Da'vatkor so'z qudrati
Prezidentimiz o'tgan hafta yangi tarkibdagi parlamentda bo'lib o'tgan qator majlislarda so'zga chiqib, mamlakatimiz taraqqiyotining hozirgi bosqichidagi muhim masalalar bo'yicha asosiy yo'nalishlarni belgilab bergani katta tarixiy voqea bo'ldi. Davlatimiz rahbari nutqlarida bildirilgan fikrlar nafaqat senator va deputatlar, balki shu yurtni Vatani deb bilgan, o'z faoliyatini mamlakat ravnaqi, el farovonligiga baxshida etgan har bir inson uchun chinakam dasturilamal bo'ldi, desak, adashmaymiz.
Tarixiy uch kun
Davlatimiz rahbari 18 noyabr kuni Oliy Majlis Qonunchilik palatasining birinchi majlisidagi nutqida deputatlarni sharafli maqomga sazovor bo'lgani bilan qutlar ekan, sohadagi yutuqlarni e'tirof etib, kelgusidagi vazifalarni, yangi marralarni belgilab berdi. Jumladan, xalq vakillari endilikda to'g'ridan-to'g'ri ishlaydigan va aniq ijro mexanizmlariga ega qonunlarni yaratishi, parlament nazoratini to'laqonli ta'sirchan institutga aylantirishi lozim. Saylov okruglaridagi faoliyatlarida faqat uchrashuvlar tashkil etish, shikoyat va savollarga rasmiy javob berish bilan cheklanib qolmasdan, barcha islohotlarning eng faol ishtirokchisi va targ'ibotchilari bo'lishi zarur.
Shuningdek, kelgusi besh yilda Qonunchilik palatasi oldida g'oyat ulkan vazifalar turibdi. Xususan, qonun ijodkorligi jarayoni, avvalo, jamiyatimizdagi dolzarb muammolar yechimiga, xalqimizning og'irini yengil qilishga qaratilishi kerak. Yangi davrda parlament chinakam “xalq uyi”, uning quyi palatasi esa g'oyalar generatoriga, sog'lom raqobat, bahs va munozaralar maydoniga aylanishi darkor.
Prezidentimiz 19 noyabr kuni Oliy Majlis Senatining birinchi yalpi majlisidagi nutqida ham qator g'oya va takliflarni ilgari surdiki, ularning har biri xalqimizning azaliy orzu-maqsadlari ro'yobiga xizmat qiladi. Masalan, endi Senat qonunlarni muhokama qilishda yangicha mexanizmlarni joriy etishi zarur. Ayniqsa, qonun ijodkorligi jarayoniga mahalliy Kengashlarni keng jalb etish, har bir qonun bo'yicha ularning fikrini olish amaliyotini yo'lga qo'yish muhim ahamiyatga ega. Senat mahalliy Kengashlar faoliyatini tizimli tahlil qilib, ularga ko'maklashib borishi kerak. Umuman, senator mamlakatimizning har bir hududida amalga oshirilayotgan islohotlarga o'zini daxldor his qilishi, ularning muvaffaqiyatli amalga oshirilishi uchun jon koyitishi lozim. Zero, Yurtboshimiz ta'biri bilan aytganda, davlat va xalq xizmatchisining — u senator yoki deputat bo'ladimi, hokim yoki vazir bo'ladimi — rahbarlik mas'uliyatini o'z zimmasiga olganidan so'ng beg'am-beparvo, loqayd bo'lib yurishga, huzur-halovatga berilib yashashga ma'naviy haqqi yo'q.
