Tajriba va mahorat maktabi
Yangi zamon o'zbek milliy jurnalistikasi, milliy matbuoti, uning jonkuyar xodimlari oldiga sharafli va mas'uliyatli vazifalarni qo'ymoqda. O'zbekiston OAV rivojida eng so'nggi rusumdagi kompyuter texnologiyalaridan, axborot kommunikatsiya vositalaridan unumli foydalanish bilan birga, jahon matbuotining ilg'or tajribalarini o'zlashtirib faoliyatimizga tatbiq qilishimiz lozim.
O'zbekiston Jurnalistlari ijodiy uyushmasi Surxondaryo viloyati bo'limi jamoasi ana shunday mas'uliyatni his etgan holda faoliyat yuritib qilmoqda. Uyushmaning Termiz shahridagi “Matbuot uyi”da joylashgan viloyat bo'limi hamisha jurnalistlar, sohaga havasmand talabalar, maktab o'quvchilari bilan gavjum bo'ladi. Bu dargohda kitobxonlikni keng targ'ib qilish uchun ma'naviyat burchagi tashkil qilingan. Unda o'zbek xalq dostonlari, milliy va jahon adabiyoti durdonalari, jurnalistikaga oid nazariy hamda amaliy qo'llanmalar joy olgan.
Uyushmaning viloyat bo'limi hamkor tashkilotlar bilan media-turlar, matbuot anjumanlari, seminar-treninglar o'tkazib kelmoqda. Jumladan, bo'lim o'tgan yilgi og'ir pandemiya sharoitida muntazam ravishda trening, seminar va matbuot anjumanlarini onlayn tarzda amalga oshirdi. Viloyatdagi tuman, shahar hokimliklari, boshqarma va tashkilotlarning axborot xizmati rahbarlari uchun ikki kunlik onlayn o'quv-seminari tashkil etilganini ham ta'kidlash lozim.
O'tgan yili uyushmaning viloyat bo'limi Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qo'llab-quvvatlash Jamoat fondining “Milliy va umuminsoniy qadriyatlarni yoshlar ongiga singdirishga, etnik madaniy an'analarni asrab-avaylashga, xalq ijodiyotini qo'llab-quvvatlashga ko'maklashish” yo'nalishida “Surxondaryo — qadriyatlar beshigi” loyihasi bilan 30 million so'mlik davlat grantini qo'lga kiritdi. Ushbu loyiha asosida muhim tadbirlar amalga oshirildi. Jumladan, “Surxondaryo — qadriyatlar beshigi” nomli kitob chop etildi. Karantin vaqtida Termiz, Angor, Muzrabot, Sherobod, Qiziriq, Jarqo'rg'on, Qumqo'rg'on, Sho'rchi tuman kutubxona markazlariga loyiha doirasida chop qilingan kitoblar taqdim qilindi.
Jurnalistlar, blogerlar va fotomuxbirlar uchun ijodiy tanlov e'lon qilindi. O'tgan yil Matbuot va ommaviy axborot vositalari xodimlari kuni munosabati bilan g'oliblar Termiz shahridagi “Matbuot uyi”da tantanali taqdirlandi. Shuningdek, USAID moliyaviy ko'magi asosida Jurnalistlarni qayta tayyorlash xalqaro markazi trenerlari Karim Bahriyev va O'zDJTU dotsenti Nargis Qosimovalar bilan hakorlikda “O'zbekiston sud-huquq tizimining islohoti: OAVda yoritish” mavzuida jurnalistlar va blogerlar uchun ikki kunlik seminar tashkil etildi. Termiz shahridagi “Meridian” mehmonxonasida “YuNISEF”, Jurnalistlarni qayta tayyorlash markazi, Sog'liqni saqlash vazirligi Sanitariya-epidemiologik osoyishtalik va jamoat salomatligi xizmati hamda uyushma viloyat bo'limi hamkorligida “COVID-19”ga qarshi emlash jarayonlari, mavzuni yoritishda jurnalist va blogerlar ishtiroki” borasida seminar-trening o'tkazildi. Yuqoridagi tashkilotlar va uyushma hamkorligida “Bola sog'ligi, xususan, immunizatsiya masalalarini OAVda yoritish”, “O'zbekistonda korrupsiyaga qarshi kurashishda ommaviy axborot vositalarining rolini kuchaytirish” mavzularida ham seminar-treninglar o'tkazilgani voha jurnalistlariga bo'lgan e'tiborning yana bir namunasidir.
Uyushmaning viloyat bo'limi tomonidan doimiy ravishda vohadagi keksa jurnalistlar holidan xabar olinmoqda. Yaqinda uyushma viloyat bo'limi raisi Muhiddin Abdurahmonov qisqa umri davomida xalq nazariga tushgan, viloyat teleradiokompaniyasi, “Milliy tiklanish”, “Surxon tongi” gazetasida faoliyat olib borgan, 39 yoshida vafot etgan Bahrom Normurodovning oila a'zolaridan hol-ahvol so'rab, moddiy ko'mak berdi. Shu kuni faxriy jurnalist Usmonali Normatov xonadonida ham bo'lib, uyushma tomonidan ajratilgan mablag' evaziga zarur oziq-ovqat mahsulotlarini tuhfa qildi.
