Odamlar qalbidagi orzu-umidlar

Yangilanayotgan O'zbekiston! Qalblarni uyg'oqlikka chorlovchi jarangdor bu so'zlar mohiyatida mamlakatimizning har bir hududini — chekka va olis qishloqlarini ham qamrab olgan islohotlar jarayoni, keng bunyodkorlik ishlari, odamlar turmush tarzining ijobiy tomonga o'zgarib borayotgani mujassam.

Bunday jarayonlarga jurnalist — ijodkor ko'zi bilan sinchkov nazar solinganda esa odamlar qalbidagi orzu-umidlar ro'yobi ham oydinlikka qalqib chiqadi. Bu albatta, jurnalistni islohotlar jarayonini ro'y-rost, bo'y-basti bilan boricha yoritishga undaydi.

O'zbekiston Jurnalistlari ijodiy uyushmasi tashabbusi bilan “Jurnalist va hayot” loyihasi doirasida hududlarda amalga oshirilayotgan press-tur tadbirlari bu borada muhim ahamiyat kasb etmoqda.

Bu galgi press-tur mamlakatimiz madhiyasi qabul qilinganligining 28 yilligi munosabati bilan Navoiy viloyati hokimligi hamkorligida tashkil etildi. “Nurli jol”, “Ovozi tojik”, “Hurriyat”, “O'zbekiston ovozi”, “XXI asr”, “Adolat”, “Jamiyat”, “Xabar.uz”, “O'zbekiston-24”, “Sevimli”, “Mening yurtim” kabi markaziy OAV, shuningdek, mahalliy gazeta va televidenie vakillari shu yilning 10-11 dekabr kunlari Navoiy va G'ozg'on shaharlarida bo'lib, bu hududlarda amalga oshirilayotgan yangi loyihalar bilan tanishish imkoniga ega bo'ldi.

Dastlab ishtirokchilar Navoiy shahridagi “Baht-Textile” mas'uliyati cheklangan jamiyat faoliyati bilan tanishishdi. Mazkur korxona 2006 yilda tashkil etilgan bo'lib, bugungi kunda viloyatdagi paxtachilik bo'yicha yirik klaster sub'yekti sanaladi. 1300 nafardan ziyod ishchi-xodim mehnat qilayotgan korxonada Shveysariyaning ilg'or yetakchi yengil sanoat dastgohlari ishlab chiqaruvchi “RIETER” kompaniyasining ip yigiruv dastgohlari o'rnatilgan. 2019 yilda jamiyatning ishlab chiqarish quvvati yiliga 27000 tonna kalava-ip tayyorlashga yetkazildi. Korxona Navoiy viloyatida yetishtirilayotgan paxta tolasining 70 foizini qayta ishlab, yarim tayyor hamda tayyor mahsulotlarni bozorga olib chiqmoqda.

Press-tur ishtirokchilari ishlab chiqarish jarayonlari bilan tanishar ekan, korxona ishchi-xodimlari bilan muloqot jarayonida ular uchun yaratilgan qulayliklarni ko'zdan kechirishdi. Ma'lumki, Navoiy viloyati faqatgina sanoatlashgan hudud bo'lib qolmay, balki keyingi yillarda ijtimoiy soha, xususan, ta'lim tizimida ham qator ijobiy natijalar qo'lga kiritilayapti.

Jumladan, O'zbekiston Respublikasi Xalq ta'limi vazirligining “REYTING-2019” natijalari bo'yicha Davlat test markazi tahlillariga ko'ra, o'quvchilarning oliy ta'limga kirish ko'rsatkichlari bo'yicha viloyat respublikada 2-o'rin, Navoiy shahri esa 1-o'rinni egalladi.

OAV vakillari Navoiy shahridagi Navoiy-Qorako'l ixtisoslashtirilgan maktab faoliyati bilan ham tanishishdi. Matematika, fizika va ingliz tili fanlariga ixtisoslashtirilgan 360 o'rinli mazkur maktab internati joriy o'quv yilidan ish boshladi. Maktab-internatiga o'quvchilarni saralab olish jarayonlari 5 bosqichda amalga oshirildi. Shuningdek, maktab-internatni mukammal ta'mirlashga 2,8 milliard mablag' sarflangan bo'lsa, 1,7 milliard so'm mablag' evaziga zamonaviy moddiy-texnika bazasi bilan to'liq jihozlandi.

