Bolalar — jannat rayhonlaridir
Antaliya dunyodagi go'zal shaharlardan biri. Bu shaharda nafaqat bog'lar, balki ko'chalar ham gullarga burkangan. Binolaridan ham baland palmalari-yu xushmanzara daraxtlari shaharni yanada ko'rkamlashtirib turibdi. Singlim oliy ma'lumotli farmatsevt-provizor. Antaliya shahrida oilasi bilan istiqomat qiladi. Kuyovimiz esa shifokor. Katta jiyanim Sadiya besh yoshda bo'lsa-da, juda ham ziyrak qiz. Turkcha qilib aytganda, “cho'h” go'zal va dono. Ulug'larda “Qiz farzand oilaga baraka keltiradi” degan hikmat bor. Yaqinda Alloh ularga yana bir qiz farzand ato etdi. Iloho, rizqi bilan, umri bilan bergan bo'lsin!
Ularni yo'qlab, Antaliyaga tez-tez borib turamiz. Samiya bir yoshdan o'tdi, juda shirin payti: kulsang kulaveradi, kuldirsang qiqirlaydi. Chaqaloqlar kulgisi olamni nurga to'ldiradi, degan ibora topib aytilgan ekan.
Har safar Turkiyaga borganimda, bu go'zal yurtda bolajonlar, ayniqsa, chaqaloqlar naqadar e'tibor va e'zoz bilan qadrlanishini ko'rib, hayratga tushaveraman. Ancha mamlakatlarda bo'lganman. Bolalarni suyib erkalatishda turk qardoshlarimizga yetadigani bo'lmasa kerak, degan fikrga keldim.
Mahalliy aholi vakillariga kimning farzandi ekanining farqi yo'q: chaqaloqni ko'rdi deguncha unga kulib qarayveradi, erkalatib tabassum qilaveradi. Go'dakni yetti yot begona erkalab suyib, shirin so'zlar aytganida judayam xursand bo'lib ketasiz ekan.
Singlim Zarifa bizlarga yaxshiliklarni ilinishga odatlangan. Doimo bizlarni dengizga, parklarga, muzeylarga, shahar tashqarisidagi diqqatga sazovor joylarga sayohatlarga, savdo va ko'ngilochar markazlarga taklif qiladi. Bu safar “Agora” savdo va ko'ngilochar markaziga otlandik. Bolalar aravachasidagi chaqaloqning qadrlanishini Turkiyada bo'lmaguningizcha tasavvur qila olmaysiz. Tramvayga chiqasizmi, avtobusgami, bolali ayolni ko'rdi deguncha unga yo'l berishadi, joy bo'shatishadi. Aravachalarni avtobusga chiqarishda bajonidil-beminnat yordam berishadi va eng muhimi, ular bolalilarga yordam berib zavqlanishadi. Bolajonga biror-bir shirinlikmi, o'yinchoqmi hadya qilish turklar uchun odatiy hol ekan. Ochiq chehra bilan zurriyotingizga quvonch ulashayotgan mehridaryo insonlarga tashakkurlar aytamiz.
“Agora” savdo va ko'ngilochar markazida brendi jahonga mashhur savdo do'konlari, restoranlar, avtomat o'yin zallari, bolalar o'yin maydonchalari va kinoteatr bor. Markazga kiraverishda nogironlar va bolalar aravachalaridan bepul foydalanish mumkin. Hatto kuchuk va mushuklar uchun ham shunday aravachalar bor ekan. Markazdagi betakror go'zallik hayratingizni oshiradi. Bolalar va onalarga yaratilgan sharoitdan mamnun bo'lgan singlim: “Opajon, bu yurtda bolalar juda baxtiyor hayot kechirishadi”, deydi.
“Agora”ga tashrif buyuruvchilarning bolalari uchun zamonaviy o'yingoh mavjud bo'lib, otasi yoki onasining telefon raqami yozib olinadi-da, bolajon bu maydonchaga qirq besh daqiqagacha bepul qo'yib ketilishi mumkin. Xuddi bolalar bog'chasi kabi xushmuomala tarbiyachilar farzandingizga qarab turadi.
Bu markaz ichkarisida o'stirilayotgan anvoyi gullar va manzarali daraxtlar bahri dilingizni yayratadi. Savdo shaxobchalari oldidagi dekorativ o'rindiqlarda nafasingizni rostlaysiz, favvorachalardan zavqlanasiz. To'g'ri, ikki nafar yosh bola bilan bir joyga borishning mashaqqatlari ko'p, ammo odamlarning bolajonlarga g'amxo'rligi evaziga qiyinchiliklarni unutasiz, sizda ruhiy quvvat paydo bo'ladi.
Bunday fayzli maskanda dunyoning ko'plab mamlakatlaridan dam olish uchun kelgan sayyohlarni uchratasiz. Bir-biriga tabassum bilan qarayotgan kishilarning muomala madaniyatini ko'rib, havasingiz ortadi.
Jajji bolajonlarni bag'ringizga bossangiz, go'yo jannat rayhonlarini hidlaysiz. “Bolalar — jannat rayhonlaridir” degan hadisi sharifning mohiyatini anglab yetgandek bo'lasiz. Bolalarga shunchalar quvonch ulashilayotgan bu qardosh turk yurtida, ona Vatanimizda, keling, butun dunyoda doimo tinchlik-osoyishtalik bo'lsin!
Gavhar DILMURODOVA.