Chamanlar lol qolar bo'lsa, u qoshlari kamondan so'r

Munavvara TILLABOYEVA

Muallif haqida:

Munavvara TILLABOYEVA — 1944 yili Andijon shahrining Chahorguzar mahallasida tug'ilgan. Shahardagi 32-o'rta maktabda o'qigach, Andijon davlat pedagogika instituti — hozirgi ADUning tarix-filologiya fakultetida tahsil olgan.

Shoiraning “Muhabbat tumori”, “Izlaganim sen”, “Allali tong”, “Zafarjonning qo'shig'i”, “Qalb nidolari”, “Ko'ngil qatralari”, “Oy to'lgan kechada”, “Oymomo”, “Olislardan taralar qo'shiq”, “Bolam borki”, “Qorboboning sovg'asi”, “Olmazor bog'larda” va 6 jilddan iborat “Saylanma” kitoblari chop etilgan.

O'zbekiston Yozuvchilar uyushmasi a'zosi.

                              ChAMANDAN SO'R

Mening o'lkam chiroyini sahar chog'i chamandan so'r,

Chamanlar lol qolar bo'lsa, u qoshlari kamondan so'r.

Dehqon, paxtakorin dong'i ketmish keng jahon ichra,

Uning qadrin bilar bo'lsang, borib turli tomondan so'r.

Kishilar mehnati birla qadr topsa ajablanma,

Bu rohat, bu halovatni aziz yurti omondan so'r.

Diyorim bag'rida o'smish necha turfa gulu rayhon,

O'zi rayhon, so'zi xandon chiroyi bir jahondan so'r.

Kulgisi tongni uyg'otgan dilrabolar yashar bunda,

Ular maskan qilib ermish baxtiyor bu makondan so'r.

Tavozeda qo'lim doim marhabo, jon marhabo,

Ulug' xalqim topib bergan muqarrar imkondan so'r.

Sinmagay sevgining sozi qolmagaydir aro yo'lda,

Munavvar baxtga yor etgan ajab shirin zamondan so'r.

                                             * * *

Ko'nglimiz bedard emasdir, boshda ishq g'avg'osi bor,

Biz ko'ngil qo'ygan malakning ko'nglida savdosi bor.

Noumid bo'lmoq nechukkim, ul umidning shohi bo'l,

Biz gado bo'ldik ul ersa bizga na parvosi bor.

Qilmasa parvo netaykim, bori jonim o'rtanar,

Nozu ishva xo'p yarashgan bir ajab dunyosi bor.

Toza ishq gavhar erur, ag'yor anga loyiq emas,

Chunki ag'yorning hamisha qo'ynida olmosi bor.

                                         * * *

Bunda har bir insonning baxti bir kam bo'lmasin,

Ochilib kulsin vale ko'zida nam bo'lmasin.

Topsin ul o'z o'rnini ko'rgani bo'lsin quvonch,

Yayrasin shodon kulib balki sitam bo'lmasin.

Oqil-u, dono bilan kechsa umri voajab,

Istasa topsin murod ko'nglida g'am bo'lmasin.

To'g'ri so'zlab o'tsin ul bu hayot mahv etmasin,

Er-yigitning ori bo'lsin boshlari xam bo'lmasin.

Bo'lsa imkon Munavvar kuyla inson ko'nglini,

Baxt bitib peshonaga zarra alam bo'lmasin.

                                         * * *

Ey falak, nodon bilan bir lahza oshno etmagin,

Yondirib jismu dilimni ko'p tamanno etmagin.

Oh, uningsiz ham dunyo johil bilan to'ladir,

Fe'li rasvo norasolarga tavallo etmagin.

Holimi so'rmas nechukkim, befarosatni netay,

Toza gulzorim uning bo'yi-la rasvo etmagin.

Boshima yog'dirsa garchi ul balolar toshini,

Zor etib battar yana oldida shaydo etmagin.

Ey Munavvar, yaxshiyamki, do'stu yoring bor ekan,

Sindirib ko'ngling uyini, o'zni tanho etmagin.