Ohangaronlik jurnalistlar uyushmadan mamnun
Qutlug' sanalar arafasida azim Ohangaronda ham bayram shukuhi o'zgacha davom etmoqda. Ayniqsa, shu kunlarda ohangaronlik jurnalistlarning kayfiyati chog', ko'ksi tog' bo'lib turibdi. Nafaqa gashtini surayotgan ijodkorlar bilan suhbatlashar ekansiz, insonga hamkasblari, yoru do'stlari tomonidan berilgan bir chimdim mehr va e'tibor uni juda ko'p ezgu ishlarga qodir qilishini, kuchiga kuch, shijoatiga shijoat qo'shishini anglash qiyin emas.
Uzoq yillar matbuot sohasida mehnat qilib, rangin suratlari bilan gazeta sahifalarini bezagan nafaqadagi ijodkor, 80 yoshning ostonasida turgan Jo'ra Namozboyev shunday dedi:
— Jurnalistlar faoliyati davomida ko'p hollarda e'tibor markazida bo'lishadi, kuniga o'nlab, hattoki yuzlab insonlar bilan gaplashishga to'g'ri keladi. Jamiyatning qaynoq qozonida qaynagan inson uchun nafaqa gashtini surib, uyda o'tirish dastlabki yillarda og'ir bo'ladi. Chunki nafaqaga chiqqaningizdan so'ng, aslida, u qadar e'tibor-e'zozda emasligingizni sezib qolasiz va bu har bir insonga salbiy ta'sir qiladi. Ming shukrki, hozirgi kunda bizga bunday hislar begona. Negaki, ikki yildan buyon O'zbekiston Jurnalistlar uyushmasi mas'ullari tez-tez holimizdan xabar olib turishibdi. O'tgan yili viloyat mas'ullari uyimga kelishib, nomdor gazetaga bepul obuna qilib berishgan edi, yil davomida uyushma mas'ullarini duo qilib, gazeta o'qidim. Kuni kecha ham Uyushmaning Toshkent viloyati bo'limi raisi Rahmatilla Sheraliyev xonadonimizga kelib, holimdan xabar oldi, mas'ullar bilan birgalikda o'tirib, muammolarimni so'radi va o'zim sevgan “Hurriyat” gazetasiga bir yillik obuna cheki va boshqa sovg'alar hadya qildi. Hamkasblarim bilan suhbatlashib, o'zimni ancha yaxshi his qila boshladim, ko'nglim tog'dek o'sdi. Qolaversa, jamiyatga kerakligimni yana bir bor his qildim. Inson shunday e'zoz-e'tiborda yashasa, hech qachon qarimasa kerak, – dedi biz bilan suhbatda otaxon.
Darhaqiqat, kuni kecha O'zbekiston Jurnalistlar uyushmasi Toshkent viloyati bo'limi raisi, O'zbekistonda xizmat ko'rsatgan yoshlar murabbiyci Rahmatilla Sheraliyev Ohangaron vohasi ijodkorlari bilan dildan suhbatlashdi. Suhbat davomida asosiy e'tibor jurnalist kasb etikasi masalalariga qaratildi.
Uyushmaning Toshkent viloyati bo'limi mas'ullari dastlab nafaqadagi faxriy fotomuxbir Jo'ra Namozboyevning xonadonida, so'ngra “Ohangaron hayoti” gazeta tahririyatida bo'lishdi. Tahririyatga davra suhbati uchun tashrif buyurgan faxriy jurnalistlar Oysara Dadayeva, Nurali Abdurasulov, Ozod Xushnazarzoda, Nigora Shofayziyeva, Qudrat Odinayevlarning samarali faoliyati alohida e'tirof etilib, Toshkent viloyati matbuoti rivojiga qo'shgan hissalari tilga olindi.
Uyushmaning Toshkent viloyati bo'limi raisi Rahmatilla Sheraliyev bir guruh faxriy jurnalistlarga uyushma a'zoligi guvohnomalari va ko'krak nishonlarini tantanali ravishda topshirib, ularga “Hurriyat” va “Toshkent haqiqati” gazetalarining bir yillik obuna chekini uyushma nomidan sovg'a qildi. Yangi 2025 yilda ohangaronlik faxriy jurnalistlar bepul gazeta o'qishadigan bo'ldi. Aniqrog'i, bo'lim o'z mablag'lari hisobidan 42 nafar faxriy jurnalist uchun 2025 yilga obuna tashkil qildi.
Faxriylar davrasidagi suhbat sermazmun va taassurotga boy o'tdi. Ohangaronlik jurnalistlar bu kabi e'tibor-e'tirofdan mamnun bo'lishdi.
Shoira TO'LAGANOVA