Мардлар билан юксалгайдир юртнинг қадри
Сайёра САМАНДАР
Муаллиф ҳақида:
Сайёра САМАНДАР — Ўзбекистон Ёзувчилар уюшмаси аъзоси, филология фанлари номзоди, доцент, “Шуҳрат” медали соҳибаси.
Муаллифнинг “Сизга айтолмаган сўзларим”, “Кўнглим”, “…Ва яна баҳор”, “Озодликдек бахт йўқдир”, “Фақат ишқ…” номли шеърий тўпламлари чоп этилган.
Ўзбек адабиёти, жадидлик ҳаракати намояндаларининг ҳаёти ва ижодини тадқиқ қилишга бағишланган қатор илмий мақолалари чоп этилган. Шеърлари турк, озарбайжон, ҳинд, инглиз, туркман тилларига таржима қилинган.
Шоиранинг ғазаллари, машрабона шеърлари, Алишер Навоий, Нодирабегим ва Увайсий ғазалларига боғлаган мухаммаслари, тўртликларида лирик кайфият, руҳиятдаги мураккаб кечинмалар ўзига хос бадиий талқин қилинган. “Туркон хотун билан уч баҳс” номли драматик достони буюк Хоразмшоҳлар давлатининг таназзулга юз тутиши сабабларининг янгича талқин этилгани билан эътиборга молик. 30 га яқин шеърлари куйга солиниб, халқимизнинг севимли қўшиқларига айланган.
ИККИНЧИ ҚАСАМ
(Ҳарбийнинг ўз аёлига айтганлари)
Мен Ватанни асрайман дедим,
Йигит бўлиб ичдим онт, қасам.
Аммо қасам ичмабман сенга,
Дурустроқ бир ўйлаб қарасам.
Сен ҳам мендай бедорсан тунлар,
Қуш тинса-да, билмайсан тиним.
Ўзингни ҳам ўйла, дейишга
Айланмабди бир бора тилим.
Йўл қарайсан юрак ҳовучлаб,
Омон кириб келсин деб мени.
Аммо нечун кўзингга қараб,
“Ҳаётимсан” демабман сени?
Тиз чўкаман сенинг пойингда
Ва энтикиб қасам ичаман.
Ватан учун агар жон чексам,
Сен учун ҳам ўздан кечаман!
Сенсан менинг жонимга қувват,
Ҳушёр тортди ногоҳ хаёлим.
Ичилмаган қасамлар ҳаққи,
Сен ўзингни асра, аёлим!
Қўлингдадир менинг бор мулким —
Отам, онам, болам ва орим.
Мен Ватанни асрагунча то
Сен уйимни асрагил, ёрим!
Уйим — менинг буюк Ватаним,
Томиримни уйғотган шоним.
Жоним ётар сенинг пойингда,
Остонамни асра, аёлим!
Асли мени ботир айлаган
Ҳимоячим, қорачиғимсан.
Дуо қилиб, икки кафтингда
Балолардан асрагувчимсан!
Қасам ичган эдим бир вақтлар,
Ватан учун вужудим ёниб.
Икки қаро кўзинг олдида
Бугун дилим ўртанди оғриб.
Иккинчи бор турдим қасамга:
Бир бошқача титради жоним.
Еру осмон кўзим ўнгида
Жамолингга ўхшади, ёрим.
Сен ёнимда бор бўлсанг агар,
Руҳим синмас, эгилмас бошим.
Сенинг билан бутунман, тикман —
Ватан каби азиз йўлдошим!
ВАТАН УЧУН, МИЛЛАТ УЧУН,
ШУ ХАЛҚ УЧУН!
Юртнинг шаънин кўтаргали ўғлон керак,
Шамолларга елка тутар тўғон керак,
Эл меники деган қадди осмон керак,
Ватан учун мудом кўкси қалқонларим,
Юрт тинчлиги учун бедор посбонларим!
Бахшидадур ҳаётингиз бир аҳд учун —
Ватан учун, миллат учун, шу халқ учун!
Сизга ёрдир Жалолиддин жасорати,
Соҳибқирон Амир Темур адолати,
Улуғбеклар, Берунийлар заковати,
Ватан учун мудом кўкси қалқонларим,
Юрт тинчлиги учун бедор посбонларим!
Яралгансиз дилда шиддат ҳам шаҳд учун —
Ватан учун, миллат учун, шу халқ учун!
Байроғини бермас асло элнинг марди,
Мардлар билан юксалгайдир юртнинг қадри,
Бўлмас элнинг хавотири, дилда дарди,
Ватан учун мудом кўкси қалқонларим,
Юрт тинчлиги учун бедор посбонларим!
Фидодирсиз олий неъмат ва бахт учун —
Ватан учун, миллат учун, шу халқ учун!
Ҳаётингиз бир қасамга тикилгандир,
Юрагингиз шу тупроққа экилгандир,
Ўзбекистон билан пайванд этилгандир,
Ватан учун мудом кўкси қалқонларим,
Юрт тинчлиги учун бедор посбонларим!
Омон бўлинг ўзбек деган ул нақд учун —
Ватан учун, миллат учун, шу халқ учун!