Davlatimiz rahbarining 20 noyabr kuni Oliy Majlis Qonunchilik palatasining O'zbekiston Respublikasi Bosh vaziri nomzodini ko'rib chiqishga bag'ishlangan majlisidagi ishtiroki ham tarixiy voqelik bo'ldi. Unda Shavkat Mirziyoyev yangi Hukumat, barcha rahbarlar oldidagi eng muhim vazifalarga e'tibor qaratdi. Jumladan, makroiqtisodiy muvozanatni saqlab, kelgusi besh yilda iqtisodiy o'sish sur'atini 6-7 foiz atrofida ta'minlash zarur. Hukumat 2030 yilgacha ishsizlikni xalqaro e'tirof etilgan daraja — 5-6 foizdan oshirmaslik bo'yicha dolzarb vazifalarni ham samarali hal etishi lozim. Iqtisodiyot va aholi daromadlarini o'stirishda yuqori qo'shilgan qiymat yaratadigan sanoat tarmoqlariga alohida ahamiyat qaratish kerak. Shu bilan birga, iqtisodiyotda xususiy sektorning ulushini 85 foizga yetkazish, oziq-ovqat xavfsizligini ta'minlash, sog'liqni saqlash, ta'lim va sportni rivojlantirish bo'yicha katta dasturlarni samarali va to'liq amalga oshirish — hamisha Hukumatning kun tartibida turishi kerak bo'lgan asosiy vazifalar.
Prezidentimiz tomonidan o'rtaga tashlangan g'oyalar, ilgari surilgan tashabbuslar bizni atrofimizda bo'layotgan o'zgarishlarga teran nigoh bilan qarashga, zimmamizdagi vazifalarga zamon talablaridan kelib chiqqan holda mutlaqo yangicha yondashishga undadi.
Biz bugun buyuk evrilishlar davrida yashayapmiz. Jonajon Vatanimiz kundan-kunga rivojlanib, jahon hamjamiyatida o'zining munosib o'rnini egallamoqda. Yuz yillarda bir keladigan mana shunday mas'uliyatli pallada Prezidentimiz rahnamoligida amalga oshirilayotgan keng ko'lamli islohotlarda faol ishtirok etish bugungi avlodning tarixiy missiyasidir.
Guhari sharifroq yo'q ondin…
Hayotining asosiy qismini jurnalistika sohasiga bag'ishlagan inson sifatida ishonch bilan aytishim mumkinki, ommaviy axborot vositalari (OAV) xodimlari uchun ham bugungidek mas'uliyatli davr hech qachon bo'lmagan. Bugun jurnalist yuz berayotgan o'zgarishlarni chetdan kuzatib, yoritib boradigan solnomachi emas, balki ularning bevosita ishtirokchisidir. Biz o'z so'zimiz bilan odamlarning dunyoqarashini shakllantirish, el-yurt taqdiriga daxldorlik, mas'uliyat tuyg'ularini kuchaytirish, ularni ezgu maqsadlar yo'lida harakatga undash, shu orqali kechayotgan jarayonlarga ta'sir ko'rsatish kuchiga egamiz.
Bu haqda gap ketar ekan, jurnalistikaning asosiy quroli — so'zning qudratini anglash va undan samarali foydalanish masalasiga alohida to'xtalish joiz. Zero, bu xalqimizning huquqiy demokratik davlat, ochiq va erkin fuqarolik jamiyati qurishga qaratilgan ezgu maqsad-muddaolariga hamohangdir.
Nega deganda, so'zning qudratini chuqur idrok qilgan inson uni behuda sarflamaydi, aksincha, yaxshilikka, bunyodkorlikka safarbar etadi. Buyuk shoir va mutafakkir bobomiz Alisher Navoiy: “So'zdurki, nishon berur o'lukka jondin, So'zdurki, berur jong'a xabar jonondin” der ekan, birgina kalomning jisman tirik bo'lsa-da, ma'nan o'likka aylangan insonga qayta jon baxsh etish qudratini, uning jonon, ya'ni hayot mohiyati, mag'zini anglab, mazmunli umr kechirishiga turtki bo'lishini e'tirof etadi.
