O'zbekiston Respublikasi Prezidentining farmoni
ISLOHOTLARNI AMALGA OShIRIShDA ISTIQBOLLI TAShABBUSLARNI YaNADA QO'LLAB-QUVVATLASh BO'YIChA QO'ShIMChA ChORA-TADBIRLAR TO'G'RISIDA
Mamlakatning iqtisodiy va ijtimoiy o'sishini ta'minlash jarayonida keng aholi qatlamining ishtirokini hamda ularning turli sohalardagi istiqbolli tashabbuslarini rag'batlantirish va innovatsion faolligini yanada oshirishning samarali mexanizmlarini joriy qilish maqsadida qaror qilaman:
- Maqsadlar
- Quyidagilar aholining istiqbolli tashabbuslarini rag'batlantirish chora-tadbirlarining asosiy maqsadlari etib belgilansin:
a) samarali va xalqchil islohotlarni amalga oshirishda keng jamoatchilik va jamiyatning turli qatlamlari vakillari, xususan, etuk mutaxassislar, yoshlar, tadbirkorlar, faol fuqarolar va vatandoshlarning (keyingi o'rinlarda — keng aholi qatlami) ishtirokini qo'llab-quvvatlash;
b) mamlakat raqobatbardoshligini oshirish, yangi texnologiyalar va ilm-fan yutuqlarini integratsiya qilish;
v) istiqbolli tashabbuslarni qo'llab-quvvatlash maqsadida keng aholi qatlami uchun ochiq muloqot maydonini yaratish;
g) zamonaviy, ilg'or g'oyalar va istiqbolli tashabbuslarni saralash va tanlab olishning samarali mexanizmlarini joriy qilish.
- “Kelajak uchun” istiqbolli tashabbuslar forumini o'tkazish
- 2025 yildan boshlab har yili “Kelajak uchun” istiqbolli tashabbuslar forumini (keyingi o'rinlarda — Forum) o'tkazib borish amaliyoti joriy qilinsin.
- Belgilansinki:
a) Forum “O'zbekiston – 2030” strategiyasida belgilangan maqsadli ko'rsatkichlarga erishish jarayonida keng aholi qatlamining istiqbolli tashabbuslarini qo'llab-quvvatlashga hamda ularning faolligini rag'batlantirish va keng targ'ib qilishga qaratilgan;
b) Forum o'tkaziladigan ustuvor yo'nalishlar har yili “Kelajak uchun” istiqbolli tashabbuslar forumiga tayyorgarlik ko'rish va uni o'tkazish bo'yicha tashkiliy qo'mita (keyingi o'rinlarda — Tashkiliy qo'mita) tomonidan belgilab beriladi;
v) Forumga umumiy tayyorgarlik ko'rish va uni o'tkazish Tashkiliy qo'mita, istiqbolli tashabbuslarni baholash Mentorlar kengashi tomonidan amalga oshiriladi;
g) Strategik islohotlar agentligi Forumga kelib tushgan istiqbolli tashabbuslarni yig'ish, ularning yagona ro'yxatini shakllantirish, maxsus kraud platformaga joylashtirish va e'lon qilib borishga hamda Forum natijasi bo'yicha ma'qullangan istiqbolli tashabbuslarning mas'ul vazirlik va idoralar tomonidan amalga oshirilishini muvofiqlashtirishga mas'ul hisoblanadi;
d) Forumni o'tkazish bilan bog'liq xarajatlar 2025 yilda Strategik islohotlar agentligini qo'llab-quvvatlash jamg'armasi mablag'lari hisobidan, 2026 yildan boshlab Davlat byudjeti parametrlarida nazarda tutib boriladi;
e) Forumni o'tkazish joyini tegishli vositalar (bannerlar, videoroliklar, ekranlar, aloqa va boshqa vositalar) bilan ta'minlash “Interforum” DUK tomonidan amalga oshiriladi;
j) Forumning endaument fondi ixtiyoriy mablag'lar asosida shakllantiriladigan fond sifatida tashkil etiladi;
z) Forumda ma'qullangan istiqbolli tashabbuslarni tijoratlashtirish va moliyalashtirishga “Biznesni rivojlantirish banki” ATB va boshqa tijorat banklari, shuningdek, Ilm-fanni moliyalashtirish va innovatsiyalarni qo'llab-quvvatlash jamg'armasi mas'ul hisoblanadi.
