“Madad”ga munosib mayor
Kichik Jomasho'y mahallasida yashovchi yoshi ulug', lekin qarovchisi yo'q cholu kampir huzuriga yaqinlari nogironligi bo'lgan o'rta yoshlardagi er-xotinni boshlab kelishdi. Ikki tomon rozi bo'lsa, yagona oila farzandlaridek birgalikda yashashlarini maslahat berishdi.
Niyat xolis ekan, oilaga fayz kirdi. Qora qozon har kuni qaynay boshlaganidan mahalla-ko'y ham xursand bo'ldi. “Bolali uy — bozor…” deganlaridek, kichkintoylarning shodligidan cholu kampirning ko'ngli tog'dek ko'tarilardi. Endi ular o'zlarini bir umrlik armonlari arigandek his etishardi.
Biroq oradan 11 yil o'tgach, bandalik ekan, cholu kampir birin-ketin qazo qildi. O'z farzandlaridek bo'lib qolgan er-xotin ularning marosimlarini risoladagidek o'tkazdi. Butun mahalla, marhumlarning qarindosh-urug'lari ularni duo qilishdi. Qolaversa, endi uyning chirog'ini yoqib turadigan egalari ham bor edi.
Oylar, yillar o'tdi. Mahalla fuqarolar yig'ini tomonidan uyni ularga meros qilib rasmiylashtirish bo'yicha tavsiya berildi. Marhumlarning yaqinlari ham bunga rozi edi. Lekin buning huquqiy asosi yo'qligi sababli sudga murojaat etishdi. Sudga murojaat qilish uchun esa davlat boji to'lash kerak, ammo mablag' yo'q. Er-xotin bola-chaqasi bilan bir amallab kun kechirayotgan bo'lsa…
Oqsoqollar ushbu muammo bo'yicha aholiga bepul yuridik xizmat ko'rsatish bilan shug'ullanuvchi “Madad” NNTning tuman bo'limi mutaxassisi, mayor Olimjon Mingboyevga murojaat qilishdi. U oliy ma'lumotli huquqshunos bo'lib, qariyb 20 yil davomida huquqni muhofaza qilish idoralarida turli vazifalarda ishlagani va yetarli tajribaga ega bo'lgani bois masala ijobiy hal etiladigan bo'ldi.
Mingbuloq tumani hokimi Ahrorbek Mansurov fuqarolarning murojaatlari bilan ishlashga bag'ishlangan faollar yig'ilishida ana shu kabi misollarning bir nechtasi haqida batafsil gapirib o'tdi. Masalan, yosh o'g'li yuqori kuchlanishli podstansiya hududiga nogahon kirib qolib, tok urishi oqibatida sog'lig'ini yo'qotganidan so'ng sudda aybdorlarga yetarli jazo qo'llanilmagani hamda Jomasho'y shaharchasida ko'p yillardan buyon qarovsiz turib qolgan yirik bir ob'yektning egaligini tiklash borasidagi murojaatlarga ham yechim topa olgani tahsinga loyiq.
Aytgancha, “Madad” NNT — aholiga bepul huquqiy yordam ko'rsatishga ixtisoslashgan nodavlat notijorat tashkilotidir. U O'zbekiston Respublikasi Adliya vazirligi tashabbusi bilan tashkil etilgan. Tashkilotning asosiy maqsadi fuqarolarning huquqiy savodxonligini oshirish va ularga birlamchi yuridik yordam ko'rsatishdan iborat.
Olimjon Mingboyev bu vazifaga bejiz tayinlanmagan ekan. U jonkuyar, fidoyi, kamchiliklarga murosasiz, muammoga duch kelgan insonlarga bajonidil ko'maklashadigan vatanparvar mutaxassis sifatida e'tirof etilmoqda. U faoliyat boshlagan 2025 yildan buyon har oyda o'rtacha 25-30 nafar madadtalab fuqaroning mushkulini oson qilmoqda. Hozirga qadar “Madad” NNTning hududiy bo'linmasi orqali qariyb 500 nafar fuqaro mehnat, oila, meros, uy-joy, ijtimoiy ta'minot va boshqa huquqiy masalalar bo'yicha amaliy yordam yoki bepul maslahat olgani fikrimiz tasdig'idir. Bu bilan qanchadan-qancha insonlar yillab azoblab kelayotgan g'am-tashvishlardan xalos bo'lishdi, oilalarga rizq-baraka kirdi, farzandlar barcha imtiyoz va imkoniyatlardan emin-erkin foydalana boshlashdi, demakdir.
— “Madad” faoliyat boshlagach, ishimiz avvalgiga nisbatan qariyb 30 foizga qisqardi, — deydi tuman adliya bo'limi boshlig'i Akmaljon Qodirov. — Olimjon bu savobli vazifani vijdonan bajarmoqda. Aholiga bepul huquqiy maslahatlar berish, fuqarolarning murojaatlarini huquqiy jihatdan o'rganish va tegishlicha yo'naltirish, huquqiy axborot berish va tushuntirish ishlarini olib borish, huquqiy madaniyat hamda huquqiy ongni yuksaltirishga ko'maklashish, yuzma-yuz maslahatlar tashkil etish, Advice.uz huquqiy portali faoliyatini qo'llab-quvvatlash va rivojlantirish borasidagi ishlari, ayniqsa, salmoqlidir.
Qisqacha aytganda, mayor Olimjon Mingboyev mustaqillik sharofati hamda mamlakatimiz rahbarining qo'llab-quvvatlovi bilan oyoqqa turayotgan respublikamizdagi mazkur nodavlat notijorat tashkilotida faoliyat yuritayotgan 250 nafar huquqshunosdan biridir. U o'z faoliyatini yanada takomillashtirish, el tashvishiga sherik, odamlar dardiga malham bo'lishdek sa'y-harakatda yonib-kuyib ishlamoqda. Zero, huquqiy ko'mak tizimi mustahkam yaratilgan, fuqarolarning huquq va manfaatlarini himoya qilish risoladagidek tashkil etilgan joyda jamiyat taraqqiy topadi, yurt obod, xalqning dasturxoni to'kin bo'ladi.
Qosimjon AKBAROV,
“Mingbuloq” gazetasi muharriri,
O'zbekiston Jurnalistlar
uyushmasi a'zosi.