Davlat tibbiy sug'urtasi
Surxondaryo viloyatida bu tizimning ilk natijalari va istiqbollari
Sog'liqni saqlash tizimini takomillashtirish, ko'rsatilayotgan tibbiy xizmatlar sifatini oshirish va aholining tibbiy yordamdan foydalanish imkoniyatlarini kengaytirish bugungi kunda davlat siyosati darajasidagi ustuvor vazifalardan biridir. Keyingi yillarda sohada amalga oshirilayotgan keng qamrovli islohotlar zamirida inson qadrini ulug'lash va uning salomatligini ishonchli himoya qilish maqsadi mujassam.
Ana shunday muhim o'zgarishlardan biri bo'lgan Davlat tibbiy sug'urtasi tizimi mamlakatimizda bosqichma-bosqich joriy etilmoqda. Ushbu tizim tibbiy xizmatlarni moliyalashtirishning zamonaviy mexanizmlarini shakllantirish, tibbiyot muassasalari faoliyati samaradorligini oshirish hamda aholini kafolatlangan tibbiy xizmatlar bilan ta'minlashga qaratilgan. Joriy yildan boshlab Surxondaryo viloyatida ham mazkur tizimning to'liq yo'lga qo'yilishi sog'liqni saqlash sohasidagi islohotlarning navbatdagi muhim bosqichi bo'ldi.
Termiz shahrida Respublika Davlat tibbiy sug'urtasi jamg'armasining matbuot xizmati hamda O'zbekiston Jurnalistlar uyushmasi viloyat bo'limi hamkorligida o'tkazilgan anjumanda markaziy va mahalliy ommaviy axborot vositalari vakillari qatnashdi.
Tadbir davomida Davlat tibbiy sug'urtasi jamg'armasining matbuot va piar (PR) xizmati rahbari Sayyora Shoyeva mazkur tizimning mazmun-mohiyati, aholi salomatligini muhofaza qilishdagi o'rni va ahamiyati haqida batafsil ma'lumot berdi. Shuningdek, Davlat tibbiy sug'urtasi jamg'armasining viloyat bo'linmasi boshlig'i Boboxon Shukurov vohada mazkur tizimni joriy etish bo'yicha amalga oshirilayotgan ishlar, erishilgan natijalar va istiqboldagi vazifalarga to'xtaldi. Surxondaryo tibbiyot klasteri direktori Botir Mamasoatov esa tibbiyot muassasalarini davlat tibbiy sug'urtasi asosida moliyalashtirish mexanizmlari va bu boradagi amaliyot haqida o'z fikr-mulohazalarini bildirdi.
— Prezidentimizning Davlat tibbiy sug'urtasi mexanizmlarini joriy etishga oid qarori asosida shu yilning 1 aprelidan boshlab viloyatimizda ham mazkur tizim to'liq yo'lga qo'yildi, — dedi Davlat tibbiy sug'urtasi jamg'armasi viloyat bo'linmasi boshlig'i Boboxon Shukurov. — Bu nafaqat viloyat aholisi uchun, balki mamlakatimizda tibbiy xizmatlarni moliyalashtirishning yangi modelini shakllantirish yo'lidagi muhim qadam.
Davlat tibbiy sug'urtasi tizimining asosiy maqsadi har bir fuqaroga kafolatlangan tibbiy xizmatlarni taqdim etish, tibbiyot muassasalari faoliyatining samaradorligini oshirish va sohada shaffof moliyalashtirish mexanizmlarini joriy etishdan iborat. Yangi tartibga ko'ra, aholi birlamchi tibbiyot muassasalariga biriktiriladi hamda oilaviy shifokor orqali zarur tibbiy xizmatlardan foydalanadi. Bu esa bemorlarni davolash jarayonini tizimli tashkil etish va tibbiy xizmatlarni manzilli amalga oshirishni ta'minlash imkonini beradi.
Vohamizda bu borada salmoqli ishlar amalga oshirilmoqda. Bugungi kunda aholining qariyb 92 foizi “D-Med” elektron platformasiga biriktirilgan bo'lib, bu raqamlashtirish jarayonlarining izchil amalga oshirilayotganidan dalolat beradi. Shu bilan birga, Davlat tibbiy sug'urtasi jamg'armasi tomonidan yuzlab tibbiyot muassasalari bilan shartnomalar tuzilib, ularni moliyalashtirishning yangi mexanizmlari tatbiq etilmoqda.
Mutaxassislarning ta'kidlashicha, avvalgi tizimda tibbiyot muassasalari, asosan, davlat tomonidan ajratilgan byudjet mablag'lari doirasida faoliyat yuritgan bo'lsa, endilikda moliyalashtirish hajmi aholi soni va ko'rsatilgan tibbiy xizmatlar miqdori bilan bevosita bog'lanmoqda. Bu esa muassasalarni aholiga yanada sifatli va samarali xizmat ko'rsatishga undaydi.
Yangi tizimning aholi uchun yana bir muhim afzalligi dori ta'minoti sohasida namoyon bo'lmoqda. Reimbursatsiya dasturi orqali bir qator kasalliklar uchun zarur bo'lgan dori vositalarining bepul berilayotgani ijtimoiy himoyani kuchaytirishga xizmat qilyapti. Bu, ayniqsa, kam ta'minlangan va ehtiyojmand aholi qatlamlari uchun muhim ahamiyat kasb etmoqda.
Jurnalistlar va ijtimoiy tarmoq faollari ishtirokida tashkil etilgan mediatur davomida Termiz shahridagi qator tibbiyot muassasalari faoliyati bilan yaqindan tanishildi. Zamonaviy jihozlangan shifoxonalar, raqamlashtirilgan xizmatlar va bemorlarga yaratilgan sharoitlar davlat tibbiy sug'urtasi tizimining amaldagi ijobiy natijalari namoyishi bo'ldi.
E'tirof etish joizki, davlat tibbiy sug'urtasi tizimi sog'liqni saqlash sohasidagi islohotlarning eng muhim yo'nalishlaridan biri hisoblanadi. Uning to'liq va samarali ishlashi aholining sifatli tibbiy xizmatlardan foydalanish imkoniyatlarini yanada kengaytirib, tibbiyot muassasalari faoliyatini yangi bosqichga olib chiqishi shubhasiz.
Zero, inson salomatligi — jamiyat taraqqiyotining eng muhim omili hisoblanadi. Davlat tibbiy sug'urtasi tizimi esa ana shu ezgu maqsadga xizmat qiluvchi muhim faoliyat sifatida aholi farovonligi va mamlakat ravnaqiga munosib hissa qo'shadi.
O'zbekiston Jurnalistlar uyushmasi
Surxondaryo viloyati bo'limi.