Qo'shimcha 31,7 ming bola qamrab olinadi
Maktabgacha ta'lim vazirligi tashabbusi bilan Prezidentimizning 2020 yil 30 yanvardagi “Maktabgacha ta'lim sohasida davlat-xususiy sheriklikni yanada rivojlantirish chora-tadbirlari to'g'risida”gi qarori ijrosiga bag'ishlangan matbuot anjumani bo'lib o'tdi.
Tadbirda vazirlik tomonidan shu kungacha nodavlat maktabgacha ta'lim tashkilotlarini (MTT) tashkil etish uchun 1412 ta bitimlar imzolangan bo'lsa, shundan 992 ta loyihaga 1 732 milliard so'mlik imtiyozli kreditlar ajratildi. Joriy yilning 1 yanvar holatiga ko'ra, 6084 oilaviy shakldagi MTT ham o'z faoliyatini boshlaganligi ma'lum qilindi.
— Hozirgi kunda 300 ta MTTlarda qurilish-jihozlash ishlari olib borilmoqda, — deydi Maktabgacha ta'lim vaziri o'rinbosari Maqsudjon Yuldoshev. — Natijada qo'shimcha 31,7 ming bola qamrab olinishi rejalashtirilgan.
Davlatimiz tomonidan tadbirkorlarga qulay imkoniyatlar yaratilgan, xususan, aynan shu sohada faoliyat olib borayotgan tadbirkorlar 10 yilgacha soliqlardan ozod etilgan bo'lib, MTTlarda sarflanayotgan elektr energiya va gaz xarajatlarining 50 foizi davlat tomonidan qoplanadi. O'tgan yilda davlat-xususiy sheriklikni yanada rivojlantirish maqsadida O'zbekiston Respublikasi Tiklanish va taraqqiyot jamg'armasi hamda halqaro moliya institutlaridan 200,0 million AQSh dollari miqdoridagi kredit mablag'i jalb qilindi.
Nargiza Bobomurodova,
“Hurriyat” muxbiri.