O'zbekiston-Rossiya: Davlatlararo hamkorlik tarixida yangi sahifa ochildi

Joriy yilning 26-27 may kunlari bo'lib o'tgan oliy darajadagi O'zbekis­ton-Rossiya muzokaralarining samarali natijalari ikki davlatning ko'p qirrali hamkorlikni yanada kengaytirishga intilishini tasdiqladi va davlatlararo munosabatlarda yangi sahifa ochdi.

Xalqaro ekspertlar ta'kidiga ko'ra, mazkur tashrif ikki tomonlama munosabatlarning bugungi kundagi yuksak darajasi, o'ziga xos xususiyati va  davlatlararo hamkorlikning barcha soha hamda yo'nalishlarini qamrab olgani bilan ahamiyatli bo'ldi.

Li YuNSYuAN,

Xitoy Davlat kengashi huzuridagi Taraqqiyot tadqiqotlari markazi Yevropa va Osiyo ijtimoiy taraqqiyot instituti direktori:

— Prezident Vladimir Putinning O'zbekistonga davlat tashrifi Rossiya rahbarining inauguratsiyadan so'ng Markaziy Osiyoga ilk tashrifi bo'ldi. Bu O'zbekis­ton va Rossiya o'rtasidagi munosabatlar yuksak darajada ekanligini ko'rsatadi.

Rossiya O'zbekistonning an'anaviy hamkoridir. Mamlakatlar ikki tomonlama munosabatlarni 2005 yildayoq strategik sheriklik va ittifoqchilik darajasiga ko'targan.

O'zbekistonda Prezident Shavkat Mirziyoyev rahnamoligida oqilona, mus­taqil va mutanosib tashqi siyosat olib borilmoqda. O'zbekiston qo'shni davlatlar bilan ham, mintaqadan tashqaridagi yirik hamkorlari bilan ham ko'p qirrali hamkorlikni rivojlantirmoqda.

Rasmiy Toshkent va Moskva o'rtasida savdo-iqtisodiy hamda investitsiyaviy hamkorlikni yanada rivojlantirish uchun keng imkoniyatlar yaratilganini ta'kid­lash kerak. Amalga oshirilayotgan keng ko'lamli islohotlar tufayli O'zbekis­ton xorijiy investorlar uchun juda jozibali hamkorga aylandi. Bu ikki mamlakat xalqlarining taraqqiyoti va farovonligi manfaatlari yo'lida hamkorlik qilish uchun eng keng imkoniyatlarni ochib beradi.

O'zbekiston va Rossiya rahbarlarining muzokaralari kun tartibidan strategik sheriklik va ittifoqchilik munosabatlarini yanada mustahkamlash, savdo-iqtisodiy, investitsiyaviy va madaniy-gumanitar aloqalarni rivojlantirish masalalari o'rin oldi.

Ikki tomonlama hamkorlikni yanada mustahkamlashga qaratilgan yangi kelishuvlarga erishish nafaqat ikki davlatning iqtisodiy rivojlanishiga, balki butun Markaziy Osiyo barqarorligi, xavfsizligi va taraqqiyotiga xizmat qilishi shubhasiz. Shu munosabat bilan O'zbekistonning pragmatik tashqi siyosati Markaziy Osiyo mintaqasi xavfsizligi va barqaror rivojlanishining kafolati hisoblanadi.

Remko REYDING,

“Sovet shon-sharaf maydoni” jamg'armasi direktori: (Niderlandiya)

— Rossiya Prezidenti Vladimir Putinning Toshkentdagi “G'alaba bog'i” yodgorlik maj­muasiga tashrifi sobiq ittifoq hududidagi ko'p­lab odamlar uchun Ikkinchi jahon urushi xotirasi muhimligini ta'kidlaydi.

Ikkinchi jahon urushida O'zbekiston xalqi juda katta qurbonlar berdi, bu urushda amerikalik askarlardan ko'ra, ko'proq o'zbek askarlari halok bo'lgan.

Niderlandiyaning Lyoysden shahrida “Sovet shon-sharaf maydoni” joylashgan harbiy qabriston hududida 865 nafar Ikkinchi jahon urushi qurbonlari dafn etilgan.

