Korrupsiyaga qarshi kurashishda OAVning o'rni
Korrupsiya — jamiyat taraqqiyoti kushandasi. Bugun bu illatga qarshi kurashish va uning oldini olish bo'yicha yurtimizda ma'lum chora-tadbirlar amalga oshirilmoqda.
Xususan, mamlakatimizda o'tgan yildan e'tiboran Korrupsiyaga qarshi kurashish agentligi faoliyatining yo'lga qo'yilgani, shuningdek, korrupsiyaga qarshi kurashish bo'yicha hududiy Kengashlar tuzilib, bugungi kunda ular faoliyat yuritib kelayotgani alohida ahamiyatli.
Navoiy shahridagi Yoshlar markazida O'zbekiston Jurnalistlari ijodiy uyushmasi Navoiy viloyati bo'limi hamda Korrupsiyaga qarshi kurashish viloyat hududiy Kengashi bilan hamkorlikda mazkur yangi tuzilmaning maqsad va vazifalariga bag'ishlangan matbuot anjumani bo'lib o'tdi.
Ta'kidlash joizki, viloyat hududiy Kengashida davlat va nodavlat hamda jamoat tashkilotlari, OAV vakillaridan iborat 38 nafar tarkib tasdiqlangan. Bugun ularning har biri o'z yo'nalishidan kelib chiqib, oldilariga qo'yilgan vazifani bajarishga kirishishgan.
Matbuot anjumanida jurnalistlarga viloyatda Kengash tomonidan olib borilayotgan ishlar, hududiy Kengashning maqsad va vazifalari, kelgusidagi rejalari xususida batafsil axborot berildi.
Qayd etildiki, korrupsion holatlarning oldini olishda ta'sirchan targ'ibot vositalaridan samarali foydalanishda OAVning o'rni o'ta muhim. Zero, bu illatning oldini olishda uning salbiy oqibatlarini o'zida mujassam etgan turli ko'rsatuv va materiallarni keng targ'ib etish auditoriyaning bu boradagi munosabatini shakllantirishda muhim ahamiyat kasb etadi.
Matbuot anjumanida jurnalistlar tomonidan mavzu doirasida berilgan barcha savollarga Kengash a'zolari tomonidan atroflicha javoblar qaytarildi.
Kelgusida bu yo'nalishdagi anjumanlarni ko'proq o'tkazib, hududiy Kengash faoliyati yuzasidan jurnalistlarga axborot berib borilishiga kelishib olindi.
Otabek ASLONOV,
O'zbekiston Jurnalistlari ijodiy uyushmasi
Navoiy viloyati bo'limi raisi