III. Tashkiliy chora-tadbirlar
- Quyidagilar:
a) “Kelajak uchun” istiqbolli tashabbuslar forumiga tayyorgarlik ko'rish va uni o'tkazish bo'yicha tashkiliy qo'mita tarkibi 1-ilovaga muvofiq;
b) “Kelajak uchun” istiqbolli tashabbuslar forumining mentorlar kengashi tarkibi 2-ilovaga muvofiq;
v) “Kelajak uchun” istiqbolli tashabbuslar forumini o'tkazish tartibi to'g'risida nizom 3-ilovaga muvofiq;
g) “Kelajak uchun” istiqbolli tashabbuslar forumini 2025 yilda o'tkazish bo'yicha tashkiliy chora-tadbirlar rejasi 4-ilovaga muvofiq tasdiqlansin.
- Belgilansinki:
a) Forumga tayyorgarlik jarayonida kelib tushgan istiqbolli tashabbuslar top-50 va top-10 talik tartibida saralanadi;
b) Mentorlar kengashi tomonidan top-10 deb topilgan eng dolzarb istiqbolli tashabbuslar O'zbekiston Respublikasi Prezidenti ishtirokida o'tkaziladigan Forumning yalpi majlisida muhokama qilinadi;
v) Forumning yalpi majlisini o'tkazish yakunlari bo'yicha ma'qullangan istiqbolli tashabbuslarni amalga oshirish yuzasidan chora-tadbirlar rejasi ishlab chiqiladi;
g) chora-tadbirlar rejasiga kiritilgan istiqbolli tashabbuslarni amalga oshirish uchun kredit va grantlar ajratilishi, soliq, bojxona va boshqa rag'batlantirish choralari qo'llanishi mumkin;
d) Forum doirasida kelib tushgan boshqa tashabbuslar Vazirlar Mahkamasiga davlat dasturlarini, tegishli soha, tarmoq yoki hududlarni rivojlantirish bo'yicha chora-tadbirlarni shakllantirish maqsadida yuboriladi hamda Hukumat tomonidan ularni amalga oshirish yuzasidan zarur choralar ko'riladi.
- Strategik islohotlar agentligi (B.Raxmatov) hamda Raqamli texnologiyalar vazirligi (Sh.Shermatov) Iqtisodiyot va moliya vazirligi (I.Norqulov), “Biznesni rivojlantirish banki” ATB (S.Annaklichev) va “Interforum” DUK (B.Zufarov) bilan birgalikda ikki oy muddatda Forumda ishtirok etishni xohlovchi shaxslarni ochiq elektron ro'yxatga olish, anketa to'ldirish, istiqbolli tashabbusning profili va kun tartibi, dasturi, ishtirok etish shartlari, shuningdek, boshqa ma'lumotlar olish imkoniyatini beruvchi kraud platformasi yaratilishini va ishga tushirilishini ta'minlasin.
- Tashkiliy qo'mita (B.Raxmatov):
a) 2025 yilda o'tkaziladigan Forumning ustuvor yo'nalishlarini belgilasin;
b) ikki oy muddatda Forumni 2025 yilda o'tkazishning aniq sanasi va joyi haqida taklif kiritsin;
v) Forumni o'tkazish bo'yicha tashkiliy chora-tadbirlar rejasining sifatli va o'z vaqtida bajarilishini, shuningdek, mas'ul ijrochilar faoliyati muvofiqlashtirilishini ta'minlasin.
- O'zbekiston milliy teleradiokompaniyasi va O'zbekiston milliy axborot agentligi Forumni o'tkazishga tayyorgarlik ko'rish va o'tkazish bilan bog'liq tadbirlarni ommaviy axborot vositalarida, jumladan, internet va ijtimoiy tarmoqlarda keng yoritilishini ta'minlasin.
- Farmon ijrosini tashkil etish, ta'minlash va nazorat
- Mazkur Farmonning ijrosini samarali tashkil qilishga mas'ul va shaxsiy javobgar etib Strategik islohotlar agentligi direktori B.B.Raxmatov belgilansin.
- Farmon ijrosini muhokama qilib borish, mas'ul tashkilotlar faoliyatini muvofiqlashtirish va nazorat qilish O'zbekiston Respublikasi Bosh vaziri A.N.Aripov hamda O'zbekiston Respublikasi Prezidentining yordamchisi B.M.Mavlonov zimmasiga yuklansin.
O'zbekiston Respublikasi Prezidenti
Sh. MIRZIYOYEV
Toshkent shahri,
2025 yil 14 iyul