Abdurazzoq OBRO'Y. Parodiyalar

Muallif haqida:

Taniqli hajvchi, shoir va yozuvchi Abdurazzoq Obro'y — 1956 yili Pastdarg'om tumanida tug'ilgan. 1985 yili Moskva davlat universitetining jurnalistika fakultetini bitirgan. O'zbekiston Milliy axborot agentligida, “Mushtum” jurnalida, “Vatanparvar” gazetasida xizmat qilgan. Pensiyadagi podpolkovnik. U “O'zbekis­tonda xizmat ko'rsatgan jurnalist” unvonini olgan. O'zbekiston Yozuvchilar uyushmasi a'zosi. Abduraz­zoq Obro'yning “Xo'plam-to'p­lam”, “Hiring-hiring”, “Tuxumning qudrati”, “Ayolning qulog'i”, “Ruxsat bering she'r o'qiyman”, “Sen avayla, asra O'zbekistonni”, “Men o'sha o'r, men o'sha zo'rman” kitob­lari nashr etilgan.

 

O'ZI SENGA NE KERAK?

 

Aytsam senga bitta gap,

Seni yaxshi ko'raman.

Olib yursang avaylab,

Yuragimni beraman.

Sherzod MUSTAFOning

“Oshiq nolasi” she'ridan.

 

Hassa bo'lmaydi terak,

Toldan cho'kim seniki.

Senga qancha jun kerak,

Sochim, tukim seniki.

 

Saqlasang gar miltiqlab

Terib beray qoshimni.

Olib yursang qo'ltiqlab,

Uzib beray boshimni.

 

Agar uzun demasang,

Mayli olgin qo'limni.

Boshing egib kelmasang,

Ololmaysan ko'nglimni.

 

 

UZRXONLIK

 

Mayli, uysin qobog'in,

Uzatsin tabog'in.

Uchirib ko'ngil dog'in,

“Bitta uzr so'rab qo'y…”

Zohida MALIKOVAning

“Bitta uzr so'rab qo'y…” she'ridan.

 

Tishing nechta sanasin,

Tuxumlaring donasin,

Uylaringning xonasin,

Bitta uzr so'rab qo'y!

 

O'sma qo'ysin qoshingga,

Pashsha tushsin oshingga,

Soch eksinlar boshinga,

Bitta uzr so'rab qo'y!

 

Etingdan uzib olsin,

Sutkasin buzib olsin,

Yuzta qo'y, qizib olsin,

Bitta uzr so'rab qo'y!

 

Dehqonning yeri bo'lsin,

Ayolning eri bo'lsin,

Zohida she'ri qursin,

Bitta uzr so'rab qo'y!!

 

 

ODAMINI TOPIBSIZ

 

                      Qaydaligim qaydan bilay,

                     Meni mendan so'rab yurmang!

Xosiyat BOBOMURODOVAning

“Meni mendan so'rab yurmang!” she'ridan.

 

Judayam uzun boshimda sallam,

Ammo yo'qdir joyida kallam,

Meni mendan so'rab yurmang!

 

Bilib qoldim oyog'im yo'q,

Bilmam yana qayog'im yo'q,

Meni mendan so'rab yurmang!

 

Chaynay desam og'zim qani,

Puchog'im bor, mag'zim qani?

Meni mendan so'rab yurmang!

 

Bu ko'z emas, toshkosadir,

Qalam o'zi bo'sh yozadir,

Meni mendan so'rab yurmang!

 

ETTI QADAM KETSANG…

 

Magar o'lsam,

        o, bag'ringda o'lgim kelar,

Olis ketma,

     sensiz bo'zlab qolmasin dil.

Sadoqat Qurbonovaning

“Olis ketma” she'ridan.

 

Olis ketma,

men sigaret chekaman,

Olis ketma, men hattoki ichaman.

Olis ketma,

sensiz qanday uchaman,

Olis ketma, boshqasini quchaman.

Olis ketma,

chin yurakdan

uflayman,

Olis ketma, sensiz qanday

uxlayman.

Olis ketma,

men-chi kimni topaman,

Olis ketma,

men-chi kimni o'paman.

Olis ketma,

nima bo'lsam bo'layin,

Olis ketma,

she'r yozmayin o'layin.

 

 

BILMADIM…

 

Bilmadim…

Nafsgami,

Orzugami,

Vosvosgami,

Devonalikkami,

Xullas, bir narsaga

           ergashib yuribman.

Baraka BOQIYning

“G'urur” she'ridan.

 

Bilmadim…

Allam bormi,

Yallam bormi,

Sallam bormi,

Kallam bormi,

Xullas, dumaloq narsani

ko'tarib yuribman!

Bilmadim…

So'zim bormi,

Ko'zim bormi,

Tuzim bormi,

O'zim bormi,

Xullas, baqaloq narsani

ko'tarib yuribman!

Bilmadim…

Izim bormi,

Bezim bormi,

Yuzim bormi,

Esim bormi,

Xullas, bir narsani

ko'tarib yuribman!

Torim bormi,

Orim bormi,

Qorin bormi,

Borim bormi,

Xullas, anaqa   narsani

ko'tarib yuribman!

 

 

OShGA KETGAN O'ShA XULIGAN

 

Zerikarli o'tadi hayot,

Erkak zoti bo'lmagan joyda.

Ro'zimurod MAHMUDOVning

“Erkak bo'lmagan joyda”

she'ridan.

 

Baqir-chaqir va mushtlashish yo'q,

Xuddi itday tishlashish yo'q,

Asov otday kishnashish yo'q,

Erkak zoti bo'lmagan joyda.

 

O'chib yotar bir chetda sodka,

Qadahlarga quyilmas vodka,

Cho'kib ketar dengizga lodka,

Erkak zoti bo'lmagan joyda.

 

Suhbat bo'lmas xayol haqida,

Par to'shaklar, adyol haqida

Eng muhimi, ayol haqida,

Erkak zoti bo'lmagan joyda.

 

Hamma joyda ro'mol o'ragan,

Erkak bormi, deya so'ragan,

Oshga ketgan o'sha xuligan,

Erkak zoti bo'lmagan joyda.

 

 

ChO'ZMAQULOQ

 

Men bir so'zni yo'qtotib

                                qo'ydim,

Paydo bo'ldi esimda teshik.

Ollayor XO'JANDIYning

“Bir so'z…” she'ridan.

 

Men bir qizni yo'qotib qo'ydim,

Paydo bo'ldi yurakda darcha.

Shunda men-ay, to'lg'andim, kuydim,

Qarsak chalib turishdi barcha.

Men bir ko'zni yo'qotib qo'ydim,

Ikkinchisi sal-pal ko'radi.

Uchqo'rg'onda xolamni ko'rdim,

Bir ko'z qani deya so'radi!

Bir qulog'im yo'qotib qo'ydim,

Bittasini cho'zsa bo'ladi.

Eshitmoqni yoqtirmay qo'ydim,

Bunisin ham uzsa bo'ladi!