Sirdaryolik mesenat
Mamlakatimiz oliy o'quv yurtlarida a'lo baholarga o'qigan, jamoat ishlarida faol qatnashgan talabalarga Navoiy, Beruniy, Ibn Sino, Ulug'bek kabi stipendiyalar ta'sis etilganini yaxshi bilamiz. Biroq jamiyatimizda shaxsiy jamg'armasidan a'lochi o'quvchilar uchun stipendiya ta'sis etgan hotamtoy insonlarning borligini ko'rsak, ko'nglimiz yanada ko'tariladi.
Hakimjon Yunusov ancha yillardan buyon “Tasviriy oyina” ijodiy uyushmasi Sirdaryo viloyat bo'limi boshqaruvi raisi lavozimida ishlab keladi. U kishi xalqimizning: “Bir kun tuz ichgan joyga qirq kun salom” naqliga amal qilib, o'zi tahsil olgan Boyovut tumanidagi chekka Mingterak qishlog'idagi 49-umumiy o'rta ta'lim maktabiga muntazam ravishda yordam qo'lini cho'zib keladi. Uning ilk homiylik ishlari maktab zallari va sinf xonalarini tasviriy targ'ibot vositalari bilan bezashdan boshlangan edi. Bora-bora homiylik yordamining ko'lami kengayib bordi. Shu paytgacha Yunusov tomonidan maktab kutubxonasiga 2 million so'mlikdan ziyod badiiy kitoblar sovg'a qilindi. Adabiyot va madaniyatga yaqin kishi emasmi, har chorakda maktabda taniqli yozuvchi, shoir va jurnalistlar bilan uchrashuvlar o'tkazishga bosh-qosh bo'lib kelmoqda.
“Saxiyning qo'li ochiq, qo'li ochiqning yo'li ochiq”, deydi dono xalqimiz. Bundan uch yil muqaddam Yunusov o'z shaxsiy jamg'armasidan yuqori sinflarning a'lochi o'quvchilari uchun stipendiya joriy qildi. Har chorakda uch nafar o'quvchiga 500 ming so'mdan stipendiya berishni taomilga kiritdi. Keyinchalik stipendiyaga taqdim etiladigan o'quvchilar soni kengayib bordi.
─ So'nggi yillarda stipendiatlarni 5-11-sinf o'quvchilari orasidan tanlab olishni yo'lga qo'ydik, ─ deydi maktab direktori M. Mirzayev. ─O'qituvchilardan tashkil topgan nufuzli ishchi guruhi ona tili, matematika hamda O'zbekiston tarixi fanlari bo'yicha o'quvchilardan olingan nazorat ishlarini adolatli va shaffof tarzda tahlil qilib, Yunusov stipendiyasiga munosiblarni tanlab bermoqda.
Yaqinda maktabda III chorak yakunlariga bag'ishlangan katta yig'in bo'lib o'tdi. Unda Hakimjon Yunusov tanlovda birinchi, ikkinchi o'rinlarni egallagan 5-sinf o'quvchilari Mahliyo Azimjonova va Shabbona Ahrorqulovalarga I va II darajali diplomlar, badiiy kitoblar hamda 500 000 so'mdan pul mukofoti, uchinchi o'rinni egallagan 7-sinf o'quvchisi Sayyora Norqulovaga esa, III darajali diplom hamda badiiy kitoblar to'plamini tantanali ravishda topshirdi. Boz ustiga, yana besh nafar a'lochi o'quvchiga Yunusov tomonidan badiiy kitoblar bilan “Tashakkurnoma”lar in'om etildi.
─ Qani endi Hakimjon aka Yunusovga o'xshab maktabga yordam qo'lini cho'zadigan homiylar safi kengaysa, ─ deydi tadbirda ishtirok etgan xalq deputatlari Boyovut tumani Kengashi deputati Jumaboy Rahmonqulov. ─Ta'lim tizimi yanada gurkirab rivojlanib ketardi. Zero, Prezidentimiz: “Butun umid siz, o'qituvchilardan” deb turgan bir paytda ustozlarning qanotiga kirishdan ortiq baxt bormi?!
─ Hakimjonning bu sa'y-harakatlarini men yuksak vatanparvarlik namunasi deb baholayman. Hotamtoyning serhafsalaliligiga qoyil qolmay iloj yo'q. Hatto tanlov g'oliblariga maxsus medallar ham darj ettirgan. Ishonchim komilki, Yunusov stipendiyasiga musharraf bo'lgan o'quvchilardan kelajakda yurt koriga yaraydigan yetuk mutaxassislar yetishib chiqajak, ─ deydi faxriy pedagog Qurbonboy Mirzayev.
─ Hakimjon Yunusovning hotamtoyligi faqat o'zi o'qigan maktabga yordam ko'rsatish bilan cheklanib qolmagan, ─ deydi O'zbekiston Yozuvchilar uyushmasining a'zosi, shoir Abdug'ani Abdurahmonov. ─ U viloyatimizdagi jurnalistlar va ijodkorlarga ham jild-jild badiiy kitoblarni sovg'a qilib turadi. Shu o'rinda qiziq bir faktni keltirishni joiz deb bilaman. U qizini uzatganida ko'rmanaga mo''jazgina kutubxona hadya etganiga guvohman.
Ishlab chiqarish yig'ilishlaridan birida Sirdaryo viloyati hokimi G'ofurjon Mirzayev rahbarlarni Hakimjon Yunusovdan o'rnak olishga, o'zlari tahsil olgan maktablarga tez-tez tashrif buyurib, beminnat yordam qo'llarini cho'zishga chaqirdi.
Muhammadali AHMAD,
O'zbekiston Jurnalistlari
ijodiy uyushmasi a'zosi