Ezgu so'z kishi qalbini nur kabi yoritar, o'tkinchi dunyoning oqu qorasini tafakkur qilishga undar ekan, uni turli yovuzliklardan, adolatsizliklardan, noinsoniy xatti-harakatlardan asraydi. O'zgalarni kamsitish, haq-huquqlarini toptash, buzg'unchiligu vayronkorliklardan qaytaradi. Shu bois so'zdan sharifroq, muqaddasroq, kuchliroq tushuncha yo'q, deb biladi hazrat Navoiy:
Insonni so'z ayladi judo hayvondin,
Bilkim, guhari sharifroq yo'q ondin.
Zohiran go'zallashgan, siyratan yangilangan O'zbekistonda bugun ommaviy axborot vositalari vakillari so'zning beqiyos qudratidan, o'z bilim va mahorati, qobiliyatidan emin-erkin foydalanish imkoniyatiga ega. Media sohasi vakillarining huquqlari Konstitutsiya darajasida mustahkamlab qo'yildi.
Jumladan, Asosiy Qonunimizning 81-moddasiga ko'ra, ommaviy axborot vositalari erkindir va qonunga muvofiq ish olib boradilar. Davlat ommaviy axborot vositalari faoliyatining erkinligini, ularning axborotni izlash, olish, undan foydalanish va uni tarqatishga bo'lgan huquqlari amalga oshirilishini kafolatlaydi.
Shu bilan birga, bunday erkinlik jurnalistlarning “o'ziga xon — ko'lankasi maydon” bo'lishini anglatmaydi. Yolg'on axborot tarqatgani, o'zgalar huquqlariga daxl qilgani uchun qonun oldida javob beradi. Ya'ni ommaviy axborot vositalari o'zi taqdim etadigan axborotning ishonchliligi uchun javobgardir.
Demak, milliy kontentni har xil oldi-qochdi axborotlar, uzuq-yuluq xabarlar bilan to'ldirib bo'lmaydi. Birovga g'ayirlik, dushmanlik qilib, uning sha'niga “mag'zava to'kish”, qadr-qimmatini kamsitish quroliga aylantirish ham mumkin emas. Soha taraqqiyoti uchun eng to'g'ri va istiqbolli yo'l — Prezidentimiz faoliyatining dastlabki davridayoq belgilab bergan yo'riqqa amal qilish, uni kundalik faoliyatimiz tuzugiga aylantirishdir. Ya'ni xalq bilan muloqot, odamlarning orzu-intilishlari, dardu tashvishlari bilan yashash davlat siyosati darajasiga ko'tarilayotgan bugungi kunda har bir ommaviy axborot vositasi chinakam muloqot maydonchasiga, erkin fikr minbariga aylangan taqdirdagina biz o'z oldimizga qo'ygan maqsadlarga erisha olamiz…
Gap bosma ommaviy axborot vositalari haqida boradigan bo'lsa, avvalo, shuni aytish lozimki, o'z tarixida avvaliga radio, keyinchalik televidenie timsolida qudratli raqobatchilar bilan to'qnash kelib, o'zining axborot makonidagi munosib o'rnini saqlab qola olgan gazeta va jurnallar, bugun internet degan deyarli cheklanmagan auditoriyaga ega jahon axborot makoni bilan yuzma-yuz turibdi. Bu esa nashrlardan ishga yangicha yondashuvni, o'quvchilarga yangiliklarni yetkazish bilan cheklanib qolmasdan, voqealarni chuqur tahlil qilishni, muammolarni ko'tarib chiqib, ularning yechimlari bo'yicha ham takliflar berishni talab etmoqda. Faqat shu yo'l bilan biz bugungi jarayonlarning bevosita ishtirokchisi sifatida o'z mavqeimizni saqlab qolamiz.