Ular orasida fashistlar rejimi tomonidan qatl etilgan ko'p­lab ruslar va o'zbekistonlik 101 ta askar ham bor. Urushdan keyin bu qabriston tashlandiq va unutilgan edi.

25 yildan ortiq vaqtdan beri “Sovet shon-sharaf maydoni” jamg'armasi ushbu askarlarning taqdiriga e'tibor qaratish, ularning shaxsini aniqlash, oilalarini topish va xotirasini abadiylashtirishga harakat qilmoqda.

Biz O'zbekiston va Rossiya hukumatlarining ushbu askarlar xotirasini asrab-avaylash borasidagi sa'y-harakatlarimizni qo'llab-quvvatlaganini, shuningdek, urushdan keyin otasiz va bobosiz yashashga majbur bo'lganlar, urushda halok bo'lgan askarlar va ularning yaqinlariga bag'ishlangan muzey tashkil etganini yuksak qadrlaymiz.

Tadqiqotlarimiz asosida O'zbekiston hukumati Niderlandiyada halok bo'lgan 101 nafar askarga “G'alaba bog'i”da maxsus burchak ajratdi. Bu fashist­lar Germaniyasiga qarshi birgalikda kurashgan xalqlarimiz o'rtasidagi tarixiy aloqalarning inkor etib bo'lmas isboti, shuningdek, mamlakatlarimiz o'rtasidagi zamonaviy hamkorlikning ajoyib namunasidir.

 Viktor KIM,

Tojikiston Milliy fanlar akademiyasining Falsafa, siyosatshunoslik va huquq instituti ilmiy xodimi:

– Davlat rahbarining inauguratsiya marosimidan keyingi dastlabki qadamlari hamisha jahon hamjamiyatining diqqatini tortadi. Shu bois Prezident Vladimir Putinning tashrifi O'zbekiston va Rossiya o'rtasidagi ikki tomonlama munosabatlarni rivojlantirishda muhim voqea bo'ldi.

O'zaro munosabatlar rivojiga 2000 yilda, birinchi marta Rossiya Prezidenti etib saylanganidan so'ng Vladimir Putin O'zbekistonga ilk tashrifini amalga oshirganida ham kuchli turtki bergan edi.

Tomonlarning barqaror savdo-iqtisodiy va sarmoyaviy faolligi fonida hududlararo hamkorlik, ta'lim va sport sohalarida o'zaro hamkorlikni rivojlantirish e'tiborni tortmoqda.

O'zbekiston va Rossiya o'rtasidagi barqaror ikki tomonlama munosabatlarning asosi ikki davlat siyo­satidagi manfaatlar va ustuvorliklarning mos kelishidir.

Rossiya rahbarining ilk xorijiy safarlari geografiyasi shuni ko'rsatadiki, Rossiya tashqi siyosatining ustuvor yo'nalishlari belgilab berilgan va O'zbekiston unda doimo alohida, muhim o'rin tutadi.

Rajesh Mehta,

BRIKS savdo-sanoat palatasi ijrochi direktori: (Hindiston)

— Prezident Shavkat Mirziyoyev Prezident Vladimir Putinning O'zbekistonga tashrifi ikki davlat o'rtasidagi keng qamrovli strategik sheriklik va ittifoqchilik munosabatlarida yangi bosqichni boshlab berganini alohida ta'kidladi. Samarali muzokaralar va sermazmun muloqotlar natijasida erishilgan kelishuvlar va imzolangan hujjatlar O'zbekiston yetakchisining fikrlarini amaliy tasdiqladi.

E'tiborli jihati shundaki, tashrif doirasida tomonlar yangi yuqori marra, ya'ni yaqin istiqbolda o'zaro savdo hajmini 30 milliard dollarga yetkazish bo'yicha kelishuvga erishdi. Rossiyada tashkil etiladigan O'zbekistonning to'laqonli savdo vakolatxonasi, ishga tushirilayotgan qo'shma Investitsiya platformasi ushbu maqsadga erishishda muhim rol o'ynaydi.

Muloqotlar chog'ida tomonlarning o'zaro hamkorlikni yanada boyitish, hali to'la foydalanilmagan salohiyatni samarali harakatga keltirishga bo'lgan intilishi yaqqol ko'zga tashlandi. O'zbekiston va Rossiya yetakchilarining samimiy va o'zaro ishonchga asos­langan munosabatlari ikki davlat o'rtasidagi ko'p qirrali hamkorlikni yangi bosqichga olib chiqishda muhim va mustahkam asos bo'lmoqda.

