Ezgu tashabbus
Nufuzli adabiy gazeta “O'zbekiston adabiyoti va san'ati” gazetasi hamda Toshkent shahar Maktabgacha va maktab ta'limi boshqarmasi hamkorligida ta'lim sohasida yangi bir ezgu tashabbus yo'lga qo'yildi. Unga ko'ra, Toshkent shahridagi umumta'lim maktablarida namunali faoliyat ko'rsatayotgan, hamkasblari, o'quvchilar va ota-onalar hurmatiga sazovor bo'lgan fidoyi o'qituvchilarning ibratli faoliyati gazeta sahifalarida muntazam yoritib borildi hamda ular asosida O'qituvchi va murabbiylar kuni arafasida “Zilol buloq” nashriyoti tomonidan 1000 nusxada kiril va lotin alifbolarida “Maktab – mening hayotim” deb nomlangan ocherklar va maqolalar to'plami nashr etildi.
Davlatimiz rahbarining “Hammamiz aziz farzandlarimiz hayoti va taqdirini o'qituvchi va murabbiylarga ishonib topshiramiz. Mana shunday beqiyos boylik posbonlari, kelajak bunyodkorlari bo'lgan bu mo''tabar zotlarga munosib hurmat-ehtirom ko'rsatishimiz kerak”, degan so'zlari bilan boshlanadigan mazkur kitob Yangi O'zbekiston ta'lim tizimi, xususan, umumta'lim maktablari tizimida muhim yangilanish jarayonlaridagi o'zgarishlar markazidagi oddiy maktablarning tajribali o'qituvchilari turganini ko'rsatib beradi. Toshkent shahridagi umumta'lim maktablarida namunali faoliyat ko'rsatayotgan, hamkasblari, o'quvchilar va ota-onalar hurmatiga sazovor bo'lgan fidoyi o'qituvchilarning ibratli faoliyatini ko'rsatish asnosida respublikamizdagi barcha oliyqadr ustozlar hayoti haqida yangi asarlar yaratish tashabbusini ilgari suradi.
E'tiborli jihati shundaki, “Maktab – mening hayotim” to'plamidan joy olgan ocherk va maqolalar Muhammad Ali, Adhambek Alimbekov, Shoyim Bo'tayev, Hakim Sattoriy, Humoyun Akbar, Muhiddin Omon, Turob Niyoz singari taniqli ijodkorlar bilan bir qatorda Shuhrat Azizov, Hulkar Hotamboyeva kabi ular izidan borayotgan iqtidor sohiblari qalamiga mansub. Bugungi kunda ta'lim sohasi yutuqlari bilan bir qatorda undagi muammolarni ham o'z ichiga olgani tufayli ham bu kitob ilk tajriba sifatida katta ahamiyat kasb etadi.
Hulkar HOTAMBOYEVA