Ogohlantirish qo'ng'irog'i

—Jasur, bu yil ham “paqildoq”ni zo'ridan topib berolasanmi?

—Mayli, puling bo'lsa, muammo yo'q.

 

Bu suhbat qay zaylda tugaganini tusmollash qiyin emas. Ayonki, xayrli tugamagan. Biri kuygan, birining esa ko'zi…

Ha, Yangi yil eshik qoqib turibdi… El-ulus bayramni ko'tarinki kayfiyatda kutib olishga taraddud ko'rmoqda. Afsuski, mana shunday shodiyonada goho kayfiyatga soya tushadi. Bunga ko'pincha pirotexnika vositalari sababchi bo'ladi.

Shukuhli ayyom bo'sag'asida pirotexnika vositalarini mamlakatimiz hududiga olib kirishga urinish­lar ko'payadi. Ba'zi bir kimsalar hayotimizga xavf soladigan pirotexnika vositalarini yosh bolalarga sotmoqchi bo'lgan holatlarini uchratamiz. Ijtimoiy tarmoqlar orqali pirotexnikadan foydalanish jab­hasida  ayanchli oqibatlar aks etgan video va audio xabarlar esa ko'paymoqda. Bu — ogohlantirish qo'ng'irog'i.

 

Alhol, bu narsalarning “tashrifi”ga doir holatlar kam emas. Ma'lumotlarga e'tibor qarating-a: Toshkent viloyatining “Chinor” yo'l-patrul xizmati maskanida olib borilgan tezkor surishtiruv ishlari natijasida “Kia” rusumli yuk mashinada 9 dona qutilarga joylashtirilgan ko'katlar orasiga yashirilgan har xil pirotexnika vositalari aniqlandi… Angrendan Toshkentga kelayotgan “Mercedes-Benz” ichidan 250 ming dona pirotexnika vositalari topildi…

Bizningcha, bojxona postlarida hushyorlik yanada oshirilishi darkor. Sababi, portlovchi moddalar, asosan, yurtimizga chetdan kirib keladi.

Garchi, O'zbekiston qonunchiligida ham pirotexnika vositalarini mamlakatimiz hududiga olib kirish, ushbu turdagi mahsulotni ishlab chiqarish, savdosi bilan shug'ullanish kabi holatlarga tegishli tartibda javobgarlik belgilangan. Xususan, ma'muriy javobgarlik to'g'risidagi kodeksning 185(1)-moddasi hamda jinoyat kodeksining 250(1)-moddasi orqali tegishli jazo choralari ko'riladi. Biroq… nafs qutqusi choralar, jazolardan ham hayiqmaslikka olib kelmoqda. Qancha gapirilmasin, chora-tadbir belgilanmasin, baribir bozorlar shunday “paqildoq”lar-u, salyut otadigan matohlarga to'lib ketaveradi!

Axir, o'ylab ko'ring, pirotexnika vositalari oqibatida qancha bolalar, hatto kattalar ham har yili jabr ko'radi. Birov kuyish jarohati olsa, birovning ko'zi ko'rmay qoladi.

Nahotki bayram, o'tkinchi zavq-shavq uchun “qurbonlik” talab qilinsa, nahot nafsi uchun kimlarningdir jabr ko'rishi, hatto nogiron bo'lib qolishini o'ylamasa ayrim o'zini “tadbirkor” deb biluvchi kimsalar?!

Ana shunday qilib, kimnidir qaqshatishga sababchi bo'lgan boylik tatiydimi? Bizningcha, bu narsalarning javobi baribir qattiq bo'ladi.

Muhammadsodiq TO'RAYEV.

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

2 × 2 =