— Navoiy viloyati sanoat sohasi bilan birga respublikada ta'lim borasida ham yetakchi o'rinni egallab kelayotgani bizni quvontirdi, — deydi tadbir ishtirokchisi, taniqli shoira Zulfiya Mo'minova. — Bu albatta, Alisher Navoiy bobomiz nomi bilan ataluvchi hududda ulug' nomga munosib avlodlar tarbiyalanayotganidan darak beradi.

Press-tur ishtirokchilari Navoiy shahrida qad rostlab, mustaqilligimizning 29 yilligi bayrami arafasida foydalanishga topshirilgan Markaziy Osiyoda yagona hisoblangan megako'prikni ham borib ko'rishdi. Yer usti ko'prigida piyodalar uchun yaratilgan shart-sharoitlar tadbir ishtirokchilarining e'tiborini tortdi.

Shu kunning o'zida Navoiy shahridagi to'rt yulduzli, yaqinda foydalanishga topshirilgan “Tinchlik plaza” mehmonxonasida media-tur doirasida “Zamonaviy professional jurnalistikani rivojlantirish: muammo va yechimlar” mavzuida davra suhbati o'tkazildi. Tadbirda O'zbekiston Jurnalistlari ijodiy uyushmasi raisi o'rinbosari Xolmurod Salimov bugungi kunda professional jurnalistikani rivojlantirish yanada muhim, dolzarb ahamiyat kasb etayotganini, bu boradagi muammolar va ularning yechimlari borasida o'z fikr-mulohazalarini bildirdi.

Davra suhbatida ta'kidlanganidek, yosh, yetuk jurnalistlarni tayyorlash, ularning bilim va mahoratini oshirish uchun hali keng ko'lamli ishlarni amalga oshirish lozim. “Ustoz-shogird” an'anasini rivojlantirish, soha uchun kadrlar yetkazib beruvchi oliy o'quv yurtlarida ta'lim olayotgan yigit-qizlarni amaliyotga ko'proq jalb etish, qiziqishini oshirish, ularni munosib rag'batlantirib borish professional jurnalistlarni voyaga yetkazishda alohida ahamiyat kasb etadi.

Davra suhbati davomida bir qator amaliy takliflar ham bildirildi. Masalan, bosma matbuotni amalda qo'llab-quvvatlash, matbuot kotiblari faoliyatini jonlantirish, professional jurnalistikani qo'llab-quvvatlashda o'zaro hamkorlikni kuchaytirish masalalari aytib o'tildi.

Konferensiya doirasida bir guruh navoiylik faol jurnalistlarga O'zbekiston Jurnalistlari ijodiy uyushmasining faxriy yorliq va esdalik sovg'alari topshirildi.

Shundan so'ng, Uyushmaning Navoiy viloyati bo'limi tomonidan nashrga tayyorlanib, O'zbekiston Respublikasi mustaqilligining 30 yilligiga bag'ishlanib chop etilgan “Bunyodkorlik simfoniyasi” kitobining taqdimoti ham o'tkazildi. Mazkur kitobda Navoiy viloyatida amalga oshirilayotgan bunyodkorlik ishlari xususida so'z yuritiladi.

Mediaturning ikkinchi kuni Yangi O'zbekistonning yangi shahri — G'ozg'onda va Nurota tumanida davom etdi. G'ozg'on shahri O'zbekiston Respublikasi Prezidenti Shavkat Mirziyoyevning taklifi bilan rasman 2019 yilning 3 may kuni tashkil topgan. Maydoni 59,4 ming gektarni, aholisi esa 8,4 ming kishidan iborat. Ushbu hudud Markaziy Osiyodagi pardozbop toshlar, xususan, granit va marmar yirik zaxiralariga ega eng boy hudud sanaladi.