O'zbekiston va Rossiya vakillari energetika, metallurgiya, neft-kimyo, mashinasozlik, tog'-kon sanoati, qishloq xo'jaligi, logistika, farmatsevtika, sun'iy intellekt, oliy ta'lim, hududlararo hamkorlik va boshqa ko'plab yo'nalishlarda yangi loyihalarni amalga oshirishga kelishib olgani yaqin kelajakda ikki tomonlama munosabatlar izchil sur'atlarda rivoj topishidan dalolat beradi.

Sheradil BAKTIGULOV, Qirg'iziston Prezidenti huzuridagi Strategik tadqiqotlar milliy instituti ilmiy xodimi:

— Bundan 20 yil avval, 2004 yil iyun oyida Toshkentda O'zbekiston va Rossiya o'rtasida asosiy davlatlararo hujjatlardan biriga aylangan Strategik sheriklik to'g'risidagi bitim imzolangan edi. Hujjat o'zaro ham­­­­korlikning asos­lari va yo'nalish­larini belgilab berdi.

O'sib borayotgan ikki tomonlama hamkorlik ko'rsatkichlaridan biri — bu  o'zaro tovar ayirboshlash bo'lib, u allaqachon o'n milliard AQSh dollarlik dovondan oshgan.

Ikki davlat o'rtasidagi hamkorlik ko'plab sohalarda, jumladan, energetika, aerokosmik, kimyo muhandisligi, ta'lim, transport, infratuzilma, qishloq xo'jaligi va boshqalarda ham izchil rivoj­lanishini kutib qolamiz. Zotan, O'zbekiston va Rossiya iqtisodiyoti bir-birini to'ldiradi.

Prezident Vladimir Putinning Toshkentga davlat tashrifi uning 2024 yil mart oyida davlat  rahbari sifatida qayta saylanganidan keyin O'zbekiston uchun alohida ahamiyatga ega. Joriy yilning may oyida Vladimir Putin o'zining inauguratsiya marosimidagi nutqida Rossiya tashqi siyosatida Markaziy Osiyo davlatlari bilan hamkorlikni mustahkamlash ustuvor yo'nalish ekanligini tasdiqladi.

Prezident Shavkat Mirziyoyev 2016 yilda O'zbekis­tonning mintaqadagi qo'shnilari bilan hamkorligi ustuvorligini e'lon qilgan edi. Ko'rib turganimizdek, har ikki prezidentning tashqi siyosat yo'lida o'xshash strategik qarashlari mavjud.

Qolaversa, O'zbekiston Rossiyaning Markaziy Osiyo mintaqasidagi strategik hamkori va ittifoqchisidir. Ikki davlat o'rtasidagi munosabatlar ishonchli va do'stona siyosiy muloqot bilan ajralib turadi. Hukumatlararo juda yaxshi muloqot o'rnatilgan. Uning ishonchliligini har ikki davlat hukumat rahbarlari darajasida Qo'shma komissiya tuzilgani tasdiqlaydi. Qo'shma komissiya doirasida ikki tomonlama faoliyatning barcha masalalari bo'yicha sa'y-harakatlar muvofiqlashtirilmoqda.

Shu  o'rinda  qayd etish kerakki, O'zbekiston va Rossiya o'rtasidagi munosabatlar juda mus­tahkam, prezidentlar Shavkat Mirziyoyev va Vladimir Putin esa ishonchli do'stlardir. Shuning  uchun, ishonch bilan  aytish mumkinki, ikki davlat rahbarlari rahnamoligida O'zbekis­ton va Rossiya o'rtasidagi hamkorlikni muvofiqlashtirish bo'yicha strategik sheriklik bugungi kunda o'zining eng yaxshi tarixiy davrini boshdan kechiryapti.

Eng muhimi, bunday hamkorlik nafaqat O'zbekiston va Rossiya aholisi, balki, butun Markaziy Osiyo xalqlari farovonligini oshirishga har tomonlama ta'sir ko'rsatmoqda.

“Dunyo” AA