Sening kelishingga ko'z tikdi ko'nglim
Muallif haqida:
Muhammad ISMOIL — 1964 yil Sirdaryo viloyatining Xovos qo'rg'onida tug'ilgan. Ilk she'riy to'plami “Tazarru saodati” 1991 yilda chop etilgan. Shundan so'ng “Tasavvur chiziqlari” (1998), “Ko'ngil mulkiga safar” (2001), “Sahroyi gullar” (2001),“Siz hamon o'shasiz” (2003), “Sizni sevmay bo'ladimi?” (2005), “Bahorning eng so'nggi lolasi” (2006), “Chiroylisan, tengi yo'q” (2007), “Ko'ksimni kuydirgan alanga” (2008), “Osmon to'la orzular” (2011), “Meni kuchliroq sev” (2012), “Osmoningdan uzilma, ey dil!” (2014), “To so'nggi nafasgacha” (2015), “Millat yuragining durdonalari” (2016), “Gapning qisqasi yaxshi”, “Oyga osilgan bayroq” (2018), “Atrofingda men sarson” (2019), “Menga so'z bering” (2020) “Taraddud”, “Muhabbatning Vatani” (2021) singari 19 nomdagi kitobi 100 mingdan ortiq nusxada chop etilgan. She'rlari hind, turk, belarus, rus, ingliz, turkman, qozoq, qirg'iz, qoraqalpoq kabi tillarga tarjima qilingan.
Muallif asarlari asosida “Izg'irinli kunlarning biri”, “Qismat”, “Oy chiqmagan oqshom”, “Yangi oy chiqqan kecha”, “Mohinur”, “Atirgul”, ”Antiqa debyut”, “Balog'at bekati”, “Yulduzsiz osmon”, “Qalbim ardog'i”, “Vasiyat” kabi filmlar ekranlashtirilgan. Ikki yuzdan ortiq she'rlari xonandalar tomonidan qo'shiq qilingan.
O'zbekiston Yozuvchilar uyushmasi a'zosi.
HAYoT O'ZI ShUNDAY
Yangi yil bazmida do'stlar bo'ldi jam,
Davra kengligidan quvonchga to'ldim.
Kelgan do'stlar jondan aziz bo'lsa ham,
Sening kelishingga ko'z tikdi ko'nglim.
Eshikka qaradim dilda iltijo,
Nogahon charaqlab kelasanmi deb.
Barchani husningga etib mahliyo,
Davra malikasi bo'lasanmi deb.
Kelsang, ko'zlaringga boqardim shodon.
Bir zum nari ketmas edim yoningdan.
Men uchun bo'larding eng aziz mehmon,
E'zozlab joy berar edim jonimdan.
Balki raqs tusharding, keng davra bo'ylab,
Yo she'rlar o'qirding sevgi haqida.
Ko'kka uchar edim, yuragim o'ynab,
O'tli so'zlaringning alangasida.
Balki yoqdimi deb ko'rsatar eding,
Yangi tikilgan oq ko'ylaklaringni.
Yarashdimi deya o'ynatar eding,
Husningni ochgan soch turmaklaringni.
Men-chi atrofingda girdikapalak,
Boshingga dastalab gullar sochardim.
Shodlik va quvonchga to'lardi falak,
Sevgidan mast bo'lib, esdan ozardim.
Ammo sen kelmading. Shundaydir hayot,
Begonalar bizga doim yor, hamdam.
Ko'rinamiz har dam baxtiyor, hayhot
Kelmagan bo'lsa ham biz kutgan odam.
BILMADIM
Bilmadim ertaga yana bormanmi,
Vaznsiz bo'shliqda tirik xormanmi,
Yana o'z qarshimda o'zim dormanmi,
Bilmadim umr ne, nimadir hayot?
O'zingni anglamoq og'ir dard ekan,
Ko'ngil qanoatsiz, qo'nimsiz garchand,
Har kun olov kechib yurmoq shart ekan,
Bilmadim umr ne, nimadir hayot?
Qismat bo'ysundirdi, chorasiz cho'kdim,
Har kun mehnat qildim, har kun ter to'kdim,
G'urbatsiz biror on, biror dam yo'qkim,
Bilmadim umr ne, nimadir hayot?
