr Al-Balo va Nusayrat qochqinlar lageriga yo'llangan to'rt havo hujumi oqibatida sakkiz kishi, jumladan, uch bola va bir ayol hayotdan ko'z yumgan.

Xon Yunus shimoli-sharqidagi Al-Qarara shahri ham o'qqa tutildi. Bundan tashqari Nosir kasalxonasi yaqinidagi qo'riqlanadigan ob'yektga zarba berildi. Bu joylarda qurbonlar qayd etilmagan. Guvohlar xabar berishicha, artilleriyadan G'azo shimolidagi Bayt Lohiya shahri ham to'pga tutilgan.

Poytaxt merining g'alabasi

Ruminiya Prezidenti saylovining ikkinchi bosqichi natijasi 100 foiz hisoblab chiqilganda, Buxarest shahri meri Nikushor Dan g'alaba qozongani ma'lum bo'ldi. Bu haqda “RIA Novosti” yozgan.

Ushbu siyosatchini saylovchilarning 53,6 foizi qo'llab-quvvatlagan. Asosiy raqib, 46,40 foiz ovoz to'plagan “Ruminlarni birlashtirish ittifoqi” muxolifat partiyasi rahbari Jorj Simion allaqachon mag'lubiyatini tan oldi va raqibini tabriklagan.

G'olib haqida nima ma'lum? Nikushor Dan Ruminiyaning Yevropa Ittifoqi va NATO bilan yanada faol hamkorlik qilishi, shuningdek, Qo'shma Shtatlar bilan strategik sheriklikni mustahkamlashi tarafdori. U Shimoliy Atlantika alyansining Rossiya Yevropaga tahdid solayotgani haqidagi rasmiy fikriga qo'shiladi. G'arbdagi hamkorlar bilan birga Ukrainani qo'llab-quvvatlashda davom etmoqchi. Mamlakat mudofaa xarajatini yalpi ichki mahsulotga nisbatan 2,5 foizdan 3,5 foizga ko'tarish zarur, deb hisoblaydi. Avval e'lon qilgan rejalariga ko'ra, “gibrid tahdid, jumladan, kiberhujum va dezinformatsiyaga qarshi kurashish uchun tezkor kuchlar yaratish”ni maqsad qilgan.

O'zJOKU 1-kurs talabasi Nigina Iskandarova tayyorladi.