Maqsadlarimiz orzu emas…
Bir necha yillar oldin O'zbekiston Jurnalistlari ijodiy uyushmasi Surxondaryo viloyati bo'limiga ijodga qiziquvchi yoshlar matbuot sohasini o'rganish niyatida kela boshlagan edi. Ularning soni ortib borishi yangi bir loyihaning amalga oshishiga sabab bo'ldi. Uyushmaning viloyat bo'limi qoshida jurnalistika klubini tashkil etish g'oyasi tug'ildi va shu asosda hayotga tatbiq qilindi.
Qiziquvchi yoshlarning ko'pchiligi Termiz davlat universitetidan ekanligini hisobga olib, 2018 yil boshidan “Jurnalistikaga ilk qadam” nomlangan klubda mashg'ulotlar o'tila boshlandi. Unga kasbidan va yoshidan qat'iy nazar jurnalistikaga qiziquvchi vohadoshlarimiz jalb qilindi. Oradan ko'p o'tmasdan bir qancha ijodkorlarni kashf qildi. Ularning orasida bo'lgan Inobat Karimova bugun Termiz davlat universitetida axborot xizmati xodimi sifatida, Muyassar Mardonova ham jamoatchi muxbir sifatida xalq muammolarini qalamga olib kelmoqda. Uyushmaning viloyat bo'limi tomonidan tashkil qilingan klubning faoliyati ortidan bugun jurnalistikada o'rnini topayotgan ijodkorlarni ko'plab keltirsa bo'ladi. “Media” klub shaklida davom ettirilayotgan loyiha bugungacha 50 dan ortiq qalamkashlarni qamrab oldi. Mashg'ulotlar asosan ustoz-shogird an'analari asosida mohir jurnalistlar tajribasiga tayangan holda olib boriladi. Yoshlarga Safar Omon, Norquvvat To'rayev, Abdulla Xolmirzayev kabi bir qator ustozlar o'z tajribalarini o'rgatishmoqda.
Media klub nafaqat jurnalistikaga qiziquvchi yoshlarni balki ushbu sohada faoliyat olib borayotgan yosh xodimlar uchun ham mahorat darslari, treninglar tashkil qilinmoqda. Jumladan, “COVID-19”ga qarshi emlash jarayonlari, mavzuni yoritishda jurnalistlar ishtiroki” mavzusidagi seminar-treningda Jurnalistlarni qayta tayyorlash markazi treneri Nargis Qosimova, Respublika sanitariya-epidimiologik osoyishtalik va jamoat salomatligi xizmati xodimi Nasiba Toirovadan tajribalarini yanada mustahkamlashdi.
“Barqaror hayot” xalqaro ijtimoiy-ma'rifat markazi va O'zbekiston Jurnalistlari ijodiy uyushmasi Surxondaryo viloyat bo'limi hamkorlikda “Surxondaryo viloyatidagi jurnalistlar malakasini oshirish” nomli treningda viloyatdagi 15 nafar bo'lajak ijodkorlar axborotni to'g'ri talqin qilish turlari, zamonaviy sarlavhalar sirlari, to'g'ri va noto'g'ri ma'lumotlarni ajratish, maqsadli auditoriya tanlash singari mavzularda ma'lumotlar berildi.
Uyushmaning viloyat bo'limi jurnalistlar tajribasini oshirish, yosh ijodkorlarni qo'llab-quvvatlash bilan birga uyushmaning keksa a'zolari va nuroniy ijodkorlarga doimiy e'tibor qaratmoqda. Bo'lim tomonidan ustoz va shogird an'analarini davom ettirish yo'lida keksa jurnalistlar ishtirokida ijodiy uchrashuvlar tashkil qilinmoqda.
Bularning barchasi Surxon vohasining jurnalistikaga qiziquvchi yoshlari malakasining oshishiga, ularning yetuk mutaxassis bo'lish yo'lidagi ilk qadam albatta.
Mastura HAMRAYEVA,
O'JIU Surxondaryo viloyat bo'limi mutaxassisi