Fotojurnalistlar uchun ham katta rag'bat
“Eng yaxshi fotoreportaj uchun” nominatsiyasi g'olibi, Daryo.uz internet sayti fotomuxbiri Madina NURMAN:
Rostini aytsam, “Oltin qalam” tanlovida fotojurnalistika yo'nalishi degan alohida nominatsiya borligining o'zi juda quvonarli. Chunki bu fotojurnalistlar uchun katta rag'bat. Tanlov nafaqat yetuk professionallar, balki sohada 5-6 yildan buyon ishlayotgan menga o'xshagan yoshlarga ham imkoniyat berishi bilan ham ahamiyatlidir. Har qanday tanlovdagi g'oliblik esa insonga katta turtki va intilish beradi.
Fotojurnalistika milliy matbuotimiz uchun eng kerakli va ayni damda biroz oqsayotgan yo'nalishlardan biri. Negaki, bugungi kunda qo'ltelefonlari orqali bir-ikki suratga olib, “fotomuxbir”ga aylanayotganlar ko'payib ketdi. Fotojurnalistikani alohida bir kasb, soha sifatida chuqur o'rgangan, hanuz o'rganishda davom etayotganlar afsuski, barmoq bilan sanarli. Bu gaplar bilan o'zimni har tomonlama mukammal, professional fotojurnalist deb hisoblab, aql o'rgatmoqchi emasman ammo fotojurnalistikani rivojlantirish uchun tajribali, bir necha yillar davomida sohada mehnat qilib kelayotgan ustoz fotosuratchilarga taklif bilan chiqqan holda yoshlarga dars berishni yo'lga qo'yish kerak deb o'ylayman. Aynan shu ishlar orqali fotojurnalistikamiz anchayin jonlangan bo'lardi. Yuqorida keltirganimizdek, har yili o'tkazib kelinayotgan “Oltin qalam” tanlovida fotojurnalistika yo'nalishining borligi bu sohaga qiziquvchilar sonini yanada oshirmoqda.
Shu o'rinda yana bir narsani unutmaslik kerakki, tajribali fotosuratchilarga qoniqarli mehnat sharoitlari va moliyaviy imkoniyatlar yaratib berilsagina biror natija kutish mumkin. Yana bir tomoni, professional fototexnikalar o'ziga yarasha katta xarajat talab qiladi. Tabiiyki sohaga endi kirib kelayotgan yoshlarning bunday moliyaviy xarajatlarga qurbi yetmaydi. Ularni ilg'or texnika bilan ta'minlash ham muhim ahamiyatga ega. Bularning bari asosiy tamal toshi qo'yilgandan keyingi masalalar. Birlamchi masala fotojurnalistika maktabini yaratish. Keyingi navbatda OAVda mavjud kadrlarning malakasini oshirib borishga ham e'tibor qaratish kerak. Kurslar, amaliy treninglar, xorijiy davlatlar fotojurnalistlari bilan tajriba almashish ham anchayin foydali bo'ladi. Bular o'ta muhim. Hozircha mana shu jihatlar yo'lga qo'yilsa, keyinroq yanayam ko'proq rejalarni ko'tarish mumkin.