Ishda ham, sportda ham faol
Vatanimiz tinchligi va osoyishtaligini ta'minlashdek mashaqqatli va sharafli kasbga o'zlarini baxshida qilayotganlar orasida ayol harbiy xizmatchilarning ham borligi quvonarlidir. Ular nafaqat o'z ishida, balki sport sohasida ham ko'pchilikka o'rnak bo'lmoqda. Ana shunday xodimlarimizdan biri — Ma'mura Ashurova. Bugungi kunda u DXX Chegara qo'shinlari harbiy xizmatchisi. Samarali mehnati e'tirof etilib, “Shuhrat” medali bilan taqdirlangan.
Sir emaski, ayollar sport bilan muntazam shug'ullansa, eng avvalo, o'zining salomatligi yaxshilanadi, jamiyatdagi faolligi oshadi, qolaversa, farzandlari ham jismonan sog'lom, baquvvat bo'lib ulg'ayadi. Shu ma'noda yurtimizda xotin-qizlarning sport bilan shug'ullanishi uchun barcha sharoitlar muhayyo qilingan. Mamlakatimizda ayollar salomatligini mustahkamlash, ularni sportga keng jalb qilish orqali jamiyatda sog'lom turmush tarzini targ'ib qilishga alohida e'tibor qaratilayotgani ham so'zimiz isbotidir.
Ma'mura Ashurova sportning karate turi bo'yicha 2021, 2022 yillari o'tkazilgan O'zbekiston Respublikasi chempionatida faxrli birinchi o'rinni qo'lga kiritgan. Joriy yilning sentyabrida o'tkazilgan karate bo'yicha jahon chempionatida ham g'oliblikni begona qilmadi. 33 davlat sportchilari bellashgan musobaqada u munosib ishtirok etdi. Natija a'lo bo'ldi. Bir emas, 3 ta oltin medal bilan yurtimiz bayrog'ini munosib himoya qildi.
Albatta, bu kabi g'alabalar bizni quvontiradi. Ma'mura Ashurova o'zining tirishqoqligi, qat'iyati, fidokorligi hamkasblariga o'rnak bo'lmoqda.
K.KOZOKOV,
DXX Chegara qo'shinlari harbiy xizmatchisi, serjant.