Kuvayt OAV: O'zbekiston Ko'rfaz arab davlatlari bilan aloqalarni yangi bosqichga olib chiqmoqda
Davlatimiz rahbarining Kuvaytga rasmiy tashrifi doirasida ushbu mamlakatning yetakchi bosma va elektron ommaviy axborot vositalarida O'zbekistonning zamonaviy rivojlanishi, savdo-iqtisodiy, siyosiy va madaniy-gumanitar sohalardagi ikki tomonlama munosabatlariga bag'ishlangan turkum maqolalar chop etildi.
Masalan “Q8 Press” elektron nashrida “O'zbekiston va Kuvayt: o'zaro manfaatli hamkorlik sari” sarlavhali maqola e'lon qilindi.
“So'nggi yillarda O'zbekiston yangilangan tashqi siyosiy konsepsiyasi doirasida mamlakat an'anaviy sheriklari bilan tashqi aloqalarni mustahkamlash va xalqaro tashkilotlardagi faoliyatini kuchaytirish bilan bir qatorda o'z hamkorlari jo'g'rofiyasini kengaytirish yo'lidan bormoqda, – deyilgan maqola muqaddimasida. – Mazkur tendensiya, ayniqsa, O'zbekistonning Ko'rfaz arab davlatlari bilan aloqalarni yangi bosqichga olib chiqqanida yaqqol aks etadi”.
Ahamiyatli jihati shundaki, ushbu mintaqa davlatlari bilan munosabatlar ham ko'p tomonlama, ham ikki tomonlama formatlarda rivojlanmoqda. Bu “Markaziy Osiyo – Ko'rfaz arab davlatlari hamkorlik kengashi” strategik muloqotining tashkil etilishi va ushbu formatdagi hamkorlik bo'yicha birinchi oliy darajadagi sammitning 2023 yilda muvaffaqiyatli o'tkazilishida aks etadi.
Rasmiy Toshkent mintaqa davlatlari bilan aloqalarni ikki tomonlama rivojlantirishga alohida ahamiyat qaratmoqda. Bunda Kuvayt davlati ustuvor yo'nalish hisoblanadi.
“Jumladan, so'nggi paytlarda O'zbekiston Kuvayt bilan siyosiy muloqotni kuchaytirdi. 2024 yilning aprel oyida Kuvayt tashqi ishlar vaziri Abdulla al-Yahyo O'zbekiston Prezidenti tomonidan qabul qilindi. Birgina 2024 yilning o'zidayoq ikki davlat TIV rahbarlari o'rtasida 5 marta muzokaralar tashkil etildi”, – deyilgan nashrda.
Qayd etilganidek, muloqot iqtisodiy idoralar va ishbilarmon doiralari o'rtasida ham kuchaytirildi. O'tgan yilda 100 dan ortiq O'zbekiston tadbirkorlarining Al-Kuvayt shahriga tashrifi amalga oshirildi. Ta'kidlash joizki, munosabatlar dinamikasining bunday tarzda faollashuvi bejiz emas. Kuvayt O'zbekiston uchun har tomonlama manfaatli sherik hisoblanadi.
“E'tibor qaratish lozim bo'lgan navbatdagi omil bu mamlakatlarning iqtisodiy ahamiyatidir. O'zbekiston Markaziy Osiyo mintaqasining ikkinchi yirik iqtisodi sanaladi. So'nggi yillarda respublika iqtisodi yuqori o'sish dinamikasini namoyon etmoqda. Jumladan, oxirgi 7 yil ichida rasmiy Toshkent mamlakat yalpi ichki mahsulotini 2 baravarga oshirishga muvaffaq bo'ldi”, – deya ta'kidlangan materialda. Kuvayt esa global va Yaqin Sharq mintaqasi iqtisodiyoti uchun salmoqli ahamiyatga ega bo'lgan davlat sanaladi. Shuningdek, mamlakat dunyodagi neft eksport qiluvchi yirik 10 ta davlatdan biri hisoblanadi.
Maqola “O'zbekiston va Kuvaytning iqtisodiy hamda siyosiy sohalardagi hamkorligi ikki davlatning keyingi izchil taraqqiyotini ta'minlashda muhim qadam bo'ladi. Shuningdek, davlatlar o'rtasidagi munosabatlarning izchillashuvi mintaqalararo hamkorlikni kuchaytirish uchun yana bir kuchli turtki beradi”, – degan so'zlar bilan yakunlanadi.
Shuningdek, mazkur davlatda ingliz tilida bosiladigan “The Times” haftalik gazetasida ikki davlat o'rtasidagi munosabatlarga bag'ishlangan turkum maqolalar chop etildi.
Jumladan, mamlakatimiz elchisi Ayubxon Yunusov qalamiga mansub “Kuvayt O'zbekistonning ishonchli do'sti va hamkori” sarlavhali maqolada yozilganidek, Kuvayt O'zbekistonning Yaqin Sharqdagi ishonchli do'sti va hamkori bo'lib, 1991 yil 30 dekabrda respublika mustaqilligini birinchilardan bo'lib tan olgan.
