Qulaylik

Yurtimizda barcha sohalarda amalga oshirilayotgan ishlar qatorida tibbiyot tarmog'ida ham qator ijobiy ishlar ro'yobga chiqarib kelinmoqda. Xususan,  keyingi paytlarda “Tez tibbiy yordam” xizmatini takomillashtirishga oid hukumatimiz tomonidan tegishli qarorlar qabul qilinib, sohaga katta e'tibor qaratilmoqda. Prezidentimizning 2022 yil 16 iyundagi “Aholiga tez tibbiy yordam ko'rsatish tizimini takomillashtirish to'g'risida”gi qarori bu yo'nalishda dasturilamal bo'layotir.

Mazkur qaror ijrosi doirasida Samarqand viloyatining Qo'shrabot, Payariq va Samarqand tumanlarida “Tez tibbiy yordam” xizmati binolari uchun jami 4 milliard so'mga yaqin mablag' sarflangani fikrimizga dalildir. Natijada hududlarda aholiga tibbiy xizmat ko'rsatish sifati tubdan yaxshilandi.

Jumladan, Qo'shrabot tumanida 1 milliard 360 million so'mlik ishlar bajarilib, natijada 142 ming nafar aholiga xizmat ko'rsatish sifati tubdan yaxshilandi. Payariq tumanida ham “Tez tibbiy yordam” xizmati binosi qurilishiga 1 milliard 100 million so'm yo'naltirilib, xodimlar va bemorlar uchun barcha zarur qulayliklar yaratildi. Tabiiyki, hududda yashovchi 273 ming nafar aholi bundan mamnun. Samarqand tumani “Tez tibbiy yordam” binosida 1 milliard 350 million so'mlik qurilish va ta'mirlash ishlari bajarildi. Hozir bu yerda tumandagi 272 ming nafar aholiga tibbiy xizmat ko'rsatish uchun barcha sharoit mavjud.

Kuni kecha mazkur muassasalarga O'zbekiston Respublikasi Sog'liqni saqlash vazirligi hamda Respublika tez tibbiy yordam markazi tomonidan zamonaviy “Volkswagen Caddy” avtomashinalari topshirildi.

Demak, bir zamonlardagidek almisoqdan qolgan “tez yordam” mashinalari o'rniga, zamonaviy, barcha tibbiy jihozlarga ega texnikalar sohaga jalb qilinayotganining o'zi katta qulaylik muhayyo etilayotganidan dalolat beradi.

Ubaydullo XO'JANIYoZOV