Ustoz
Muallif haqida:
Odinayev Qurdosh Namozboy o'g'li — 1962 yilda Ohangaron tumanidagi Qoraxitoy qishlog'ida tug'ilgan. Toshkent davlat universiteti (hozirgi O'zbekiston Milliy universiteti)ning falsafa-iqtisod fakultetida tahsil olgan.
“Eskirgan mish-mish”, “Oriyatli bola”, “Tog'larga tutashgan yurt”, “Yangi davr bolalari”, “Ohangaron ohanglari” she'riy kitoblari muallifi.
Hozirgi kunda Angren universitetida faoliyat ko'rsatadi.
(Qutlov o'rnida)
Chigit g'uj unib chiqdi, qilish kerak yagana,
Yaganani tugatdik. O't bosibdi begona!
Damni olasiz qishda, yozda hashar qilamiz,
G'o'zani chopiq qilib, o't qoldirmay yulamiz!
Hokim aytar: “Tozalab, yo'l yoqasin oqlaysiz,
Birinchi rahbar o'tar, siz ishonchni oqlaysiz!”
Bir hafta o'qib, derlar: “Qo'ying shu bo'r, taxtani,
Maktab qochib ketmaydi, terish kerak paxtani!”
Necha-necha avlodga bergan bo'lsang-da ta'lim,
Yillar beminnat kosang oqarmadi, muallim!
Man-man degan rahbarlar o'tdi, rahmat aytmadi —
Oqibatni sen berding, ammo senga qaytmadi!
Necha yillar shu zaylda yashab kelding, muallim,
Qadru qimmating ortga tashlab kelding, muallim.
Islohot shabbodasi tepadan yelmaguncha,
Ilmu fan qadrin bilgan bir rahbar kelmaguncha.
Shavkat bilan, shaxt bilan islohotlar boshlandi,
Jahon tomon yuz tutib, katta qadam tashlandi.
Kitob tutib qo'liga barcha yoshu qarini,
Yuksaltirdi muallim, murabbiyning qadrini.
Olg'a surdi rahnamo zo'r bir yetakchi g'oya:
— Ta'limga sarmoya bu — kelajakka sarmoya!
Eng ustuvor sohaga aylandi endi ta'lim,
Katta hayot sahniga chiqdi endi muallim.
Balqib chiqdi nihoyat nurli ziyo quyoshing,
Artib olgin ko'zdagi shodlikdan oqqan yoshing.
Endi topding o'rningni, egik qadding tut azim —
Mag'rur ko'tar boshingni, ey, sen, aziz muallim!
Ta'limda yangilikdan aql qolmoqda shoshib,
Oylik — peshona tering asta bormoqda oshib,
Mehnating qadri yuksak, haloldir topgan oshing,
Ming dollarlik marrani ko'zlab turar Yurtboshing!
Cho'qqiga chiqsin yangi O'zbekistonda ta'lim,
Bayraming bo'lsin qutlug', ustoz hamda muallim!
Bu dunyoga tirgaksiz, Sizlar chayir ustunlar —
Bu olamda topilmas Sizdan o'tkir, ustunlar!
Qurdosh Namozboy o'g'li
Odinayev