Yaratilgan imkoniyatlar — yutuqlar garovi

Sirdaryo viloyatida respublika va viloyat OAV vakillari ishtirokida media-tur o'tkazildi

Bugungi kunda barcha jabhada keng ko'lamli islohotlar jadallik bilan amalga oshirilmoqda. Bu borada Sirdaryo viloyatida ham ishlab chiqarish korxonalarining soni ortib borishi, aholiga qulaylik yaratish, jamiyatni ijtimoiy-siyosiy rivojlantirish, umuman barcha ishlar Inson qadrini ulug'lash tamoyiliga hamohang.

Sanoatni, ishlab chiqarishni rivojlantirish borasida Sirdaryo tumanidagi “PENG SHENG”  O'zbekiston – Xitoy qo'shma korxonasining bugungi investitsion imkoniyati 100 million dollardan ortiq. Korxonada 2000 nafardan ziyod ishchi faoliyat olib boradi. 

— Yildan-yilga talab va tak­liflardan kelib chiqib, yangi mahsulotlar ishlab chiqarishga harakat qilmoqdamiz. Eksport salohiyatini oshirish va geografiyasini ham kengaytirish ustida qator ishlar amalga oshirilmoqda. 2024 yilda jelatindan — protein, poletrol granulalari, katta hajmdagi kafel mahsulotlarini ishlab chiqarishni rejalashtirayapmiz. Bundan tashqari, vannalarni marmar toshlardan yaratish bo'yicha Yevropa davlatlaridan takliflar tushgan. Santexnika jihozlarining o'zi 40 dan ortiq turda ishlab chiqarilmoqda. Hozirda santexnika uskunalariga sensor tizimlarini o'rnatish ustida ham ish olib borayapmizki, bu loyiha amalga oshsa, nogironligi bor fuqarolarimiz uchun yanada qulayliklar yaratiladi, – dedi “PENG SHENG” O'zbekiston – Xitoy qo'shma korxonasi bosh direktori o'rinbosari G'ofirjon Ahmedov.

Jurnalistlar borgan navbatdagi manzil 2000 nafarga yaqin, asosan, xotin-qizlarni ish bilan ta'minlagan “SIRDARYO MEGA LUKS” korxonasi bo'ldi.

— Korxonamiz  polipropelin, polietilendan qop va sellofan kabi qadoqlash mahsulotlarini ishlab chiqarmoqda. Bu sohada nafaqat O'zbekistonda, balki MDH davlatlari orasida eng yirik korxonalardan biri hisoblanadi.

Bir yilda 25 ming tonnadan ortiq xomashyoni qayta ishlab chiqara olish kuchiga egamiz. 2023 yilning 11 oyida 600 milliard so'm qiymatga yaqin mahsulotimizning 35 foizi, ya'ni 200 milliard so'mdan ortig'i eksportga yo'naltirildi, – dedi bosh direktor o'rinbosari Nodir Bo'ronboyev.

Oqoltin tumanidagi paxta to'qimachilikka asoslangan “SARDOBA UNIVERSAL” klasteriga qarashli agromarkazning loyiha qiymati 5 million dollarni tashkil etar ekan.

— Korxonamizda issiqxonalar qurish, o'simliklarni himoya qilish, tup­roq va suv tahlil laboratoriyasi, agronom maslahati, veterinariya dorixonasi, urug' va ko'chatlar yetkazib berish kabi xizmatlar yo'lga qo'yilgan. Bundan tashqari, fermer va dehqonlar uchun agromarket do'konlari ham mavjud. Dehqon-fermerlarimizga tegishli barcha yerlar konturlarga ajratilib, raqamlashtirilgan. Bu orqali qaysi yerga qancha o'g'it, qancha suv zarurligi ko'rsatib beriladi. Buning natijasida ortiqcha isrofgarchilikning oldi olinadi, hosildorlik oshadi. Agromarkazda barcha dehqon-fermerlarimiz o'zlarini qiziqtirgan savollarga javob olishlari mumkin, – dedi “SARDOBA UNIVERSAL” klasteri mutaxassisi Komilxo'ja Eshonxonov.

Oqoltin tumanida Prezidentimiz tashabbusi bilan “Mustaqillik” mahallasida “Obod mahalla, obod ko'cha va obod xonadon” mezonlari asosida aholining bugungi kunda hayotdan rozi bo'lishlari uchun barcha sharoit va qulayliklar yaratib berilganligi ham diqqatga sazovordir.

Kunning ikkinchi yarmida Yangier shahrida 2022 yilda ishga tushirilgan “ECO plyus” WOOD mebelsozlik klasteri faoliyati bilan ham yaqindan tanishildi.

— Bu yerda tayyorlanayotgan mebel jihozlari barcha zamonaviy standartlarga javob bera oladi. Bugungi kunda 100 nafardan ortiq ishchilar faoliyat olib boradi. 2024 yilda loyiha qiymatini 20 million dollarga yetkazib, 250 nafar yangi ishchi o'rni yaratishni reja qilganmiz. Uskunalar Xitoy va Turkiya davlatlaridan keltirilgan, – dedi Yangier shahar hokimi o'rinbosari Elyor O'narov.

Xovos tumanidagi Turkiya davlatining “Cengiz Enerji San. ve Tic A.Ş.” kompaniyasi bilan hamkorlikda yo'lga qo'­yilgan quvvati 220 mVt bo'lgan “CENERGO” gaz-porshenli elektr stansiyasi muvaffaqiyatli faoliyat ko'rsatmoqda. Bu korxonadagi ish samaradorligi tufayli yiliga elektr­dan 1,7 millliard kVt va 150 million m³ gaz tejaladi. Buning natijasida 685 million kVt soat elektr energiya ishlab chiqarilishi diqqatga sazovordir.

Media-tur so'ngida viloyat hokimi Akmaljon Mahmudaliyev ishtirokida matbuot anjumani o'tkazildi. Viloyat rahbari so'nggi yillarda Yurtboshimiz Shavkat Mirziyoyev tomonidan yaratib berilayotgan imkoniyatlar negizida Sirdaryo viloyatining ijtimoiy-siyosiy hayotidagi o'zgarishlar haqida so'zladi. 2023 yil yakuni va kelgusi  2024 yilda amalga oshirilishi rejalashtirilgan ishlar xususida atroflicha to'xtaldi. O'z navbatida jurnalistlarni qiziqtirgan  savollarga   batafsil javob berdi.

Bahrom BOYMURODOV.