G'alati qiliqlarimiz haqida
Ha, bu qiliq, bundan boshqa narsa emas. Har yili shunday voqea qaytariladi: dehqon kuyadi. Bu yil piyoz ekkan fermermi, tomorqachimi — bari kuydi. Piyoz pul emas, po'choq bo'ldi. Sho'ri qurigandan oddiy odamlarning sho'ri quridi, karsoni sindi.
Ayni kunlarda tarvuz ekkan mardum borki, fig'oni ko'kka o'rlamoqda. Toshkentda yo'l bo'ylari, bozorlardagi tarvuz rastalarini bir aylaning, bir quchoq keladigan tarvuzni 10 ming, 15 ming, deb o'tiribdi. Ustiga bularning ko'pi olibsotarlar. Demak, dehqon bechora ko'tarasiga besh-olti mingdan berayotir. Kechirasiz-u, bu pulga 0,5lik suv beradi hozir. Shu holat uning kosasini oqartirishiga ishonasizmi?! Bunga sabab nima? Katta ehtimol bilan sabab shuki, bizda ayni pishiqchilik payti chegaralarni yopib olamiz. Mayli, piyozu tarvuz-qovun paykalda chirib-irib ketsin, chegara postlardan qovun-tarvuz “karvon”larini chiqarmaymiz. Ammo bu cheklov hammagami, ba'zi bir agrofirma, tayyorlov idorasi niqobidagi ucharlarning kuniga o'nlab “Kamaz”lari chegarani kesib o'tmayotir, hammaga kelgan to'y, polizni birgalikda chiritamiz, kuysak birga kuyamiz, degan gapga kim ishonadi? Bu, bizning o'ziga xos qilig'imiz bo'ladi, og'aynilar.
Shunday paytda odam o'ylaydi, mamlakatda yer ham, odam ham ro'yxatda turadi, kim qaysi yerda nima ekadi, ichki bozorga qancha, masalan, piyoz ketadi, ortiqchasini qaysi chet bozorga sotishimiz mumkin, buning uchun kimlar bilan muzokara qilishimiz kerak, degan masalalarni o'ylaydigan tashkilot bormi o'zi? Qishloq xo'jaligi vazirligi va yana nomini aytishga odamning tili aylanmaydigan shu masalalarga mas'ul bo'lgan strategik va prognozlash qurumlari (idoralari — Tahr.) nima qiladi, odam tushunmaydi.
Maqsad nima o'zi, odamlarning turmushini o'nglashmi yoki shundog'am chatnab turgan kosasini urib sindirishmi?!
Hukumat mamlakatda yetishtirilgan hosilni realizatsiya qilish bo'yicha o'ylab ko'radigan vaqt esa allaqachon kelgan. Bu — jiddiy masala!
Manba: platforma.uz