YuNESKO bosh qarorgohida Mahmud Qoshg'ariy va Ali Qushchining boy ilmiy merosiga bag'ishlangan xalqaro konferensiya bo'lib o'tdi
YuNESKOning Parijdagi bosh qarorgohida O'zbekistonning YuNESKO huzuridagi doimiy vakolatxonasi, turkiy mamlakatlar doimiy vakolatxonalari va Turkiy madaniyat va meros fondi bilan birgalikda buyuk olim Mahmud Qoshg'ariyning “Devonu lug'otit turk” kitobining 950 yilligiga bag'ishlangan xalqaro ilmiy-amaliy konferensiya tashkil etildi.
2023 yilda YuNESKO Bosh konferensiyasi O'zbekiston va boshqa davlatlar tashabbusi bilan 2024-2025 yillarda “Devonu lug'otit turk” kitobining 950 yilligini tashkilot doirasida nishonlash to'g'risida qaror qabul qilgan edi.
“Dunyo xaritasini leksikografiyada yaratish: “Devonu lug'otit turk” asarining 950 yilligiga” mavzusida bo'lib o'tgan konferensiya ishida YuNESKO bosh direktori o'rinbosari Firmin Matoko, turkiy mamlakatlarning YuNESKO ishlari bo'yicha milliy komissiyalari rahbariyati, Turkiy madaniyat va meros xalqaro fondi rahbari Aqtoti Raimqulova, Turkiy tilli davlatlar Parlament assambleyasi bosh kotibi Mehmet Surayya Er, shuningdek, YuNESKOga a'zo davlatlar doimiy vakillari va turli mamlakatlardan ekspertlar qatnashdi.
Ishtirokchilar Mahmud Qoshg'ariyning boy ilmiy merosi, “Devonu lug'otit turk” asarining turkiy xalqlar ma'naviy-ma'rifiy tarixidagi o'rni, lug'atshunoslikning jamoalar va avlodlar o'rtasidagi aloqalarni mustahkamlashdagi ahamiyati, shuningdek, zamonaviy turkologiyaga oid masalalarni muhokama qildilar.
Anjuman doirasida buyuk astronom va matematik Ali Qushchining ilmiy merosiga bag'ishlangan davra suhbati ham tashkil etildi. YuNESKO Bosh konferensiyasida O'zbekiston va boshqa davlatlar tashabbusi bilan Ali Qushchi tavalludining 550 yilligi 2024-2025 yillarda tashkilot doirasida nishonlanadigan yubileylar ro'yxatiga kiritildi.
Anjumanda O'zbekiston Fanlar akademiyasi Abu Rayhon Beruniy nomidagi Sharqshunoslik instituti direktori Bahrom Abduhalimov va mazkur institutning yetakchi ilmiy xodimi Komiljon Raximov Ali Qushchining ilmiy yutuqlari hamda “Devonu lug'otit turk” asarining turkshunoslik tarixidagi salmoqli o'rni haqida ma'ruza qildilar.
Anjuman doirasida turkiy davlatlarning milliy taomlari namoyish etilgan pazandachilik festivali ham bo'lib o'tdi.
“Dunyo” AA,
Parij shahri.