Radar o'rnatgan tadbirkor yo'lning sozligiga ham mas'ul bo'lsin
Qishning qorli-qirovli kunlaridan keyin har doimgidek viloyatlarni bir-biri bilan bog'laydigan aksariyat trassalar juda yomon ahvolga kelib qolgan. Gohida toshbaqa yurish qilmasa bo'lmaydigan joylar bor. Sabringiz chidamay, salgina gazni qattiqroq bossangiz, tamom, jabrini o'zingiz tortasiz. Yo'l bo'ylarida ballonini almashtirayotganlarga ko'zingiz tushayotgandir. Ko'p ular.
Lekin bundaylarning hammasini ham besabr deyolmaymiz. Chuqur ko'p, ha, endi birortasiga qattiqroq tushgan-da. O'zidan o'tganini o'zi biladi. Ichida nima deyapti, kimning sha'niga “chiroyli” gaplar aytyapti, o'ziga ayon. Ahvolini tushunsa bo'ladi. Hamyonga, ro'zg'orga zarar.
Faqat viloyatlararo emas, hatto Toshkent shahri yo'llarida ham o'ydim-chuqur to'lib yotibdi. Ayrim chorrahalarda avtomobillar chiziqni bosib qo'ymayin, kameraga tushmayin deb chuqurga tushib o'tishga majbur bo'lyapti. Poytaxt uchun uyat-da endi bu manzara. Xorijlik mehmonlar oldida ham xijolatli.
Biz: “Shuncha mablag' ajratilyapti, soliq to'layapmiz, nega ahvol doim shunday?” deb savol berishdan charchamaymiz, yo'lchilar esa: “Hammasi joyida bo'ladi, tuzatamiz”, deya zarracha xijolat chekmay javob berishdan chekinmaydi. Qilingan yo'l ko'pincha bir mavsumga yaraydi. Har yili shu ahvol, shu mavzu.
Endi bir taklif-da. Mana shu yo'llarning soz holatda bo'lishini ta'minlash mas'uliyatini o'sha hududga radar o'rnatib, daromad ko'rayotgan tadbirkorga yuklasa, maqsadga muvofiq bo'lardi. Qolaversa, bu adolatdan ham bo'lardi. Davlat shuncha imkoniyat berib qo'yibdi. Shoshgan borki, jarimaga tushib, radarchi tadbirkorga foyda keltiryapti. Nega endi jamiyat uning xizmatidan naf ko'rmasligi kerak? Sizdan ugina, bizdan bugina-da. Radar o'rnatilgan hududdan qanchadir qismi, masofasi bo'lib berilsin. Buzilsa, tadbirkor akamiz tuzattirsin. Buyam davlat-xususiy sheriklikning bir ko'rinishi bo'ladi. Ana keyin chiziq deydimi, tezlik deydimi, kim bosarkin, kim “uchar”kin deb poylab o'tiraveradi. To'g'rimi?
Manba:
platforma.uz