O'zbekiston va Qozog'iston: O'zaro hamkorlik Markaziy Osiyodagi barqarorlikni belgilaydi

Xorijiy ekspertlar Xivada bo'lib o'tgan oliy darajadagi O'zbekiston-Qozog'iston sammiti yakunlari haqida

 

Ma'lumki, Prezidentimiz Shavkat Mirziyoyev­­ning taklifiga binoan Qozog'iston Respublikasi Prezidenti Qasim-Jomart Toqayev shu yil 5 aprel kuni tashrif bilan mamlakatimizga keldi. Ikki davlat rahbarlarining qadimiy Xiva shahridagi uchrashuvi o'zbek va qozoq xalqlarini bog'lovchi tarixiy ildizlar naqadar teran ekanligining ramziy ifodasi bo'ldi.

Tashrif bir kunlik bo'lishiga qaramay, uning natijalari mazkur uchrashuvning dolzarbligi va samaradorligini namoyon etdi. O'zbekiston-Qozog'iston uchrashuvi va uning yakunlari xorijiy ekspertlar hamjamiyati tomonidan ham yuqori baholanmoqda.

Jan-Antuan Dyuprat, Yevropada prognozlash va xavfsizlik instituti eksperti, O'zbekis­ton bo'yicha mutaxassis:

— Ushbu tashrif qardosh davlatlar va xalqlar o'rtasidagi vaqt sinovidan o'tgan yaxshi qo'shnichilik munosabatlarining yana bir yorqin ifodasidir.

O'zbekiston va Qozog'iston yetakchilarining bugungi kunda butun Markaziy Osiyo uchun katta siyosiy ahamiyatga ega bo'lgan do'stlik, yaxshi qo'shnichilik va keng ko'lamli sherik­likni yanada mustahkamlash istagining yorqin tasdig'i deyish mumkin.

Davlatlar rahbarlarining o'zaro ishonch ruhida o'tgan uchrashuvi davomida erishilgan kelishuvlar O'zbekis­ton-Qozog'iston strategik sheriklik va ittifoqchilik munosabatlarini mustahkamlashga qo'shimcha turtki berishi shubhasiz.

Ikki qo'shni davlat o'rtasidagi o'zaro hamkorlikning hozirgi eng yuqori darajasiga ko'p jihatdan O'zbekiston va Qozog'iston Prezidentlarining o'rnatilgan yaqin muloqoti natijasida erishildi va bu ikki tomonlama aloqalarni rivojlantirishga zamin yaratmoqda.

Ishonch bilan aytishimiz mumkinki, O'zbekiston va Qozog'iston o'rtasidagi hamkorlik qanchalik kuchli va muvaffaqiyatli bo'lsa, Markaziy Osiyodagi vaziyat ham shunchalik barqaror bo'ladi.

Maks Sey, Malayziyaning “Kingsley Strategic Institute” instituti ijrochi  direktori:

— Tashrif yakunlari tomonlarning ikki davlat o'rtasidagi ko'p asrlik do'stlik, yaxshi qo'shnichilik, o'zaro ishonch va keng ko'lamli sheriklikni yanada mustahkamlashga bo'lgan qat'iy niyatini yana bir bor namoyon etdi.

So'nggi yillarda ushbu davlatlar o'rtasidagi ikki tomonlama munosabatlar mutlaqo yangi bosqichga ko'tarilib, tarixiy natijalarga erishildi. Xususan, siyosiy muloqot faollashdi, savdo-iqtisodiy va investitsiyaviy aloqalar kengaytirildi, faol hududlararo hamkorlik yo'lga qo'yildi.

O'zaro tovar ayirboshlash hajmini oshirish, iqtisodiyotning asosiy tarmoqlarida kooperatsiya aloqalarini rivojlantirish, transport va energetika sohasidagi infratuzilma loyihalarini amaliy ro'yobga chiqarish, gumanitar almashinuv das­turlarini faollashtirish va turizm aloqalarini rivojlantirish bo'yicha oliy darajadagi muzokaralar davomida ko'tarilgan dolzarb masalalar alohida e'tiborga molikdir.

Denis Bardakov, qirg'izistonlik siyosatshunos:

— Tashrif butun Markaziy Osiyo mintaqasi uchun katta siyosiy ahamiyatga ega. Qozog'iston uchun ham xuddi shunday jiddiy iqtisodiy salohiyatga ega strategik muhim davlat sifatida O'zbekiston bilan ikki tomonlama yaqin hamkorlikni rivojlantirish zarur.

Ikki mamlakat iqtisodiyotining rivojlanishi investitsiyaviy, transport-logistika va savdo sohalarida hamkorlik qilish uchun qulay shart-sharoitlar yaratmoqda.

Bugungi kunda Markaziy Osiyoning barcha davlatlari orasida O'zbekis­ton Qozog'iston bilan eng kam hal qilinmagan masalalarga ega. Shu bilan birga, kun tartibidagi asosiy vazifalardan biri hududiy suv resurslaridan oqilona foydalanishdir. Transchegaraviy daryolarning quyi oqimida joylashgan Qozog'iston va O'zbekiston daryoning yuqori oqimidagi Qirg'iziston va Tojikiston bilan birlashgan holda suv resurslaridan foydalanish bo'yicha yagona strategiya ishlab chiqishi kerak. Shu yil Qozog'istonda bo'lib o'tadigan Markaziy Osiyo davlatlari rahbarlarining Maslahat uchrashuvida bu masala yanada batafsil muhokama qilinishiga shubham yo'q.

“Dunyo” AA.

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

5 + three =