Шогирдлик ҳам саодат
“Hurriyat” газетасининг 2026 йил 15 апрелдаги сонида чоп этилган “Устозлик саодати” сарлавҳали мақолани мутолаа қилар эканман, қалби илм ва зиё билан йўғрилган инсоннинг ибратли ҳаёт йўли кўз олдимда гавдаланди. Муаллиф она шаҳрим Гулистонга бориб, таниқли тилшунос олим Жуманазар Абдуллаевнинг юбилейига бағишланган ушбу очеркни маҳорат билан қаламга олган. Мақолани ўқиб, жуда таъсирландим.
Ҳақиқий устозлик саодати нафақат илмий унвонларда, балки шогирдлар қалбига йўл топа олиш ва эл-юрт меҳрини қозонишда экан. Жуманазар Абдуллаевнинг ҳаёт йўли мен учун фидойилик ва камтарлик тимсолидир. Очеркда олимнинг, айниқса, қуйидаги хислатлари мени мафтун этди:
Илмга бахшида умр: олим Сирдарё илмий муҳитини ривожлантиришга улкан ҳисса қўшиб келмоқда ва кўп йиллардан буён Гулистон давлат университетида самарали меҳнат қилмоқда.
Чин инсонийлик: у нафақат кучли тилшунос, балки маҳалла-кўйда ҳамма билан бирдек самимий суҳбатлашадиган, болажон ва очиқ кўнгил инсондир.
Меҳрибон устоз: у шогирдларига фақат билим бериб қолмай, уларнинг шахс сифатида шаклланишига ҳам оталарча ғамхўрлик қилиб келади.
Ибратли оила бошлиғи: турмуш ўртоғи Розия опа билан беш фарзандни камолга етказиб, оилада чинакам бахт ва аҳиллик муҳитини яратган.
Ҳа, ҳеч бир муболағасиз, ушбу очерк менга ҳақиқий зиёли инсон қандай бўлиши кераклигини яна бир бор англатди. Жуманазар Абдуллаев каби фидойи зотлар бор экан, юртимизнинг илмий ва маънавий салоҳияти янада юксалаверади.
Устозимизга узоқ умр ва сиҳат-саломатлик тилаган ҳолда, уларнинг илм йўлидаги изланишлари биз, ёшлар учун доимо ибрат мактаби бўлиб хизмат қилишига шубҳа йўқ. Зеро, олимнинг бой илмий мероси ва сермазмун ҳаёт йўли келажак авлодлар учун бебаҳо маънавий хазина бўлиб қолади. Қолаверса, шундай устозларга шогирд бўлмоқнинг ўзи ҳам катта саодатдир.
Шоҳсанам ЮСУПОВА,
Ўзбекистон журналистика ва оммавий
коммуникациялар университети талабаси.