Yurak, qayg'ulardan o'zingni tiygin,
Ollohni sev, o'zga so'zingni tiygin,
Bu dunyodan yuz bur, ko'zingni tiygin,
Bilmadim umr ne, nimadir hayot?
BIR YuLDUZ OSTIDA
Qay so'zni so'zlasak, so'zlarimiz bir,
Qay ishni ko'zlasak, ko'zlarimiz bir.
Bir yulduz ostida tug'ilgan kabi,
Qosh-u kiprigimiz, yuzlarimiz bir.
Yuragimga boqsam sizga o'xshaydi,
Meni tinch qo'ymaydi, sizni o'ylaydi.
Ko'tarib yuribman sizni ko'ksimda,
Ikki qalb bir-birin quchib to'ymaydi.
Qachondir yo'qotib topganimmisiz?
Mening bir bo'lagim, bir tanimmisiz?
Qachondir ikkimiz bir odam bo'lib,
Qaytadan bir bo'lgan badanimmisiz?
Hurlar o'qiganmi nikohimizni,
Taqdir etganmi bir bo'lmog'imizni?
Bizning bir-birimiz uchun tug'ilib,
Bir-birimiz uchun o'lmog'imizni.
Kimlarga qolsa gar qaratmas edi.
Ishq sarob bo'lsa, nur taratmas edi.
Tangrim bizni buncha suymasa agar,
Yerda muhabbatni yaratmas edi.
Har inson ishq bilan turmushin qursin,
Muhabbat to dunyo turguncha tursin.
Dunyoda jamiki oshiqlar sevsa,
Siz va mening kabi sevishib yursin.
* * *
Ketmoqdasiz,
Men o'zimni yo'qotganman,
Bir to'zim yo'q.
Ne qilarim bilolmasdan
Karaxt, lolman.
Izlayman-u, axtaraman
Es-hushim yo'q.
Meni tashlab qaylargadir
Ketib qolgan.
Endi ortga qaramaysiz,
baxtli bo'ling!
Farishtalar aytib yursin
Tilagimni.
Mendan ko'ra sizni ko'proq
Suyar edi,
Eslab qo'ying,
Sizga bandi yuragimni.
Ketmoqdasiz.
Qayga boray man?
Bog'lab ketdingizmi ko'zimni?
To'rt tarafga o't yoqmoqdasiz,
Ayting,
Qayga qo'yay o'zimni?
KEChIRDIM
Kun bermay keldilar, kechirdim doim
Kechirdim na gina, na arazim bor.
Kuchsiz qilib qo'yma meni, Xudoyim,
Kuchsizlar kechirmay bo'ladilar xor…
* * *
Qara, osmon qanday besarhad,
Ko'kda oppoq oy suzib yurar.
Xayolimda abadul-abad,
Chehrang shu oy singari turar.
Yer yuzida qoldirmay belgi,
Bir kun tanni tark aylasa jon.
Ko'kda qolar bizlarning sevgi,
Hamda shu oy, yulduzli osmon.
ShAHZODA
Sha'ningga she'r bitay desam,
Alanga oldi-ku qog'oz.
Husningni madh etay desam,
Zabonimdan chiqmas ovoz.
Odam zoti shuncha go'zal,
Dilni shuncha eturmi rom.
A'lo nursan, hur, mukammal,
Hushu aqlim olding, tamom.
Oh, bitmoqqa dildagi rozim,
Navoiyday yozmog'im lozim.
ShOIR
Yuragini yorardi,
G'alayonlarning ahdi.
Umri o'tib borardi,
So'nib borardi shahdi.
Ko'tarolmadi isyon,
Taqdiriga berdi tan.
U she'r bitmagan qog'oz
Oq qoldi misli kafan.
…Shoir istagi erkdir,
Tangrim uni qilma xor.
Sharaf bayrog'i erur,
Shoirlar osilgan dor.
Men yuksak cho'qqida turibman hamon
Yiqilsang, kimdir ko'p siqilma deydi.
Kimdir, endi bizga tiqilma, deydi.
