Sizning ismingizni aytar turnalar…
Shuhrat Orif
Farg'ona viloyatining Uchko'prik tumanida tug'ilgan.
O'zbekiston Milliy universiteti jurnalistika fakultetining bakalavr (2003) va magistratura (2007) bosqichlarini tamomlagan. 2007-2008 yillarda O'zbekiston Respublikasi Prezidenti huzuridagi Davlat va jamiyat qurilishi akademiyasi (hozirgi O'zbekiston Respublikasi Prezidenti huzuridagi Davlat boshqaruvi akademiyasi)da tahsil olgan. 1999 yildan turli respublika davlat va jamoat tashkilotlarida, ommaviy axborot vositalarida faoliyat yuritib keladi.
Ayni vaqtda aksiyadorlik tijorat “Qishloq qurilish bank” boshqaruvi raisi maslahatchisi vazifasida mehnat qiladi.
“Shuhrat” medali sohibi. O'zbekiston Yozuvchilar uyushmasi a'zosi.
Kuz
Mendek zerikkanga o'xshaydi kuzak,
Musicha singari og'ir xo'rsinar.
Sochlari ko'zimga bog'langan Nargiz,
Sarg'aygan bog'imiz kelib ko'rsinlar.
Xazonlar – oshiqlar qabristoniga,
Umidini ko'mib, qaytar turnalar.
Samoda yuragim suratin chizib,
Sizning ismingizni aytar turnalar…
Bizni bu bekatda hech kim tanimas,
Hayot — men ko'rishni istamagan tush.
Bilaman qaydadir turibsiz ilhaq —
Sochingiz yelkandek yoyib faromush.
Kimnidir, nenidir kutdim ishonib,
Osmonga termulib o'tdim terakday.
Xazon bo'lib hamki ketolmayapman,
Go'yoki haliyam sizga kerakday…
Yaproqdek omonat tebranadi dil,
Tamaki tutatar yana g'olib kuz.
Dunyoni bir go'zal rangga bo'yardim,
Afsus, sizdan oldin kuz keldi, afsus…
Maylimi
Bir maqom istayman, bir maqom–
Odamlikning chiqdi siyqasi.
Shu dardisar niqobni yechsam,
Yor visoli bo'lur munosib?!
Bir maqom istayman, bir maqom –
Ko'z yosh bo'lsam va yo bo'lsam may.
Yig'lasam samoviy rutbada,
Jilmaysam ko'rinsam Yerlikday…
Bir maqom istayman, bir maqom –
Qismatimga kulgim keladi.
Qachondir qaydadir negadir,
Men sizga termulgim keladi.
Yarashibdi sizga bu dunyo,
Qutlug' bo'lsin maqomingiz ham.
Bir maqom istayman, maylimi,
Ozgina o'zimga o'xshasam…
Manzara
Yaproqlar shivirlar — savollari ko'p,
Yaproqlar shitirlar — tili kesilgan.
Daraxtlar tazarru onini anglab,
Ko'ylagini yechib joynamoz qilgan…
Kimdir kelishini kutar o'rindiq,
Go'yo nimanidir kelgan fursati.
Tangri bandasini buncha sevmasa —
Vido borligini qo'yar ko'rsatib…
Ko'kka sovurildi yana bir imkon…
Sokin talvasada titraydi olam.
Yig'ilar oralab xirgoyi qilib,
Xalloslab bozorga ketmoqda odam…
* * *
Ichimda adashgan bir qayiq,
Suvsiz sohillarda qalqiydi.
Ichimda qanotsiz bir burgut,
Tirnog'iga qarab chalg'iydi…
Ichimda — orzular bekorchi,
Xayollar xijolatdan kular.
Qo'llaridan tutib dunyoni,
Varrakdek uchirar tuyg'ular.
Ichimda — zamonlar g'udranar,
Pirlarim kalishda turibdi.
Yoniga kelolmay asrlar,
Ishtonchan yugurib yuribdi…
Ichimda – ko'zlarim ko'rinar,
Qo'llarim o'kinmas kir chayib.
Soatni ko'rsatib boshimda,
Qismatim turmaydi irshayib…
Ichimda siz – juda baxtlisiz,
Hur bo'lib kutarsiz, azizim!
Men esa… eshikni topolmay,
Derazadan termulaman jim…
Ichimda abadiy hadik bor —
Tangri quvg'in qilgan olamman.
Hech kimman va yo'qman dunyoda,
Ichimda… Odamman, Odamman!
Umid bor…
Lahzalar o'mbaloq oshadi,
Tushlarim qiladi masxara.
Yuragim bormoqda kichrayib,
Ulkanlashar ming yillik yara.
Men borman, demak, siz — mavjudsiz,
Ko'nglimda tugmadek umid bor.
Ko'zlari dunyodek qop-qora,
Yuzlari dunyodek yorug' yor!
Tomirda suzadi xavotir,
Hammadek yashamoq — ma'nisiz.
O'ttiz yetti kuzni kuzatdim,
Qanisiz, qanisiz, qanisiz?
Dunyoni horitdim titkilab,
Hamma cho'ntagida bor izim.
Qo'llarim — Xitoyning devori,
Ko'zlarim — O'rta Yer dengizi…
Bormisiz-yo'qmisiz bilmayman,
Lekin men, shubhasiz, bor edim.
G'alati ekanim — tabiiy,
Men asli odammas, yor edim…