Ulkan mas'uliyatga undayotgan imkoniyatlar
Poytaxtimizda 27 iyun – Matbuot va ommaviy axborot vositalari xodimlari kuni munosabati bilan tantanali tadbir bo'lib o'tdi.
Bu yilgi bayram eng ulug' va eng aziz ayyom – Vatanimiz mustaqilligining 30 yillik sanasi arafasida bo'lib o'tayotgani unga alohida ruh va mazmun bag'ishlamoqda.
Tadbirda O'zbekiston Respublikasi Oliy Majlisi Senati a'zolari, Qonunchilik palatasi deputatlari, vazirlik va idoralar, jamoat tashkilotlarining vakillari, faxriy jurnalistlar, noshirlar, matbaachilar, oliy o'quv yurtlarining professor-o'qituvchilari ishtirok etdi.
Davlatimiz rahbarining matbuot va ommaviy axborot vositalari xodimlariga bayram tabrigini O'zbekiston Respublikasi Prezidenti Administratsiyasi rahbari o'rinbosari – Prezident matbuot kotibi Sherzod Asadov o'qib eshittirdi.
Bugun jurnalistlardan tezkorlik, xolislik bilan birga, davlatimiz rahbari tomonidan qo'yilayotgan vazifalarga hozirjavoblik, puxta va mukammal bilim asosida, o'z faoliyatiga ijodiy, teran tahliliy-tanqidiy ruhda yondashuv talab etilmoqda.
Prezidentimiz tomonidan olib borilayotgan insonparvar va xalqchil siyosat milliy jurnalistikani jadal ravnaq toptirish, so'z va matbuot, fuqarolarning axborot olishga oid huquq va erkinligini ta'minlashda muhim omil bo'lmoqda. OAV rivoji yo'lidagi g'amxo'rlik va e'tibor soha xodimlarining jamiyatdagi ijtimoiy mavqeini tobora yuksaltirish, ularni moddiy va ma'naviy qo'llab-quvvatlashda o'z ifodasini topmoqda.
Mamlakatimizdagi islohotlar jarayoni yoki dunyoning istalgan chekkasida ro'y berayotgan voqea va hodisalar shu onning o'zida ommaviy axborot vositalari, ayniqsa, internet nashrlarida aks-sado bermoqda. Yurtimizda fuqarolik jurnalistikasi, blogerlar faoliyati tobora jadallashib bormoqda.
Bugungi kunda barcha darajadagi boshqaruv idoralari rahbarlarining ommaviy axborot vositalari vakillari, jurnalistlar bilan muntazam uchrashib, jamiyat hayotiga daxldor muhim masalalarni erkin muloqot asosida keng muhokama etishi yaxshi an'anaga aylanib bormoqda. Davlatimiz rahbari hududlarga har bir tashrifida jurnalistlar va blogerlar bilan muloqot qilmoqda, ularning savollariga javob bermoqda. Bunday yondashuv O'zbekistonda olib borilayotgan ochiqlik, oshkoralik va demokratik siyosatning eng muhim yo'nalishlaridan biridir.
Ommaviy axborot vositalari mamlakatimizda amalga oshirilayotgan keng ko'lamli o'zgarish va yangilanish jarayonlarini har tomonlama tahlil qilib, joylardagi ijtimoiy muammolar, xato va kamchiliklarga davlat idoralari va jamoatchilik e'tiborini qaratmoqda.
Ayni vaqtda nodavlat elektron ommaviy axborot vositalari, gazeta va jurnallar, nashriyot va bosmaxonalar soni ko'payib borayotgani e'tiborga loyiq.
Davlat idoralarining jamoatchilik bilan aloqalarini mustahkamlashga alohida ahamiyat qaratilmoqda. Jumladan, hokimiyat va boshqaruv organlari tomonidan mamlakatimizda amalga oshirilayotgan islohotlarning borishi, milliy dastur va strategiyalarning bajarilishi yuzasidan doimiy ravishda matbuot anjumani va brifinglar, ochiq muloqotlar tashkil etilmoqda.
Agar 2019 yilda davlat va nodavlat tashkilotlardagi axborot xizmatlarining manbalari — rasmiy veb-saytlar, ijtimoiy tarmoqlardagi kanallar 559 tani tashkil etgan bo'lsa, 2021 yilda bu raqam 2 ming 410 taga yetdi.
Ommaviy axborot vositalaridagi tanqidiy chiqishlarga vazirlik va idoralar, hokimliklarning axborot xizmatlari orqali tezkor munosabatlar bildirish amaliyoti shakllanmoqda. Buning tasdig'ini davlat idoralari tomonidan tanqidiy materiallarga javob qaytarish ko'rsatkichi 2018 yilda 12 foizni tashkil etgan bo'lsa, 2020 yil yakuniga ko'ra qariyb 90 foizga yetgani misolida ham ko'rish mumkin.
Yaqinda qabul qilingan “Davlat organlari va tashkilotlarining faoliyati ochiqligini ta'minlash, shuningdek, jamoatchilik nazoratini samarali amalga oshirishga doir qo'shimcha chora-tadbirlar to'g'risida”gi Farmon bu boradagi ishlarni yangi bosqichga ko'tarishga xizmat qiladi.
Prezidentimizning “Matbuot va ommaviy axborot vositalari xodimlari kuni munosabati bilan soha xodimlaridan bir guruhini mukofotlash to'g'risida”gi Farmoni asosida mamlakatimizda so'z va matbuot erkinligi, ochiqlik va oshkoralik tamoyillarini mustahkamlash, fuqarolarning axborot sohasidagi konstitutsiyaviy huquqlarini ta'minlash bo'yicha amalga oshirilayotgan demokratik o'zgarishlar jarayonlariga qo'shayotgan katta hissasi, global axborot maydonida milliy manfaatlarimizni himoya qilish, Yangi O'zbekistonni barpo etish yo'lida erishilayotgan yutuqlarni keng targ'ib etishdagi munosib xizmatlari, zamonaviy jurnalistika tizimlari uchun yuksak malakali professional kadrlarni tayyorlash, yosh avlodni ona Vatanga muhabbat va sadoqat ruhida tarbiyalash borasidagi samarali faoliyati hamda ijtimoiy hayotdagi faol ishtiroki uchun bir guruh OAV vakillari unvon, orden va medallar bilan taqdirlandi.
Tadbirda bu mukofotlarni O'zbekiston Respublikasi Oliy Majlisi Senati Raisi Tanzila Norboyeva o'z egalariga tantanali topshirdi.
— Kamtarona mehnatim yuksak baholanganidan boshim ko'kka yetdi, — deydi “Mehnat shuhrati” ordeni sohibasi O'g'ilxon Boltaboyeva. — Jamiyatdagi muammoli masalalarni yoritish, shu ma'noda xalqimizga ko'makdosh bo'lishi uchun soha vakillaridan dadillik, haqgo'ylik va xolislik talab etiladi.
Tantanali tadbirda san'at ustalari, estrada yulduzlari va yosh ijrochilar ishtirokida konsert namoyish etildi.
Nurillo Nasriyev,
O'zA muxbiri.