Shuni aytish kerakki, uyushma xodimlari o'zining iqtidori, tajribasi va tashabbusi bilan ham hamkasblariga o'rnak bo'lib kelmoqda. Jumladan, 2020 yil fevral oyida uyushmaning viloyat bo'limi mutaxassisi Mastura Hamroyeva Latviya davlatiga YuNESKOning Toshkentdagi vakolatxonasi va Baltika jurnalistik tadqiqot markazi tomonidan “O'zbekiston ommaviy axborot vositalarining jamoatchilik manfaatlariga xizmat qilish imkoniyatlarini oshirish” loyihasi doirasida media-turda ishtirok etib keldi. U Riga shahridagi “STOCKHOLM” biznes maktabida data jurnalistika bo'yicha malaka oshirish bilan birga, Yevropada yetakchi bo'lgan “DELFI”, “MEDUZA” internet nashrlari, “LTV” milliy televideniesi va radiosi, “SKONTO” mahalliy radiolari tajribalarini o'rganib qaytdi. Oktyabr oyida esa Mastura Hamroyeva jurnalistlar uchun ajratilgan xalqaro stipendiya sohibasi bo'ldi.
U 2018 yilda Xitoyga ham tajriba o'rganish uchun borgan edi. Shuningdek, “Yilning faol yosh jurnalisti” deb e'tirof etilgan, “Oltin qalam” Milliy mukofoti uchun xalqaro tanlovida ikki marotaba g'oliblikni qo'lga kiritgan. O'zbekiston jurnalistlari uchun MediaCAMP Markaziy Osiyo dasturi asosida “Internet jurnalistika asoslari” onlayn treningi tashkil qilinishining amaliyot maktabini o'tagan, desak mubolag'a bo'lmaydi.
Yaqindagina, YuNESKOning O'zbekistondagi vakolatxonasi va uyushmaning viloyat bo'limi tomonidan Termiz shahridagi “Meridian” mehmonxonasida “Jamoat manfaatlariga amal qilishni ta'minlashda o'zbek ommaviy axborot vositalarining salohiyatini oshirish-II faza” loyihasi doirasida trening tashkil etildi. Uch kun davomida mahalliy jurnalistlar amaliy mashg'ulotlarda faol ishtirok etishdi.
Hamkorlikning hikmati bor. Uyushma xodimlari ikki yildirki Yevropa Ittifoqining “O'zbekistonda suv va atrof-muhit masalalari bo'yicha xabardorlikni oshirish hamda hamkorlikni rivojlantirish” loyihasi doirasida viloyatda o'tkazilayotgan barcha tadbirlarda hamkor va tashkilotchi sifatida ishtirok etib kelmoqda. Shuningdek, uyushma jamoasi viloyatdagi barcha tegishli boshqarmalar, tashkilotlar, agentliklar, prokuratura, Yoshlar ittifoqining shahar, tuman bo'limlari bilan hamkorlikda faoliyat olib bormoqda.
E'tiborga loyiq yana bir tashabbus. Uyushmaning viloyat bo'limi say'-harakati bilan va TerDUda jurnalistikaga qiziquvchi yoshlar uchun media-klub tashkil etilgan. Bunga bir yildan oshayapti. Ijodkor yoshlar orasidan kelajakda salohiyatli jurnalistlar yetishib chiqishiga shubha yo'q. Uyushma tomonidan hamkorlikda tashkil etilgan ijodiy to'garak talabalar uchun ham, TerDU uchun ham, milliy matbuotimiz, milliy adabiyotimiz uchun ham ilk poydevor va tayanch nuqta bo'lib qolsa ajabmas.
Joriy yilda ijodiy uyushma “Navro'z Surxondan boshlanadi” nomlli fotoko'rgazma tashkillashtirdi. Bundan maqsad viloyat va tuman gazetalari fotomuxbirlarining mahoratini oshirish, o'zaro tajriba almashish, xolis kishilar tomonidan ularning faoliyatiga baho berish, imtihondan o'tkazish, ma'naviy va moddiy rag'batlantirish edi. Ko'rgazmada, 3-o'rin “Janub quyoshi” gazetasi fotomuxbiri Valmurot Jumartovga, 2-o'rin “Termiz universiteti” gazetasi fotomuxbiri Nizom Hakimovga nasib qildi. Tanlov g'olibi deb O'zAning viloyatdagi fotomuxbiri Jonibek Qo'zimurodov tan olindi. G'oliblar uyushma tomonidan diplom va esdalik sovg'asi bilan taqdirlandi. Uyushma tomonidan nafaqat turli mavzularda seminarlar, treninglar, media-turlar, mahorat darslari, ko'rgazmalar tashkil etilmoqda, balki Surxondaryoning Kampirtepa, Fayoztepa, Dalvarzintepa, Oks Aleksandriya kabi arxiologik yodgorliklariga OAV xodimlari uchun sayohatlar uyushtirilayotgani ham quvonarlidir. Xulosa qilib aytganda, Jurnalistlar ijodiy uyushmasi viloyat bo'limi faoliyati va ular amalga oshirayotgan tadbirlar milliy matbuotimizning yosh zaxmatkashlari uchun mahorat va tajriba maktabi vazifasini o'tamoqda.
Safar Omon,
“Hurriyat” muxbiri.