Mas'uliyat va intilish
Prezident Shavkat Mirziyoyev kasb bayrami munosabati bilan ommaviy axborot vositalari xodimlariga murojaat qilar ekan, keyingi yillarda yurtimizda so'z erkinligi va fikrlar xilma-xilligiga erishish yo'lida keng imkoniyatlar ochilayotgani media vositalari vakillarining ijtimoiy-siyosiy jarayonlardagi ishtiroki, o'rni va nufuzini yanada kuchaytirayotganini ta'kidlagan edi.
Chindan ham, bugun ommaviy axborot vositalari ijobiy o'zgarishlar jarayonini boshdan kechirmoqda. Mamlakatimiz sarhadlarida yuz berayotgan har bir voqea-hodisa, yurtdoshlarimiz quvonchu tashvishlari, ularni qiynayotgan muammolarni gazetalarimiz sahifalarida ro'yirost, xolisona yoritish uchun hech qanday to'siq yo'q.
Lekin ommaviy axborot vositalari bunday imkoniyatlardan nechog'li to'liq va to'g'ri foydalana olyapti, degan savol tug'iladi va bu bejiz emas.
Davlat rahbarining e'tiroficha, bugungi kunda matbuot ishi, jurnalistlar faoliyati nafaqat “to'rtinchi hokimiyat”, balki mudofaa, xavfsizlik kabi hal qiluvchi sohaga aylanib bormoqda. Shundan kelib chiqib, bugungi kun sharoitida ommaviy axborot vositalarining roli va ahamiyatini chuqur anglash juda muhim.
Gap bosma ommaviy axborot vositalari haqida boradigan bo'lsa, avvalo, shuni aytish lozimki, o'z tarixida avvaliga radio, keyinchalik televidenie timsolida qudratli raqobatchilar bilan to'qnash kelib, o'zining axborot makonidagi munosib o'rnini saqlab qola olgan gazeta va jurnallar, bugun internet degan deyarli cheklanmagan auditoriyaga ega jahon axborot makoni bilan yuzma-yuz turibdi. Bu esa nashrlardan ishga yangicha yondashuvni, o'quvchilarga yangiliklarni yetkazish bilan cheklanib qolmasdan, voqealarni chuqur tahlil qilishni, muammolarni ko'tarib chiqib, ularning yechimlari bo'yicha ham takliflar berishni talab etmoqda. Faqat shu yo'l bilan biz bugungi jarayonlarning bevosita ishtirokchisi sifatida o'z mavqeimizni saqlab qolamiz.
Tabiiyki, axborot tarqatish manbalarining transformatsiyasi undan foydalanuvchilarning tanloviga ta'sir ko'rsatmay qolmadi. So'rovlar natijasiga ko'ra, deyarli hamma mamlakatlarda aksariyat respondentlar o'zi uchun asosiy axborot manbai sifatida eng avval internet-resurslarni, keyin esa televidenie, so'ngra gazeta-jurnallar va radioni ko'rsatishadi.
Ammo bu bosma nashrlarga bo'lgan qiziqish umumjahon miqyosida tushib ketdi, degani emas. Ayniqsa, Osiyo qit'asida davriy nashrlarga talab katta. Dunyodagi 100 nomdagi eng ko'p sotiladigan kundalik gazetalarning 74 nomdagisi Osiyoda bosilib chiqadi. Shundan 62 tasi — Xitoy, Yaponiya va Hindistonda. Buning ustiga, mintaqada ularning adadi ham o'sib bormoqda. Ko'pgina holatlarda bunday o'sish gazetalarni bepul tarqatish hisobidan ham ta'minlanadi. Shunga qaramay an'ana davom etayotir. Aholi soni eng ko'p bo'lgan ushbu qit'ada gazetalarning umumiy adadi 300 million nusxani tashkil etishi ham shundan dalolat.
Texnika taraqqiyoti hayotimizning barcha sohasida namoyon bo'lganidek, OAVdagi transformatsiya ham o'z natijalarini bermoqda. Gap faqat uning davlat va jamiyat uchun nechog'li ahamiyatli ekanida!
