Shuhrat ORIPOV O'zbekiston Jurnalistlar uyushmasi raisi vazifasini bajaruvchi etib tayinlandi
Oripov Shuxratjon Orip o'g'li (Shuhrat Orif) O'zbekiston Jurnalistlar uyushmasi raisi vazifasini bajaruvchi etib ish boshladi. Bu qaror Jurnalistlar uyushmasi Boshqaruvining joriy yil 6 mart kuni bo'lib o'tgan yig'ilishida qabul qilindi.
Shuhrat Oripov mehnat faoliyatini 1999 yilda jurnalist sifatida boshlagan. U bir qancha matbuot nashrlarida, O'zbekiston televideniesida faoliyat yuritgan.
Keyinchalik davlat va jamoat tashkilotlarida (Respublika Ma'naviyat va ma'rifat markazida), shuningdek, siyosiy partiya (O'zLiDeP) tizimida axborot siyosati va matbuot xizmati yo'nalishlarida ishlagan. Tayinlovga qadar “Biznesni rivojlantirish banki” ATB Axborot xizmati rahbari sifatida faoliyat yuritib kelayotgan edi.
Ma'lumot uchun, Shuhrat Oripov — 1981 yili Farg'ona viloyatining Uchko'prik tumanida tug'ilgan.
O'zbekiston Milliy universiteti va O'zbekiston Respublikasi Prezidenti huzuridagi Davlat va jamiyat qurilishi akademiyasini tamomlagan.
Jamoatchilik bilan aloqalar va xalqaro munosabatlar bo'yicha magistr darajasiga ega.
Uning publitsistik maqolalari respublika nashrlarida doimiy chop etib kelinadi. Ijodiy asarlari turk, rus, ozarbayjon, qozoq, qirg'iz tillarida nashr etilgan.
O'zbekiston Respublikasi Prezidentining Farmoniga binoan “Shuhrat” medali hamda “Do'stlik” ordeni bilan taqdirlangan.