Shabnamlar ko'nglimni chaysalar…
Gulchehra ShAHOBIDDIN qizi
Muallif haqida:
Gulchehra ShAHOBIDDIN qizi — Jizzax shahrida tug'ilgan. O'zbekiston Yozuvchilar uyushmasi va O'zbekiston Jurnalistlar uyushmasi a'zosi.
Shoirning “Sog'inch”, “Yangi oy chiqqan kecha”, “Dilda darding bo'lmasa”, “Qaldirg'ochim”, “Jon ichra jondir Vatan”, “Sadarayhon ifori”, “Onajon, kechir”, “Baxt xumori”, “Sizni sog'indim”, “So'z zarbi”, “Qaqnus qo'shig'i” kabi she'riy to'plamlari e'lon qilingan.
ERTAGINGNI AYT
Ko'zlarimga uyqu begona,
Umid dilga hamroh, dugona,
Yorni kutib bo'ldim devona,
Shahrizodam, ertagingni ayt.
Xali qirq kun, tongu tunlar bor,
Yuragimda mahzun unlar bor,
Ko'zlarimda ketmas munglar bor,
Shahrizodam, ertagingni ayt.
Mayli, kunni tunlarga ulab,
Otar tongdan toleim tilab,
Hijron tog'i tushmasdan qulab,
Shahrizodam, ertagingni ayt.
Shahrizodam, cho'pchaging yolg'on,
Yolg'onlardan yuragim tolgan,
O'shal bedil, beishq, bedardning
Tosh ko'nglini tosh sanam olgan.
Aytsang uning qaytishidan ayt,
Menga dilroz aytishidan ayt,
Visol so'zin dilga etdim qayd,
Shahrizodam, sen rostidan ayt.
Kun botmoqda, yordan xabar yo'q,
Iztirobdan yuragimda cho'g',
Xiyonatdan tegmasin deb o'q,
Shahrizodam, ertagingni ayt.
Subhidamdan umid rostlar qad,
Hajr so'zin aylabon qahat,
Baxt faslidan kelibdi to'yxat,
Shahrizodam, ertagingni ayt.
Dil ishqidan yaralmoqda bayt,
Kunmi, tunmi, u qandayin payt,
Endi faqat baxtdan ertak ayt,
Shahrizodam, ertagingni ayt.
Ayt, bo'lmasa tugaydi bu bayt!
* * *
Kitob o'qimaganning
Yuzlari nursiz bo'lar,
Kunlarining fayzi yo'q,
Qalbi huzursiz bo'lar.
So'zlari ham ma'nisiz
Gaplari “tuz”siz bo'lar
Kitob o'qimaganning.
O'qirman bor, bori – oz,
Bu dardki, kuydirar boz.
Qo'lni qo'lga bersak soz,
Jam bo'lib hamma hamroz,
Telefonlardan kechib voz,
Kitobga bo'lsak peshvoz,
Qandayin soz, qanday soz,
Har bir kitob — bir ustoz!
AJR
Ko'nglim, sen aylama bunchalar oh-zor,
Bandaning bergani bandaga ozor.
Ne so'rsang birgina O'zidan so'ra,
Avvalu oxiring bo'lmas aslo xor.
Boshing sajdaga qo'y, so'rayver bot-bot,
Birgina beminnat berguvchi ul zot.
Duoga qo'l ochib etgil munojot,
Haqdan o'zga hech kim berolmas najot!
Har kimga yarasha beradi ajr,
Kimga ishq berguvsi, kimgadir xajr.
Ne so'rsang birgina O'zidan so'ra,
Bersa mukofotdir, bermasa xayr.
…Avvalu oxiring bo'lsin baxayr!
BIR MUHABBAT IZLADIM
Halovat topmadim
bir lahza yorsiz,
Vaslingga yetmadim
tunlar bedorsiz.
Ishqda baxt bormikan
Azob-ozorsiz —
Bir muhabbat izladim takrorsiz.
Muhabbat bormikan
malomat, xorsiz?
Yo visol bormikin
hijronsiz, zorsiz?
Istadim bir go'sha
bo'lsa ag'yorsiz,
Bir muhabbat izladim takrorsiz.
Cho'qqida viqor yo'q,
bo'lsa gar qorsiz,
Siz mening dilimga
qaytmas bahorsiz.
Bu go'zal bo'stonda
nahot men yorsiz,
Bir muhabbat izladim takrorsiz.
GULLAShGA ULGURDIM
Bahor bo'lgim keldi,
gul bo'lgim keldi,
Loladek qirlarga
yugurdim.
Shabnamga chayilgan
dil bo'lgim keldi,
Gulladim, gullashga
ulgurdim.
Yashillangim keldi,
ko'kargim keldi,
Qo'shiqlar kuylasam
zangori.
Qaddimni sarvdayin
ko'targim keldi,
Yo'llarim bo'lsalar
anvori.
Shabnamlar ko'nglimni
chaysalar,
Yomg'irlar yuvsalar
yuzimni.
Barq urib yashnasa
maysalar,
Chechaklar qoplasa
izimni.
Ochilsam, gul bo'lib
ochilsam,
Iforim sochilsa
har tomon.
Tog'larga, bog'larga
shoshilsam,
Nihollar barg yozsa
sog'-omon.
axir men bahorman,
gulman,
chechakman,
ketsam-da, har fasl
bir kelajakman,
kokillari yashil,
qo'shig'i zangor,
kurtakdek qiqirlab,
shod kulajakman.
…men fasli bahorman,
chamanman, gulman.
MEN O'ShA
Toshni yorib ungan gul,
Daryo bo'lib tingan dil,
Cho'g'i o'chib so'ngan kul —
Men o'sha.
Xiyonatlarga yovman,
Yondirguvchi olovman,
Shunday yuragi dovman —
Men o'sha.
Ul isyonkor, ul yomon,
Rangi za'faron, somon,
Shuncha g'amdan ham omon —
Men o'sha.
Yashasa-da izi yo'q,
Otash-olov so'zi yo'q,
Dardi bor-u, bo'zi yo'q —
Men o'sha.
Oyman — qo'ling yetmagan,
Ishqi dildan ketmagan,
Alamlari bitmagan —
Men o'sha.
Muhabbatdan dil yakson,
O'n gulim bari xazon,
Qalbida ishqdan to'zon —
Men o'sha…
GUL
Seni ochilmoqqa qo'ymadilar, gul,
Senga zulm qilib to'ymadilar, gul,
Alafni gul deya boshga qo'ydilar,
Seni Gul o'rnida suymadilar, gul.
Ularni mast qilmas sendagi ifor,
Ular o'ta badnafs, o'ta zulmkor.
Faqat sen bosh egma, barg yoz umidvor,
Ular gulligingni bilmadilar, gul.
Ular shunday kasdir, ko'z yoshlar bekor,
O'zidan o'zgani aylarlar inkor.
Ularda yurak yo'q, bir parcha go'sht bor,
Seni ochilmoqqa qo'ymadilar, gul.
Xohlasa boshingda qorlar yog'dirar,
Barglaringni yular, esdan og'dirar.
Alar yomonlik-la ko'ngli chog' turar,
Seni bir gulchalik suymadilar, gul.
Ular yomonligin qo'ymadilar, GUL,
Senga azob berib to'ymadilar, gul.
Bechora gulim-a, chorasiz gulim,
Sening darding chekib yig'laydi ko'nglim.
Seni bahoringga bermadilar, gul!..