Катта умидлар олдинда!

Футбол бўйича Ўзбекистон миллий терма жамоасининг жаҳон чемпионати йўлланмасини  қўлга киритгани АҚШ оммавий  ахборот воситалари диққат марказида

Америка Қўшма Штатларининг  етакчи оммавий ахборот воситалари футбол бўйича Ўзбекистон терма жамоасининг муддатидан аввал жаҳон чемпионати йўлланмасини қўлга киритганини кенг ёритмоқда. Хусусан,  дунёга машҳур  “The New York Times” газетасида  “Ўзбекистон миллий терма жамоаси ўз тарихида илк бор жаҳон чемпионатига йўлланма олди” сарлавҳали мақола чоп этилди.

Нашрда Ўзбекистон терма жамоаси пайшанба куни БАА билан 0:0 ҳисобидаги дуранг  натижа  қайд этиб, тўғридан-тўғри жаҳон чемпионати йўлланмасини қўлга киритгани таъкидланган. “Бу натижа Ўзбекистонни “А” гуруҳида 2-ўринда  мустаҳкамлади.

Шу билан бирга БААни 4 очкога ортда қолдирган ҳолда “ЖЧ-2026” йўлланмасини кафолатлади”, – дея урғуланган мақолада.

Материалда Ўзбекистон терма жамоаси марказий ҳимоячиси Абдуқодир Ҳусанов январь ойида Англиянинг “Манчестер Сити” клубига ўтгани, жамоа сардори ва ҳужумчиси Элдор Шомуродов  Римнинг “Рома” футбол клубида тўп суриши  урғуланган.

Шунингдек, Ўзбекистон терма жамоасини бу йилдан эътиборан бош мураббий этиб тайинланган Тимур Кападзе бошқараётгани  хабар қилинган. У футболчи сифатида Ўзбекистон терма жамоаси сафида 119 та ўйин ўтказган. “Ўзбекистон 1991 йилда СССР парчаланганидан кейин мустақилликка эришди  ҳамда Россия ва Украинадан кейин жаҳон чемпионати финалига чиққан МДҲ ҳудудидаги учинчи мамлакат бўлди”, – деб ёзилган “The New York Times” мақоласида.

Нашрда таъкидланганидек,  2026 йилда  бўлиб ўтадиган  жаҳон чемпионатида тарихда биринчи марта 48 та жамоа иштирок этади.

“World Soccer Talk” нашри ҳам  Марказий Осиё футболи учун улкан ютуқ сифатида Ўзбекистон терма жамоаси ўз тарихида илк бор 2026 йилда АҚШ, Мексика ва Канадада бўлиб ўтадиган футбол бўйича жаҳон чемпионатига йўлланма олгани ҳақида ёзди.

“Ўзбекистон футболи тарихи 1992 йилдан, яъни мамлакат мустақилликка эришганидан бошланди. Ўшандан бери миллий терма жамоа барқарор ўсиш ва интилувчанликни намоён этди, айниқса, 2011 йилги Осиё Кубоги ярим финалига қадар етиб борди – бу турнирдаги энг яхши натижасидир”, – дейилган манбада.

Таъкидланганидек, жаҳон чемпионати  йўлланмаси қўлга киритилгани ҳақидаги хушхабар Ўзбекистонда  катта хурсандчилик  билан кутиб олинди. “Мухлислар Тошкент ва бошқа шаҳарлар кўчаларига мамлакат байроқларни кўтариб, жўр бўлиб давлат мадҳиясини куйлашди. Ушбу оламшумул ютуқ бутун мамлакатни бирлаштирди”,  – дея урғуланган “World Soccer Talk” мақоласида.

АҚШнинг “FoxSports” электрон нашрида эса “Биринчи жаҳон чемпионати. Ўзбекистон 2026 йилги турнирда иштирок этиш ҳуқуқини қўлга киритди” сарлавҳали  мақолани  ўз ўқувчилари эътиборига тақдим қилди.

Унда Ўзбекистон ўз тарихида илк бор келаси йили Шимолий Америкада бўлиб ўтадиган 48 жамоа иштирокидаги жаҳон чемпионатига йўлланма олгани хабар қилинган.

“Пайшанба куни Бирлашган Араб Амирликлари дуранг ўйнаган Ўзбекистон иккинчи бўлимда дарвозабон Ўткир Юсуповнинг учта муҳим сейвни амалга оширган ажойиб ўйини эвазига керакли очкони қўлга киритди”, – деб ёзди муаллиф.

 “The Times of Central Asia” томонидан мазкур мавзуга бағишлаб чоп этилган мақолада таъкидланишича, 34 ёшли мамлакат биринчи марта жаҳон чемпионати финал босқичида иштирок этиш ҳуқуқини қўлга киритди. Якуний босқич осон бўлмади. Ўзбекистонликлар  БААда ўйин бошланишидан олдин турли  тўсиқларга дуч келишди. Лекин ҳеч қандай қаршилик шу куни Ўзбекистоннинг  узоқ кутилган йўлланмани  қўлга  киритишига  ва  байрам қилишига тўсқинлик  қилолмади.

Материалда Ўзбекистон ушбу саралаш босқичидаги 9 учрашувда бор-йўғи битта мағлубият аламини тотиб кўрганига  алоҳида эътибор қаратилган.

“Мамлакатнинг ярми  БАА билан ўйинни кўриш учун ухламади.  Ўзбекистон Президенти Шавкат Мирзиёев эса ўйиндан сўнг жамоа вакиллари билан телефон  орқали мулоқот қилди ва уларни тарихий ғалаба билан  қутлади”, – дейилади материалда.

“Ҳеч шубҳасиз, миллий спортимиз солномасига олтин ҳарфлар билан битиладиган бундай ёрқин натижа юртимиздаги миллионлаб футбол мухлислари, бутун халқимизнинг неча йиллик орзуси эди, десак, тўғри бўлади”, – дея давлатимиз раҳбарининг Ўзбекистон терма жамоаси футболчиларига  йўллаган табригидан  иқтибос келтирилган материалда.

Мақола “Эҳтимол, бу фақат бошланиши. Ўзбекистоннинг жаҳон чемпионатидаги иштироки яна ҳам кўпроқ ўзбек ёшларини футбол билан шуғулланишга ундаши шубҳасиз. Айни пайтда, мамлакат шунчаки байрам қилиши мумкин. Келгуси йил ва катта умидлар олдинда”, – деган сўзлар  билан якунланган.

Бундан  ташқари,  АҚШдаги оммабоп “Yahoo Sports” ва “theScore”  нашрлари  ҳам Ўзбекистон миллий  терма жамоасининг ушбу  тарихий  ғалабаси ҳақида ёзди.

“Дунё” АА,

Вашингтон шаҳри.