Xo'sh, davlat rahbari jurnalistika haqida gapira turib, nega uning bugungi kundagi ahamiyatini mudofaa va xavfsizlikni ta'minlash bilan qiyosladi, axir axborot tarqatish o'z holicha hech qanday xavf tug'dirmaydi-ku. Demak, gap aynan axborotning o'zida, uning mazmunida. Gap — inson axborotdan, o'qigan, eshitgan yoki ko'rgan ma'lumotidan qanday xulosa chiqarishida ekan.
Kuchni to'g'ri yo'naltirish
Barchamizga yaxshi ayonki, fizikada kuchni to'g'ri yo'naltirish narigi jismga ta'sir etishda hal qiluvchi ahamiyat kasb etadi. E'tibor berilsa, ma'naviy-ma'rifiy jabhada ham xuddi shunday. Sog'lom tafakkur hosilasi bo'lgan g'oyani bunyodkorlik sari safarbar etish beqiyos ezguliklarga, taraqqiyotga poydevor bo'ladi.
Bugungi kunda “Har qaysi jamiyat hayotida mafkura muhimdir”, degan qarash biroz eskirgandek. Shunday bo'lsa-da, ko'pgina mamlakatlarda davlat ayni shu — odamlarga ta'sir ko'rsatuvchi vositalar ishtirokisiz o'z oldiga qo'ygan siyosiy, ijtimoiy-iqtisodiy, madaniy taraqqiyotning eng muhim vazifalarini hal qilishi imkonsiz ekanini, ochiq bo'lmasa-da, tan olishadi.
Kimdir buni xohlaydimi yo yo'qmi, butun dunyoda alohida mamlakatlar, alyanslar, bloklar, sinflar, siyosiy partiyalar, ijtimoiy guruhlar o'rtasida g'oyaviy kurash har doim bo'lgan va davom etmoqda. Muayyan mamlakat va butun dunyoning kelajagi qanday bo'lishi ham ana shu kurashning natijasiga bog'liq.
Ayrim ekspertlar fikricha, davlat mafkurasi hokimiyat tepasida turgan muayyan ijtimoiy guruhning mafkurasi bo'lib, o'sha guruh tomonidan asosiy mafkura sifatida e'lon qilingan bo'ladi. Lekin har qanday mafkura davlat mafkurasiga aylanar ekan, u hukmron mafkura bo'lib, boshqa hech qaysi mafkurani tan olmaydigan bo'ladi. Shungacha borib yetadiki, u bilan kelisha olmaganlarni taqiqlash, qatag'on qilish, shuningdek, diktatura o'rnatishgacha olib boradi va bu tarixdan ma'lum.
Sobiq tuzum davrida jamiyatni mafkuralashtirish hayot tartiblarini soxtalashtirishga, ko'zbo'yamachiliklarga, zulm va yovuzlikka, alaloqibat qo'rquv va yolg'onga asoslangan mustabid saltanatni qurishga zamin bo'lgandi. Bu saltanatda erkin fikr bo'g'ildi, o'zgacha qarash va tutumlar ta'qibga olindi. Natijada odamlarning qalbini hadik va xavotir egallab oldi. Ularda voqelikka tanqidiy yondashuv, ijodiy munosabat yo'qoldi. Pirovardida, orzular armonga aylandi. Yuksalish va taraqqiyot quruq safsata bo'lib qoldi. Insonlar tafakkuri va jamiyatdagi depsinishlar davlatning tanazzuliga sabab bo'ldi.
Shukrki, O'zbekiston mustaqillikka erishgach, hukmron mafkura mavjud emasligi qonunan mustahkamlandi. Bu esa jamiyatda qarashlar xilma-xilligini ta'minlamoqda. Yangi tahrirdagi Konstitutsiyamizning 12-moddasida belgilanishicha, “O'zbekiston Respublikasida ijtimoiy hayot siyosiy institutlar, mafkuralar va fikrlarning xilma-xilligi asosida rivojlanadi. Hech qaysi mafkura davlat mafkurasi sifatida o'rnatilishi mumkin emas”. Shu bois “mafkura” tushunchasi butun bir davlatning emas, balki u yoki bu ijtimoiy guruhning tizimli, tartibga solingan qarashlari sifatida talqin etiladi.
