“Ham tasvirchi, ham muxbir, ham rejissyor, ham jurnalist”

Yuqoridagi fikr O'zbekiston Jurnalistlar uyushmasi Samarqand viloyat bo'limi, viloyat axborot va ommaviy kommunikatsiyalar boshqarmasi hamda viloyat teleradiokompaniyasi hamkorligida faxriy teleradio jurnalisti Abdusamad Ibrohimovning 60 yilligi munosabati bilan o'tkazilgan “Umrimning yarmi televidenie bilan” deb nomlangan uchrashuvda bot-bot takrorlandi.

Viloyat televideniesida bo'lib o'tgan bu ijodiy uchrashuvda  O'zbekistonda xizmat ko'rsatgan jurnalist Farmon Toshev, viloyat axborot va ommaviy kommunikatsiyalar boshqarmasi boshlig'i Mannob Ibodullayev, faxriy telejurnalist Dilbar Voseeva, Dilmurod Ismatov ijodkorning chorak asrdan ko'proq umrini jurnalistikaga bag'ishlagani haqida so'zlab, ish jarayonidagi unutilmas voqealarni ham eslashdi.

— Abdusamad aka bilan yigirma yildan ko'proq hamkorlikda faoliyat olib boryapman, — dedi Samarqand viloyat teleradiokompaniyasi direktori o'rinbosari D.Ismatov. — U kishini haqiqiy zamonaviy ijodkor, kasbining professionali deymiz. Negaki, u o'zi tayyorlaydigan materiallarni tasvirchi bo'lib suratga oladi, muxbir va muallif bo'lib ma'lumotlar to'playdi va matnni yozadi, bu ishlar jarayonida rejissyorlik ham qiladi. Turli sohalarga oid tadbirlarni mohirona tasvirga oladi, dasturini jonli intervyular bilan boyitadi. Bunaqa holat televidenieda kamdan-kam bo'ladi. Bu mahoratlari kasb sirlarini o'rganib kelayotgan shogirdlariga ibrat maktabi bo'lmoqda.

Uchrashuvda ishtirok etgan ustozlar, hamkasblari, yaqinlari, do'stlari Abdusamad Ibrohimovning mehnatsevarligi, izlanuvchanligi, kamtarligini ham alohida ta'kidladilar. Ijodkorga O'zbekiston Jurnalistlar uyushmasi Samarqand viloyat bo'limi hamda Samarqand viloyat teleradiokompaniyasining tashakkurnomasi, sovg'alari topshirildi.

O'zbekiston Jurnalistlar uyushmasi Axborot xizmati.