G'ozg'on shahrida amalga oshirilayotgan loyihalar O'zbekiston Respublikasi Vazirlar Mahkamasining “2019-2020 yillarda Navoiy viloyatining G'ozg'on shahrini kompleks rivojlantirish chora-tadbirlari to'g'risida”gi qarori doirasida amalga oshirilmoqda. Mazkur qaror ijrosi yuzasidan qisqa davrda jami 218 milliard 299 million so'mlik ishlar amalga oshirilishi ko'zda tutilgan.

Press-tur ishtirokchilari hududdagi eng yirik korxona —   “Marmarobod” klaster korxonasining faoliyati bilan yaqindan tanishib, ishlab chiqarilayotgan mahsulotlar sifatini va jarayonlarini ko'zdan kechirishdi. Hozirgi kunda “Marmarobod” klaster korxonasiga tegishli 2 ta karyerda yangi uskunalarda granit toshlarni zamonaviy usullarda qazish ishlari olib borilmoqda. Bugungi kunda korxonada 400 nafar mahalliy yoshlar uch smenada ish olib bormoqda.

Shuningdek, ommaviy axborot vositalari vakillari Nurota tumanida amalga oshirilayotgan loyihalar, xususan, “Chashma” me'moriy majmuasida olib borilayotgan beqiyos bunyodkorlik jarayonlarini ko'zdan kechirdi. Mazkur hududda davlatimiz Rahbari tashabbuslari bilan amalga oshirilayotgan keng ko'lamli obodonchilik ishlari ishtirokchilarda katta qiziqish uyg'otdi.

Tadbir davomida ishtirokchilar Navbahor tumanidagi “Navbahor kasaba chevarlari” MChJ faoliyati bilan ham tanishtirildi. Navbahor tumanining “Qalqonota” mahallasida tashkil etilgan mazkur zamonaviy tikuvchilik fabrikasida 100 nafardan ziyod xotin-qizlar faoliyat yuritmoqda. Joylardagi islohotlarning samarasini mana shu korxonada faoliyat olib borayotgan ishchi-xodimlarning dilidagi mamnunlikdan ham bilsa bo'ladi.

— Men shu tumanning “Toshrabot” mahallasida yashayman, — deydi tikuvchi Madina Abduqahhorova. — Joriy yilning noyabr oyidan ish boshladim. Unga qadar 3 oy o'quv kurslarida malaka oshirdik. Bu davrda bizlar uchun stipendiya ham to'landi. Fabrikadagi shart-sharoitlar bizni behad quvontiradi.

— Oddiy odamlarning dilidagi xursandchilik joylarda hayot sifati o'zgarayotganidan dalolat beradi, — deydi siyosiy sharhlovchi Sharofiddin To'laganov. — Biz, Navoiy viloyatida ana shunday o'zgarishlar bir necha barobar yuqori saviyada amalga oshirilayotganligini ko'rib, guvohi bo'ldik. Nafaqat yangi-yangi korxonalar va boshqa ob'yektlar misolida, balki odamlarning kayfiyatidan ham buni his qildik.

Press-tur yakunida jurnalistlar hamda viloyat hokimi Q.Tursunov o'rtasida samimiy suhbat bo'lib o'tdi. Unda viloyat hokimi yana bir bor viloyatda amalga oshirilgan ishlar xususida qisqacha to'xtalib, poytaxtdan kelgan mehmonlarning taassurotlari bilan o'rtoqlashdi.

Anjuman ishtirokchilari viloyatdagi o'zgarishlarni alohida to'lqinlanib ta'kidlashar ekan, viloyatda iqtisodiyot bilan birga ma'naviy-ma'rifiy soha hamohang yuksalib borayotganligiga urg'u berib o'tishdi.

Shuning bilan O'zbekiston Jurnalistlari ijodiy uyushmasi hamda Navoiy viloyati hokimligi hamkorligida viloyatda o'tkazilgan press-tur o'z nihoyasiga yetdi.

Eng e'tiborlisi, Navoiy viloyatida tashkil etilgan ikki kunlik mazkur tadbir jurnalistlar uchun viloyatning bugungi hayotida yuz berayotgan o'zgarishlar bilan yaqindan tanishish imkoniyatini yaratdi.

Otabek ASLONOV,

O'zbekiston Jurnalistlari ijodiy uyushmasi

Navoiy viloyati bo'limi raisi