Qaysi bir mafkuraning ko'proq ommalashishida esa ommaviy axborot vositalari asosiy o'rin tutadi. Ular faqatgina atrofda yuz berayotgan voqea-hodisalar haqidagi axborotlarni tarqatish manbai emas. OAV odamlarga ta'sir ko'rsatish bo'yicha keng imkoniyatlarga ega, ularning axloqiga, yurish-turishiga ta'sir qiladi, qadriyatlarini shakllantira oladi.
Tarixda ommaviy axborot vositalari tomonidan tarqatilayotgan xabarlar, ilgari surilayotgan g'oyalarga e'tiborsizlik og'ir oqibatlarga olib kelgan holatlar ham bo'lgan. Masalan, 1994 yili Ruandada yuz bergan genotsidga bitta radiostansiyadan tarqatilgan tajovuzkor chaqiriqlar sabab bo'lgan. Mazkur radio avvaliga ko'ngilochar kanal sifatida tashkil etilgan bo'lib, keyin tezda targ'ibot quroliga aylangan. Bir mamlakatda yashovchi ikki elat o'rtasida nafrat olovini yoqish oxir-oqibat 800 ming nafar insonning o'limiga olib kelgan.
Yaqin o'tmishdan olingan bu misol ommaviy axborot vositalarining kuchiga to'g'ri baho berish va bu kuchni bunyodkorlik maqsadlariga yo'naltirish juda muhim ekanini ko'rsatadi. Shu nuqtai nazardan, axborot maydonini sifatli va raqobatdosh milliy kontent bilan to'ldirish masalasi har qachongidan ham dolzarb.
Kasbga sadoqat va burch taqozosi
Ommaviy axborot vositasining yana bir ustuvor vazifasi — davlat idoralari va ularning mansabdor shaxslari faoliyati ustidan jamoatchilik nazoratini o'rnatish, fuqarolarning qonuniy murojaatlarini o'rganish va hal qilish. Davlat rahbari ta'kidlaganidek, bugungi kunda qurilish, ekologiya va atrof-muhitni muhofaza qilish, yo'l harakati xavfsizligini ta'minlashdagi kamchiliklar, ijtimoiy va iqtisodiy sohalardagi muammolar bo'yicha berib borilayotgan tanqidiy-tahliliy materiallar joylarda mudrab o'tirgan ayrim rahbar va mutasaddilarni uyqudan uyg'otib, yangicha ishlab, odamlarning tashvishi bilan yashashga majbur qilmoqda.
To'g'ri, ommaviy axborot vositalarining faolligi, jurnalistlarning o'z kasbiga, burchiga sodiqligi, vatanparvarligi ba'zilarga har doim ham yoqavermaydi. Shu bois ba'zan jurnalistga turli ig'volar, nohaq iddaolar qilinadi, u soxta ayblov bilan ta'qibga olinadi. Ammo bugun haqiqatgo'y jurnalist ortida qonun, xalq va ularni o'zining eng yaqin hamkorlari hamda yordamchilari deb hisoblaydigan Prezident turibdi.
Davlatimiz rahbari bir safar Qashqadaryoga tashrifi chog'ida “Ko'pchilik menga ommaviy axborot vositalarini “yopishni” taklif qilmoqda, lekin men buni hech qachon qilmayman”, deb jurnalistlarning erkin faoliyat yuritishi va haqqoniy so'z aytishiga qarshi bo'lgan, ularga to'sqinlik qilayotgan kimsalarga, kuchlarga o'z fikrini, pozitsiyasini aniq va lo'nda bildirgandi.