“Ushbu yildan e'tiboran, ikki davlat o'rtasida iqtisodiy rivojlanish hamda ikki xalqning farovonligi uchun umumiy intilish asosida do'stona munosabatlar o'rnatish davri boshlandi. Ikki davlat o'rtasidagi hamkorlikning huquqiy bazasi sarmoyalarni rag'batlantirish va o'zaro himoya qilish to'g'risida, Madaniyat va san'at sohalarida hamkorlik to'g'risida, Savdo-iqtisodiy va ilmiy-texnikaviy hamkorlik to'g'risida, ikki tomonlama soliqqa tortishning oldini olish to'g'risida, ikki davlat bojxona qo'mitalari o'rtasidagi hamkorlik to'g'risida hukumatlararo bitimlarni o'z ichiga oladi”, – deyilgan materialda.
Bundan tashqari, “The Times” gazetasi mamlakatimiz madaniyat vaziri Ozodbek Nazarbekovning ikki davlat o'rtasidagi madaniy muloqotni rivojlantirishga bag'ishlangan maqolasini mushtariylar e'tiboriga taqdim qildi.
“O'zbekiston va Kuvayt xalqlari o'rtasidagi madaniy aloqalarni yanada rivojlantirish maqsadida madaniy tadbirlar, ko'rgazmalar, festivallar va ilmiy anjumanlar tashkil etilmoqda. Madaniyat sohasidagi hamkorlikni yanada kengaytirish maqsadida ikki mamlakatning tegishli madaniyat tashkilotlari o'rtasida doimiy muloqot va tajriba almashish yo'lga qo'yilgan. Qo'shma madaniy tadbirlar tashkil etish, san'at va madaniyat namoyandalarining tashrifiga ko'maklashish tobora kuchayib bormoqda. Kuvayt bilan madaniy hamkorlikning hozirgi holati va dinamikasini o'rganar ekanmiz, ko'plab hamkorlikdagi sa'y-harakatlarni kuzatish mumkin. Jumladan, 2017 yilning 15-22 dekabr kunlari Al-Kuvayt shahrida O'zbekiston madaniyati kunlari bo'lib o'tdi. Uning doirasida “Al-Advaniya” galereyasida O'zbekistonga bag'ishlangan ko'rgazma va konsert dasturlari namoyish etildi”, – deb yozgan muallif.
Mazkur bosma nashrda joylashtirilgan yurtimiz haqidagi navbatdagi maqolada O'zbekistonda “aqlli” shaharlarni rejalashtirish va hududlarni rivojlantirish bo'yicha amalga oshirilayotgan loyihalar haqidagi ma'lumotlar qalamga olingan. “Kuvaytning yetakchi ishlab chiqaruvchilarini jalb etgan holda O'zbekistonda zamonaviy ilmiy-texnik majmualar, biznes-inkubatorlar va startap akseleratorlarni hamkorlikda tashkil etish bo'yicha keng ko'lamli loyihalarni amalga oshirish innovatsion g'oyalar, ixtirolar va texnologiyalarni rivojlantirish va tijoratlashtirishda muhim ahamiyat kasb etadi”, – deya qayd etilgan nashrda.
Kuvaytning “Al-Jarida” haftalik gazetasida esa “O'zbekiston va Kuvayt hamkorligi: yangi bosqich sari dadil qadamlar” sarlavhali maqola bosildi. Unda O'zbekiston elchixonasida mamlakatimizning investitsiyaviy, eksport va sayyohlik salohiyatiga bag'ishlab o'tkazilgan taqdimot tadbiri tafsilotlari qalamga olingan. Nashrda so'nggi yillarda O'zbekiston Prezidenti rahnamoligida Yangi O'zbekiston dunyo hamjamiyati bilan turli sohalarda, jumladan, madaniyat, iqtisodiyot va turizm kabi yo'nalishlarda yaqin hamkorlik aloqalarini mustahkamlab borayotgani alohida urg'ulangan.
“Al-Anba” gazetasi esa “Habibulla Solih. O'zbekistonning ko'p qirrali xattoti” sarlavhali maqolani e'lon qildi. “O'zbekistonda xattotlik ustasi sifatida nom qozongan Habibulloh Solih ushbu san'atni Qur'oni karimni nusxalashda qo'llaniladigan “Nasx” xati, farmonlar va rasmiy hujjatlarni yozishda qo'llaniladigan “Tavqi” va “Ruq'a” kabi turli xil xattotlik uslublarini mukammal egallagan, – deb yozilgan nashrda. – U xattotlik san'atini ustozlari Ismoil Maxdum va Abdulg'afur Razoqov Al-Buxoriydan o'rgangan. Uning bobosi domla Solih Karimov Buxoro Amirligining mashhur xattotlaridan bo'lgan”.
Maqolada, shuningdek, Habibulla Solih ko'plab xalqaro ko'rik-tanlovlarda ishtirok etgani xabar qilingan.
“U 1996 yilda Istanbulda o'tkazilgan xalqaro xattotlik tanlovida eng kuchli o'nta xattot safida e'tirof etildi. 1999 yili Lahorda o'tkazilgan Ikkinchi xalqaro xattotlik festivalida ikkinchi o'rinni egalladi. Mashhur xattot 2002 yilda “Parvin qalami” mukofotiga sazovor bo'lgan. Shuningdek,“O'zbekiston Respublikasida xizmat ko'rsatgan madaniyat xodimi” faxriy unvoni bilan taqdirlangan”, – deya ma'lum qilgan Kuvayt bosma nashri.
“Dunyo” AA,
Al-Kuvayt shahri.