Mas'uliyat yuki
Ayol. U nozik yelkasida muqaddas oila mas'uliyat yukini turmush o'rtog'i bilan tengma-teng ko'tarsa-da, bu zahmatni pisand etmay, xonadonini beminnat obod etib kelayotgan noyob xilqatdir. Ayniqsa, ayni kunlarda bu zot jamiyatning turli jabhalarida xizmat ko'rsatib kelayotgan nafaqat mehribon ona, balki fidokor rahbar, ilg'or xodim. Shijoati, matonati tahsinga loyiq.
Biroq kaminani bir o'y qiynaydi. Bu mushtiparlarimizning nafis qalbi yurish-turishi-yu muomalasi borgan sari dag'allashib borayotgandek. Bu ularning sog'lig'i, eng achinarlisi, oilasiga salbiy ta'sir etmoqda. O'zingiz o'ylang, kun bo'yi ishdan horib-charchab kelgan ayol turmush o'rtog'i, farzandlariga qanday vaqt ajrata oladi? O'smir yoshlar tarbiyasidagi buzilishlar, ajrimlar sonining keskin oshib borayotganining eng asosiy sababi hozirgi zamon ayolining uydagilari, yaqinlariga yetarlicha vaqt ajrata olmayotgani, ba'zi bir oila boshlig'ining mas'uliyat yukini ham o'z gardaniga ortib olganida emasmikan?!
Nega or-nomusli, mas'uliyatli erkaklar tobora kamayib bormoqda?
Nega o'g'lonlarimiz otasiga emas, onasiga suyana boshladi?
Nima uchun ayrim qizlarimiz erkakshoda onalaridan andoza olib o'sayapti?
Demoqchimanki, ayolning jamiyatda faol bo'lishi yaxshi, lekin bu uning shaxsiy hayotiga zarar yetkazmasligi, oilasi tanazzuliga olib bormasligi lozim.
Mamlakatimizda keyingi yillarda ayollar haq-huquqlariga davlat siyosati darajasida e'tibor qaratilayotgani bejiz emas. Sir emas, uzoq yillar davomida ayolga bepisand munosabatda bo'lish, uni xo'rlash odatiy bir narsadek qaralgan vaqtlar ham bo'ldi. Ammo ertasini o'ylagan millat ayolga bo'lgan munosabati bilan buyuklikka erishishi mumkin. Zero, muqaddas kalomlarda ham ayolga e'tibor, g'amxo'rlik birinchi masala deb tilga olinishi bejiz emas.
Muhabbatoy ABDUQODIROVA