Ustozlarimga rahmat!

Eng yaxshi jurnalistik material uchun (internet jurnalistika) nominatsiyasi bo'yicha 1-o'rin g'olibi — O'zbekiston Milliy axborot agentligi sharhlovchisi Norgul ABDURAIMOVA:

— Qo'liga qalam tutgan ijodkor borki, oltin qalam sohibi bo'lishni orzu qilsa kerak. Lekin bu qalamga ega bo'lish oson emas. Buning uchun ko'proq mehnat qilish kerak.

“Oltin qalam” xalqaro milliy tanlovi yillar o'tgani sari ta'bir joiz bo'lsa, tom ma'noda o'zligini topmoqda. Chunki so'z erkinligini ta'minlash bo'yicha amaliy ishlar qilinganidan keyin milliy jurnalistikada ham uyg'onish kuzatildi. Fikrimizni, tanqidni bemalol ayta olish imkoniyati paydo bo'ldi.

Qiziq, jurnalistga erkinlik berilmaguncha u erkin yoza olmaydimi yoki tanqid qila olmaydimi?

Ha, erkinlik kerak. Lekin qo'liga qalam ushlagan professional jurnalist hech qachon o'zligidan kecha olmaydi, menimcha. Ya'ni u yuragi buyurganini baribir yozadi. Ehtimol yozganlari chop etilmas, tahrirda erkin fikri, tanqidi uzib olib tashlanar, ammo haq so'zini baribir aytaveradi.

Shukrki, Davlatimiz rahbarining dadil irodasi bilan jamiyatda qaror topayotgan so'z erkinligi tufayli biz bugun barcha fikrimizni ayta olish, e'lon qila olish baxtiga musharraf bo'ldik.

Odamlarning dardini eshitib, ularni ochiq ayta boshladik. Eng muhimi, muammoli masala ko'tarilganda unga mas­'ul idoralarning munosabat bildirayotgani, o'sha muammo yechimini topayotganidir.

Aynan shunday qaynoq jarayonlar bilan yashab, ijod qilayotgan haqiqiy professionallar oltin qalam sohiblariga aylanayotganidan mamnunman.   Zero, so'z erkinligidan foydalanib, sohani tirikchilik manbaiga aylantirib yurganlar ham kam emas.

Prezidentimizning “Men professional jurnalistlarni hamisha va har tomonlama qo'llab-quvvatlashga tayyorman”, degan fikrlari mazkur tanlov timsolida yana bir bor amalga oshdi.

Yana bir narsani e'tirof etib o'tmoqchiman. O'zbekiston Jurnalistlari ijodiy uyushmasi tanlovni tashkil etishda juda katta sa'y-harakatlarni amalga oshirdi. Ochiqlik ta'minlanishi bilan birga har bir ijodkorning mehnatini ko'rsatib berish bo'yicha bu yil katta ishlar qilindi.

Bugun qo'liga “Oltin qalam” ushlagan jurnalistlar shu paytgacha faol ishlagan bo'lsalar, buyog'iga ulardan katta fidoyilik talab qilinadi. Axir bu qalam ularga qalamlari yanada o'tkir bo'lishi uchun taqdim etildi.

Bugun internet jurnalistikasi o'z o'rniga ega, tezkor. Odamlar voqea-hodisalar, yangiliklarni bir zamonlardagidek soatlab, kunlab kutishmaydi. Haqiqiy axborot asri deb shunga aytsalar kerak.

Ammo shu o'rinda “Internet-jurnalistikasi” sohasi bo'­yicha ikki og'iz: Bu axborot makonini axborot tarqatishning eng tezkor va cheksiz ummoniga qiyoslasak bo'ladi. Biroq bu ummonda kerakli va keraksiz axborotlar qorishib ketgan. Shu ma'noda internet orqali ishonchli axborotni topish bugungi kunning dolzarb muammolaridan biriga aylangan. Internet nashrlar, saytlarni kuzatsak, e'tibor tortadigan sarlavhalar bisyor. Ochib o'qimoqchi bo'lsangiz, ko'pchilik xabarlarning tagi puch bo'ladi.

Aslida Internet jurnalistikasi juda katta imkoniyatlarga ega va bundan unumli foydalanish, faqat tezkor emas, balki ishonchli, foydali, ya'ni odamlarni fikr­lashga, nimanidir anglashga undaydigan maqolalarni ko'paytirish maqsadga muvofiq.

Men mehnat qilayotgan O'zAda Yaratganga shukrki, ijodiy muhit, ijodga munosabat havas qilgulik. Ana shunday hayo­jonli e'tirofga munosib ko'rilganimdan boshim osmonda. Barcha ustozlarimga rahmat deyman.