Matbuotimiz darg'alaridan edi
Taniqli publitsist va noshir, O'zbekistonda xizmat ko'rsatgan madaniyat xodimi, “El-yurt hurmati” ordeni hamda “Jasorat” medali sohibi Ziyod Islomovich Yesenbayevning O'zbekiston jurnalistikasi rivojiga qo'shgan hissasini ko'pchilik yaxshi biladi.
U fayzli umri davomida tuman, viloyat va respublika markaziy gazeta va jurnallarida samarali faoliyat ko'rsatgan. Qariyb yigirma yil O'zbekiston Davlat matbuot qo'mitasi va O'zbekiston Jurnalistlari ijodiy uyushmasini boshqargan. O'zbekiston Respublikasi ommaviy axborot vositalari faoliyatini qo'llab-quvvatlovchi jamg'arma boshqaruvi raisi lavozimida hamda “O'zbekiston matbuoti” jurnali bosh muharriri sifatida o'z mahorati va bilimini namoyon etgan edi.
Ziyod Yesenbayev mustaqil O'zbekiston jurnalistikasi rivoji va yosh mutaxassislarni tarbiyalashga munosib hissa qo'shgan ustoz hamdir.
Joriy yil 21 iyun kuni davlat va jamoat arbobi Ziyod Yesenbayev tavalludiga 100 yil to'ldi. Shu munosabat bilan O'zbekiston Jurnalistlari ijodiy uyushmasi tomonidan ustoz jurnalist xotirasiga bag'ishlangan tadbir o'tkazildi.
O'zbekiston Jurnalistlari ijodiy uyushmasi vakillari, Z.Esenbayevni yaqindan bilgan, o'z davrida u kishi bilan birga ishlashga muyassar bo'lgan O'zbekiston Jurnalistlari ijodiy uyushmasi “Faxriylar kengashi” raisi Jabbor Razzoqov, faxriy noshir Botir Diyorov, taniqli jurnalist va adib Ne'mat Yoqubov, ustoz jurnalistlar O'tkir Zokirov, Hamid Sultonov, Solih Yoqubov, Irismat Abduxoliqov va boshqalar avval “Minor” qabristoniga borib, ustoz qabrini ziyorat qilishdi. So'ngra, Z.Esenbayev xonadoniga tashrif buyurib, uning oilasi, yaqinlari davrasida ustozni xotirladilar.
Ustoz jurnalistning ibratli hayot yo'li, ezgu fazilatlari yodga olindi.
— Ziyod Islomovichni 1965 yili birinchi bor taniganman, — dedi taniqli jurnalist Jabbor Razzoqov. — O'z davrida yurtimizdagi nashriyotlar, bosmaxonalar, gazetalar faoliyatini yo'lga qo'yishda bosh-qosh bo'lganlar.
— Otamizni bilganlar har doim yaxshi xotiralar bilan eslaydi, — dedi ustozning o'g'li Sherzod Yesenbayev. — U Ikkinchi jahon urushining boshidan oxiriga qadar frontda mardonavor kurashgan. Noshirlik, matbaa, jurnalistika rivojiga katta hissa qo'shgan otamizning porloq xotirasi yodga olinib, hurmat-ehtirom ko'rsatilgani uchun minnatdorlik bildiramiz.
O'zbekiston Jurnalistlari ijodiy uyushmasi raisi Olimjon O'sarov ustoz Ziyod Yesenbayev yod etilgan kechada ta'kidlaganidek, bunday tadbirlar yosh jurnalistlarni matbuotimizning shonli tarixi, o'sha vaqtlardagi o'ta murakkab og'ir sharoitlarda, turli to'siqlarni yengib, mardonavor faoliyat olib borgan fidoyi darg'alar hayoti va ijodiy faoliyati bilan tanishtirishda muhim o'rin tutadi hamda ularga ibrat maktabi bo'lib xizmat qiladi.
Islom ASILBEKOV,
O'zbekiston Jurnalistlari
ijodiy uyushmasi mutaxassisi