Kimdir, taqdirga tan bergisi kelmay,
Ayb sening o'zingda, yiqilma deydi.
Tomosha qilaman charxi olamni.
Har inson o'tkazgan alamni, g'amni.
Bu dunyo charx kabi aylanar ekan,
Yiqitib ko'radi har bir odamni.
Shon-shuhrat, gul berib sinaydi Xudo.
Taxt, hurmat, pul berib sinaydi Xudo.
Aslo yiqilmasman deya o'ylama,
Choh to'la yo'l berib, sinaydi Xudo.
Ey, meni yiqildi, degan olomon.
Meni ko'kda ko'rib, bo'lmang hech hayron.
Jisman yiqilsam-da, ruhan buyukman,
Men yuksak cho'qqida turibman hamon.
XAYR DEMANG, ONAJON!
Ketayapman.
Bo'ling sog', omon.
Dilni to'kdi g'ussalaringiz.
Nega xayr deysiz, onajon,
Buncha cho'kdi jussalaringiz?
Xayr demang, yo'q-yo'q, Onajon,
Yo'q, rizolik so'ramang ortiq.
Undan ko'ra so'rang mendan jon,
Men jonimni etayin tortiq.
Qartayibsiz.
Ko'zim o'yar g'am.
Jazolama, ko'kda qodir Zot.
Xudo, bergin onamga malham,
Yana bir yil baxsh etgin hayot.
Har dam uchun shukrona aytay,
Har dam uchun bo'lay qarzdor.
Har dam uchun boshim ko'tarmay,
Sajda qilay toki onam bor.
Unga o'n yil umr ber, Tangrim,
Unga yuz yil hayot ber, Xudo.
Mukka tushib ming yil so'rardim,
Ming yil bizni etmasang judo.
Yolvoraman har yon urib bosh.
Zor-zor titrab, bo'zlayman nolon.
Ayriliqqa berolmayman dosh,
Xayr demang, yo'q-yo'q, onajon!
Ketayapman, ammo bilaman,
Ayirasan bizlarni bir kun.
Tiriklayin dorga ilasan,
Ko'k yuzini qoplar qaro tun.
Bizni bog'lar yerdan Xudoga
Ona bergan jonning rishtasi.
Ona loyiq mangu duoga,
Ona Yer-u ko'k farishtasi.
Yuragimning bor hujayrasi,
Ko'zim, qalbim, tanimdagi jon.
Yolvoradi barcha-barchasi,
Xayr demang, yo'q-yo'q, onajon!
Yurak chiqsin qinidan azot,
Mayli chiqsin ko'z xonasidan.
Ayrilmasin ammo hech bir zot,
Volidasi, o'z onasidan.
Yo'q, so'ramang rozi-rizolik.
Qulayapman go'yoki jarga.
Qarshimdadir go'yo judolik,
Zulmatga men go'yo badarg'a.
Go'yo endi yo'qlikda umrim,
Bir yil, o'n yil turar osilib.
Qayg'ulardan qorayar turqim,
Qora tunlar nuqsi bosilib.
Gar suv bossa Yerning yuzini.
Bu ofatga shay yashar inson.
Onasiga “Xayr” so'zini,
Ammo ayta olmas hech qachon.
Xayr demang,
aslo, Onajon…
* * *
Ayozli kun aylandi,
Bulutli kun buraldi,
Ko'rinarli,
tushunarsiz
Ko'nikmalar yaraldi.
Archa bargi shapaloq,
Bargda laxtak qor.
Tanazzulda yashamoq,
Yaxtak-yaxtak or.
Ho', sovuqda muzlab qolgan
Nur, shovqin-u soyalar
Tushib mahkum ahvolga,
Sarxushlikni sog'inar.
Hey,
Havo ilgagiga,
Yuragimni osaman!
Olib ketsin keragicha,
Kimki o'tsa ko'chadan!
Musiqaviy xayol, yohu,
Baxt kuyini taratdi.
Samoviy ishq sarob, og'u,
Nega uni yaratdik?
Shunday bo'ldi.
Toki sevsam,
sizga qaytar yo'llarim berk.
Sevmaslikka qo'ymas ammo,
Ruhdagi kuch,
dildagi erk.