Ayni chog'da ushbu voqelik nafaqat jurnalistlarni ilhomlantirishi, balki amaldorlarning tahliliy-tanqidiy chiqishlarga munosabatini ham o'zgartirishi lozim. Katta salohiyatga ega rahbar tanqid uchun jurnalistdan xafa bo'lmaydi. Aksincha, e'tiboridan chetda qolgan muammoni yoritib bergani uchun minnatdor bo'ladi, kamchiliklarini tuzatib oladi. Afsuski, hamma rahbarlarni ham shunday deya olmaymiz.
Muammoni qalamga olgan jurnalist jamiyatga va davlatga dushman emas. Muayyan sohadagi kamchilikni ochib berish, rahbarlarning e'tiborini qaratish bilan ularni bartaraf etishga harakat qilish OAV vakilining kasbi taqozosidir.
Ommaviy axborot vositasining vazifalari haqida so'z ketar ekan, adolatli tanqidni chop etib, dolzarb muammolarni ko'targanda, ular qanday bartaraf etilayotganini ham yoritishni esdan chiqarmaslik lozim. Mamlakatimizda, ayniqsa, keyingi yillarda iqtisodiyot rivojlanishi, dolzarb ijtimoiy masalalar hal etilishi, odamlarning hayoti yaxshilanib, turmush farovonligi ortishi yo'lida ko'p-ko'p ishlar qilinayotgani shunday deyishimizga asos bo'ladi.
Mana shunday o'zgarishlarni o'quvchilar ommasiga yetkazish, mamlakatda amalga oshirilayotgan islohotlarning mazmun-mohiyati, pirovard maqsadlari haqida ma'lumotlar berish, xoh korxonada bo'lsin, xoh tomorqada bo'lsin, sidqidildan mehnat qilib, mamlakatimiz ravnaqiga munosib hissa qo'shayotgan yurtdoshlarimiz haqida hikoya qilish — bular ham jurnalistikaning ajralmas qismi. Bunday materiallar odamlarda kelajakka bo'lgan ishonchni mustahkamlaydi, yangidan-yangi marralarga ilhomlantiradi. Ommaviy axborot vositalarining qudratli kuchini bunyodkorlik maqsadlariga yo'naltirishning asl mohiyati ham shundan iborat.
…Prezidentimiz ishtirokida ketma-ket uch kun bo'lib o'tgan majlislarda qatnashib, ularda Vatanimiz taraqqiyoti, xalqimiz farovonligi yo'lida bildirilgan taklif va tashabbuslar, g'oyalar menda ana shunday fikr-mulohazalarni, mushohadalarni uyg'otdi. Eng muhimi, mamlakatimiz istiqboli, navqiron avlodning kelajagi uchun kuyunchaklik, mas'uliyat bugun har birimizning hayotimiz qoidasiga, tuzugiga aylanishi lozimligini yana bir bor chuqur angladik.
Zotan, Prezidentimiz ta'kidlaganidek, yurtimiz taraqqiyotidagi butunlay yangi davrga qadam qo'ymoqdamiz. Hech shubhasiz, bu davrning qanday bo'lishi birgalikda o'z oldimizga qo'ygan ulkan maqsad va vazifalarni samarali amalga oshirishimizga bog'liq.
Ishonchimiz komil, bu — Yangi O'zbekistonimiz jadal rivojlanadigan, yanada yuksak taraqqiyot cho'qqilarini zabt etadigan davr bo'ladi. Bu davr parlament va Hukumat faoliyatida yangicha ishlash, xalqimizga sadoqat bilan xizmat qilish bo'yicha ibratli an'analar shakllanadigan va tarixga muhrlanadigan davr bo'ladi.
Kelajak avlodlar, albatta, faxr bilan tilga oladigan ana shunday buyuk tarix va kelajakni yaratish bizning o'z qo'limizda.
O'tkir RAHMAT.
“Xalq so'zi” gazetasining 2024 yil 27 noyabr 245-sonidan olindi.